ប្រភពពីមន្ត្រីរដ្ឋបាលព្រៃឈើស្រុកកែវសីមាបានឲ្យដឹងថា លោក ជុយ សុឃាង នាយ ផ្នែករដ្ឋបាលព្រៃឈើកែវសីមាកំពុងប្រើប្រាស់គ្រប់វិធីដើម្បីប្រមូលលុយពីបទល្មើសព្រៃឈើធ្វើមានធ្វើបានផ្ទាល់ខ្លួនដោយគ្មានញញើតអ្វីទាំងអស់ ។ ប្រភពបានឲ្យដឹង ទៀតថា មន្ត្រីរដ្ឋបាលព្រៃឈើដែលមានក្របខ័ណ្ឌត្រឹមត្រូវត្រូវបានលោក ជុយ សុឃាង ទុកចោលមិនប្រើទេហើយបែរជាទៅយកសាច់ញាតិបងប្អូនរបស់ខ្លួនឲ្យមកធ្វើការជំនួសមន្ត្រីជំនាញទៅវិញ ។
ប្រជាពលរដ្ឋក្នុងស្រុកកែវសីមា បានខ្សឹបថា ដោយសារលោក ជុយ សុឃាង ប្រើ ប្រាស់សាច់ញាតិបងប្អូនរបស់ខ្លួនដើម្បីប្រមូលផលប្រយោជន៍ទើបបទល្មើសកាប់ឈើនិងដឹកជញ្ជូនឈើក្នុងស្រុកកែវសីមា នៅតែបន្តកើតឡើងយ៉ាងរាលដាល ។ បងប្អូន កូនក្មួយរបស់លោក ជុយ សុឃាង មួយចំនួនត្រូវបានលោក ជុយ សុឃាង ប្រើឲ្យដើរយកលុយពីរថយន្តដឹកឈើនិងម៉ូតូដឹកឈើយ៉ាងអនាធិបតេយ្យ ហើយពួកគេនឹងចាត់ វិធានការបង្ក្រាបប្រសិនបើម្ចាស់រថយន្តដឹកឈើ និងម្ចាស់ម៉ូតូដឹកឈើមិនបង់លុយឲ្យពួកគេតាមការកំណត់ទេនោះ ។ ជារៀងរាល់យប់សាច់ញាតិបងប្អូនលោក ជុយ សុឃាង តែងធ្វើសកម្មភាពប្រមូលលុយនៅចំណុចកែងផ្លូវបត់ចូលសាលាស្រុកចាស់ តាមបណ្ដោយផ្លូវជាតិលេខ៧៦ ក្នុងភូមិអូរអាម ឃុំអូរណា ស្រុកកែវសីមា ដោយមិន ខ្វល់ពីការរិះគន់អ្វីទាំងអស់ ។
មន្ត្រីរដ្ឋបាលព្រៃឈើស្រុកកែវសីមាដែលត្រូវលោក ជុយ សុឃាង ទុកចោលលែង ប្រើបានបង្ហើបឲ្យដឹងថា បងប្អូនសាច់ញាតិលោក ជុយ សុឃាង ពួកគេស្លៀកពាក់ស៊ីវិល តែមានសិទ្ធិប្រើប្រាស់រថយន្តរបស់មេព្រៃដែលមានពាក់ស្លាកលេខភ្នំពេញ 2E-3013 ដើម្បីធ្វើសកម្មភាពប្រមូលលុយពីម្ចាស់រថយន្តដឹកឈើ និងពីអ្នកដឹកឈើតាមម៉ូតូ យ៉ាងក្រអឺតក្រទម ។ ក្នុងនាមជានាយផ្នែករដ្ឋបាលព្រៃឈើកែវសីមា លោក ជុយ សុឃាង មិនដែលចាត់វិធានការបង្ក្រាបបទល្មើសកាប់ឈើនិងដឹកជញ្ជូនឈើដែល កំពុងកើតឡើងយ៉ាងពេញបន្ទុកនោះទេ គឺមន្ត្រីរូបនេះបែរជាយកបងប្អូនសាច់ញាតិរបស់ ខ្លួនមកប្រើប្រាស់ជំនួសមន្ត្រីជំនាញដើម្បីប្រមូលផលប្រយោជន៍យ៉ាងសុខស្រួលទៅ វិញ ៕
