ខេត្តកំពត​ : កងទ័ពអាកាសអាមេរិកនិងកម្ពុជា​ បានទទួលការពិនិត្យនិងព្យាបាលជម្ងឺដោយឥតគិតថ្លៃពីប្រជាពលរដ្ឋដែលរស់នៅភូមិ-ឃុំខុសគ្នា ស្ថិតក្នុងស្រុកកំពង់ត្រាច ខេត្តកំពត ប្រមាណជិត ៣ពាន់នាក់ ដែលការព្យាបាលនេះ បានធ្វើឡើងរយៈពេល៣ថ្ងៃជាប់គ្នា គិតចាប់ពីថ្ងៃទី១៣ ដល់ថ្ងៃទី១៥ ខែមិថុនានេះ។

បេសកម្មជំនួយមនុស្សធម៍ Pacific Angel សមាជិកនៃកងទ័ពអាកាសសហរដ្ឋអាមេរិក​ កងទ័ពជើងទឹក កងទ័ពខ្មែរ កងទ័ពអាកាសថៃ កងទ័ពអាកាសវៀតណាម និងកងទ័ពអាកាសអូស្រា្តលី ដែលរួមសហការជាមួយអង្គការក្រៅរដ្ឋាភិបាលដែលសហការគ្នាបង្កើតនូវជំនួយមនុស្សធម៍ ដែលធ្វើឡើង នៅរសៀលថ្ងៃទី១៥ មិថុនា ឆ្នាំ២០១៦នេះ នៅក្នុងបរិវេណ សាលាអនុវិទ្យាល័យ អង្គរជុំត្រពាំងឈូក ស្ថិតនៅឃុំបឹងសាលាខាងជើង ស្រុកកំពង់ត្រាច ខេត្តកំពត។
លោក វិញ ត្រេញ (VINH TRENH) មេបញ្ជាបេសកកម្មទេវតាឆ្នាំ២០១៦ នៅតំបន់អាស៊ីប៉ាហ្វិក បានឲ្យដឹងថា នេះជាលើកទី៤ហើយដែលក្រុមការងាររបស់កងទ័ពអាកាសអាមេរិក ដែលបានចុះមកព្យាបាលជូនពលរដ្ឋកម្ពុជា សម្រាប់គម្រោងដែលចុះបេសកកម្មនេះ បើគិតជាថវិកា មានការចំណាយប្រមាណពី ១,២លាន ដល់ ១,៤លានដុល្លារអាមេរិក។ ដោយឡែកក្រុមកងទ័ពដែលជាគ្រូពេទ្យ មានមកពីអាមេរិក អូស្រ្តាលី វៀតណាម និងថៃ ព្រមទាំងកងទ័ពអាកាសកម្ពុជា ហើយបេសកកម្មនេះ បានផ្តល់បទពិសោធន៍របស់អាមេរិកនិងកម្ពុជា​ រយៈពេលការទទួលពិនិត្យនិងព្យាបាលជូនប្រជាពលរដ្ឋកម្ពុជា នៅថ្ងៃទី១ មានប្រជាពលរដ្ឋជាង ៥០០នាក់, ថ្ងៃទី២ មានចំនួនជាង ៧០០នាក់ ដោយឡែកថ្ងៃទី៣ គិតត្រឹមរសៀលថ្ងៃទី១៥ ខែមិថុនានេះ មានចំនួនប្រមាណ ៥០០នាក់; សម្រាប់សេវាព្យាបាលជម្ងឺ រួមមាន ព្យាបាលជំងឺកុមារ ជំងឺភ្នែក ជំងឺមាត់ធ្មេញ និងព្យាបាលជំងឺទូទៅ។

បើយោងតាមសេចក្តីប្រកាសព័ត៍មានរបស់ស្ថានទូតអាមេរិក បានលើកឡើងថា តបតាមការអញ្ជើញ របស់រដ្ឋាភិបាលកម្ពុជាយោធាអាមេរិកនិងយោធាកម្ពុជាបានហ្វឹកហ្វឺនក្នុងការផ្តល់ជំនួយមនុស្សធម៌ និងការ ផ្លាស់ប្តូរគ្នានូវមេរៀនរវាងយោធានិងយោធា ពីថ្ងៃទី៦ ដល់ថ្ងៃទី១៨ ខែមិថុនា ឆ្នាំ២០១៦ នៅខេត្តកំពត ជា ផ្នែកមួយនៃបេសកកម្មមួយដែលមានឈ្មោះថា បេសកកម្មទេវតា ឆ្នាំ២០១៦ នៅតំបន់ប៉ាស៊ីហ្វិក។ ក្នុងកំឡុង ពេលបេសកកម្មនេះ យោធាអាមេរិកនិងយោធាកម្ពុជាចំនួន ៨០នាក់ រួមជាមួយទាហានមកពីប្រទេស អូស្រ្តាលី ប្រទេសវៀតណាម និងប្រទេសថៃ បានធ្វើការងាររួមគ្នាជាមួយនឹងអង្គការដៃគូមិនមែនរដ្ឋាភិបាល ក្នុងស្រុក ដើម្បីផ្តល់ជំនួយមនុស្សធម៌ដល់បរជាពលរដ្ឋនៅក្នុងខេត្តកំពត៕​

ដោយៈ​ ស​ ដារា៉