កាលពីថ្ងៃទី២៧ ខែឧសភា ឆ្នាំ២០១៦ ក្រុមសហជិពកម្មករបារាំងបានអំពាវនាវដល់ពលករទាំងអស់ធ្វើកូដកម្មប្រឆាំងទៅនឹងច្បាប់កែទម្រង់ពលកម្ម។
ការអំពាវនាវខាងលើក្រោយពេលប្រធានាធិបតីបារំាងលោក ហ្វ្រងស័រហូឡែន បានប្រកាសថា និងកែទម្រង់ច្បាប់ពលកម្មដោយសារតែនោះជាការកែទម្រង់ល្អ។ តំណាងក្រុមពលករបានប្រកាសប្រឆាំងទៅនឹងរដ្ឋាភិបាលដែលមិនបានយោគយល់ដកច្បាប់ពលកម្មថ្មីដែលបង្ករឲ្យមានវិវាទនោះ។
កន្លងមកមានពលរដ្ឋប្រមាណ ១៥៣,០០០នាក់បាននាំគ្នាដង្ហែក្បួនបាតុកម្មប្រឆាំងនិងច្បាប់រឹតបន្តឹងពលករ ។ នៅក្នុងការធ្វើបាតុកម្មនោះប៉ូលិសក៏បានចាប់ខ្លួនមនុស្ស ៦២នាក់ក្រោយពេលមានការប៉ះទង្គិចគ្នាបណ្តាលឲ្យប៉ូលិស១៥នាក់រងរបួស។
រលកបាតុកម្មនៅក្នុងប្រទេសបារាំងបានផ្ទុះឡើងតាំងពីខែមីនា មកម្ល៉ោះក្នុងការប្រឆាំងទៅនឹងច្បាប់កែទម្រង់ពលកម្មដែលរដ្ឋាភិបាលបានលើកឡើង ដែលធ្វើឲ្យបាត់បង់ផលប្រយោជន៍ជាច្រើនដល់ពលករ។
ក្រុមបាតុកម្មបានបិទរោងចក្រចម្រាញ់រហូតធ្វើឲ្យខ្វះប្រេងប្រើប្រាស់។ ក្រុមសហជីពបានជម្រុញឲ្យពលករនៅក្នុងរោងចក្រ នុយក្លេអ៊ែរទាំង ១៩កន្លែងរបស់បារាំឈប់ធ្វើការដើម្បីប្រឆាំងច្បាប់ខាងលើ។ នៅចំពោះមុខជំហរតឹងរបស់ក្រុមសហជីពលោកនាយករដ្ឋមន្រ្តីបារាំង ម៉ានុយអ៊ែល វ៉ាល់ស៍ បានប្រកាសហើយថា លោកនឹងមិនសុខចិត្តដកចោលច្បាប់ការងារថ្មីជាដាច់ខាត។
បារាំងខ្វិនខ្វង់ដោយសារសន្ទុះមហាបាតុកម្ម និងកូដកម្ម ប្រឆាំងច្បាប់ការងារថ្មីរបស់រដ្ឋាភិបាល។ ស្ថានីយ៍រថភ្លើង ផ្លូវធ្វើដំណើរ កំពង់ផែ ត្រូវកកស្ទះ ដោយសារតែកូដកម្មមិនធ្វើការរបស់បុគ្គលិកទៅតាមការអំពាវនាវរបស់ CGT សហជីពធំ និងសំខាន់ជាងគេនៅបារាំង។ នៅថ្ងៃពុធសហជីព CGT បានប្រកាសថា រោងចក្រនុយក្លេអ៊ែរចំនួន ១៦ ក្នុងចំណោម១៩កន្លែងនឹងចូលរួមក្នុងកូដកម្មចាប់ពីថ្ងៃព្រហស្បតិ៍នេះទៅ។
តាមរដ្ឋមន្រ្តីក្រសួងគមនាគមន៍បារាំង កូដកម្មបិទផ្លូវ កំពង់ផែ និងរោងចក្រចម្រាញ់ប្រេង ធ្វើឲ្យមួយភាគបីនៃស្ថានីយ៍ចាក់ប្រេងសរុប ១២,០០០ របស់បារាំងគ្មានប្រេងសម្រាប់ម្ចាស់យានយន្ត។ គេនៅមិនទាន់វាយតម្លៃពីផលប៉ះពាល់នៃកូដកម្មនៅរោងចក្រនុយក្លេអ៊ែរនៅឡើយទេ ប៉ុន្តែគេរំពឹងថា កូដកម្មនៅតាមរោងចក្រនុយក្លេអ៊ែរ នឹងធ្វើឲ្យការផលិតចែកចាយអគ្គិសនីចុះថយ គ្មានភ្លើងប្រើប្រាស់ ដោយចាប់ផ្តើមដំបូងនៅតាមភាគខាងលិចទីក្រុងប៉ារីស។
ចលនាប្រឆាំងច្បាប់ការងារថ្មីបានកើនសន្ទុះខ្លាំងនៅថ្ងៃព្រហស្បតិ៍ ថ្ងៃបាតុកម្មថ្នាក់ជាតិ ទៅតាមការអំពាវនាវរបស់ ក្រុមសហជីពបារាំង ដែលចង់ដាក់សម្ពាធខ្លាំងឲ្យរដ្ឋាភិបាលដកចោលច្បាប់ការងារ។ ប្រមុខរដ្ឋាភិបាលបារាំង លោកម៉ានុយអ៊ែល វ៉ាល់ស៍ នៅថ្ងៃនេះបានបញ្ជាក់ហើយថា លោកមិនព្រមដកចោលច្បាប់ការងារថ្មី ប៉ុន្តែលោកបានលើកឡើងពីលទ្ធភាពកែប្រែចំណុចមួយចំនួននៅក្នុងច្បាប់។ នាយករដ្ឋមន្រ្តីបារាំងបានព្រមានថា បាតុកម្មរបស់សហជីពធ្វើឲ្យគាំងស្ទះលើកនេះ នឹងអាចប៉ះពាល់ដល់សេដ្ឋកិច្ចបារាំង ដែលទើបចាប់ងើបឡើងវិញ ជាពិសេសនៅពេលដែលតួលេខបង្ហាញថាចំនួនអ្នកគ្មានការងារធ្វើបានថយចុះជាថ្មីនៅខែមេសា។
ពាក់កណ្តាលនៃសហជីពនៅបារាំងបានសម្រេចចុះថ្នល់ធ្វើបាតុកម្មចាប់តាំងពីរដ្ឋាភិបាលបានប្រើច្បាប់ចាប់បង្ខំដើម្បីអនុម័តច្បាប់ការងារថ្មី ដោយមិនចាំបាច់ភ្លើងខៀវពីរដ្ឋសភាកាលពីដើមខែឧសភា។ តាមរដ្ឋាភិបាលកំណែទម្រង់ច្បាប់ការងារដែលនឹងជួយសម្រួលឲ្យក្រុមហ៊ុនអាចរើស ឬបណ្តេញបុគ្គលិកបានស្រួលជាងមុននឹងជួយឲ្យគេបង្កើតការងារធ្វើសម្រាប់ប្រជាជនបារាំង។ ប៉ុន្តែក្រុមសហជីពវិញប្រឆាំងនឹងច្បាប់ការងារថ្មីដែលគេវាយតម្លៃថា នឹងផ្តល់ប្រយោជន៍ច្រើនទៅឲ្យក្រុមហ៊ុន និងកាត់បន្ថយសិទ្ធិរបស់បុគ្គលិក កម្មករ ដែលរហូតមកត្រូវបានការពារខ្ពស់ដោយច្បាប់ការងារចាស់៕
ប្រែសម្រួល៖ ម៉ែវ សាធី
