ដោយសារតែវ័យកាន់តែចាស់គឺ៧១ឆ្នាំទៅហើយ លោក បានគីមូន មិនអាចបន្តកាន់ដំណែងណាមួយទៀតឡើយក្រោយពេលបញ្ចប់អាណាត្តិជាអគ្គលេខាធិការអង្គការសហប្រជាជាតិ។ លោកនឹងត្រូវបញ្ចប់អាណាត្តិនៅចុងឆ្នាំ២០១៦។ ក្រុមអ្នកជំនិត្យរបស់លោកបានបញ្ចាក់ថា លោក បានគីមូន និងចូលនិវត្តិ ហើយជួយធ្វើការជាលក្ខណមនុស្សធម៌របស់ស្ថានប័ន អ.ស.ប ដោយមិនចង់បន្តដំណែងដឹកនាំនយោបាយឡើយ។
លោក បានគីមូន បានបំពេញទស្សនកិច្ចទៅកាន់ទឹកដីកំណើតលើកនេះធ្វើឲ្យប្រព័ន្ធផ្សព្វផ្សាយកូរ៉េខាងត្បូងច្រើនសរសេរចុះព្រោងព្រាតពីលទ្ធភាពដែលលោក បានគីមូន អាចត្រលប់មកឈរឈ្មោះជាបេក្ខជនប្រធានាធិបតីកូរ៉េខាងត្បូងនៅអាណត្តិឆ្នាំក្រោយ។
នៅខែមករា ឆ្នាំក្រោយខ្ញុំនឹងត្រលប់មកប្រទេសកូរ៉េខាងត្បូងជាថ្មីក្នុងនាមជាជនជាតិរបស់ប្រទេសនេះ។ នៅពេលនោះខ្ញុំនឹងសញ្ជឹងគិត រួចសម្រេចចិត្តថា ក្នុងនាមជាជនជាតិកូរ៉េខាងត្បូង តើខ្ញុំនឹងត្រូវធ្វើអ្វីបន្តសម្រាប់ប្រទេសរបស់ខ្ញុំ? នេះជាប្រសាសន៍របស់លោក បានគីមូន ទៅកាន់អ្នកកាសែតនៅភាគខាងត្បូងកោះ Jeju ជាទីដែលលោកត្រូវចូលរួមក្នុងវេទិកាអន្តរជាតិស្តីពីសន្តិភាពនៅអាស៊ីខាងកើត។
លោក បានគីមូន អាយុ៧១ឆ្នាំ ត្រូវបញ្ចប់អាណត្តិរបស់លោកជាអគ្គលេខាធិការអង្គការសហប្រជាជាតិនៅចុងឆ្នាំនេះ ពោលគឺ១២ខែមុនការបោះឆ្នោតប្រធានាធិបតីនៅកូរ៉េខាងត្បូងខែធ្នូ ឆ្នាំ២០១៧។ នៅកូរ៉េខាងត្បូងលោក បានគីមូន មានប្រជាប្រិយភាពខ្ពស់និងទទួលការគាំទ្រមិនថាពីប្រជាជននិងអ្នកនយោបាយកូរ៉េខាងត្បូងក្នុងនាមលោកជាជនជាតិកូរ៉េខាងត្បូងម្នាក់ដែលបានគ្រប់គ្រងស្ថាប័នកំពូលពិភពលោកដល់ទៅ២អាណត្តិ។
មហិច្ឆតារបស់លោក បានគីមូន ក្នុងការវិលត្រលប់ទៅក្នុងនយោបាយកូរ៉េខាងត្បូងត្រូវបានលេចលឺជាច្រើនដង ប៉ុន្តែ លោក បានគីមូន នៅតែអះអាងថា លោកនៅមិនទាន់គិតគូរនៅឡើយ និងចង់ផ្តោតសំខាន់តែទៅលើការងារបច្ចុប្បន្នរបស់លោកក្នុងនាមអគ្គលេខាធិការអង្គការសហប្រជាជាតិតែប៉ុណ្ណោះ។
លោក បានគីមូន ដែលធ្លាប់ជាធ្វើជារដ្ឋមន្រ្តីការបរទេសកូរ៉េខាងត្បូងពីឆ្នាំ២០០៤ ដល់ឆ្នាំ២០០៦ នៅមិនទាន់បើកចំហរពីគម្រោងរបស់លោកដើម្បីត្រលប់ទៅក្នុងនយោបាយកូរ៉េខាងត្បូង ប៉ុន្តែសមាជិកមួយចំនួនរបស់បក្សកាន់អំណាច ដែលជាគណបក្សអភិរក្សនិយម បានអះអាងហើយថា ពួកគេស្វាគមចង់បានលោក បានគីមូន ឲ្យមកធ្វើជាបេក្ខជនប្រធានាធិបតីបន្តពីលោកស្រី ប៉ាក់គុនហេ នៅក្នុងការបោះឆ្នោតឆ្នាំក្រោយ។
គណបក្សកាន់អំណាច Saenuri សង្ឃឹមចង់ទាញយកប្រយោជន៍ប្រជាប្រិយភាពរបស់លោក បានគីមូន ដើម្បីស្រោចស្រង់មុខមាត់របស់បក្សឡើងវិញបន្ទាប់ពីចាញ់សំឡេងរបស់បក្សប្រឆាំងនៅក្នុងការបោះឆ្នោតសភាកាលពីខែមេសាកន្លងទៅ។សម្រាប់សមាជិកសភាមកពីគណបក្សកាន់អំណាចលោក Ahn Hong-Joo លោក បានគីមូន គឺជាប្រធានាធិបតីគ្រប់គ្រងពិភពលោក។ ក្នុងនាមជាអគ្គលេខាធិការអង្គការសហប្រជាជាតិលោក បានគីមូន មានបទពិសោធន៍ និងមានទំនាក់ទំនងល្អជាមួយមេដឹកនាំក្នុងពិភពលោកក្នុងរយៈពេល១០ឆ្នាំដែលលោកបម្រើការនៅអ.ស.ប ។
ដោយសារតែការជោគជ័យរបស់លោក បានគីមូន ធ្វើឲ្យពលរដ្ឋកូរ៉េខាងត្បូងភាគច្រើនចង់ឲ្យលោក បានគីមូន វិលត្រឡប់មកដឹកនាំប្រទេសវិញម្តងតាមរយៈការបោះឆ្នោតនៅឆ្នាំ២០១៧៕
ប្រែសម្រួល៖ ម៉ែវ សាធី
