កាលពីថ្ងៃទី៣០ ខែកក្កដា ឆ្នាំ២០១៥ មេដឹកនាំចិនបានប្រគល់អតីតមេដឹកនាំយោធាមួយរូបឈ្មោះ Guo Boxiong ទៅឲ្យរដ្ឋអាជ្ញាប្រទេសនេះដើម្បីចោទប្រកាន់ពីបទប្រព្រឹត្តអំពើពុករលួយ ។ នេះជាករណីថ្មីបំផុតរបស់រដ្ឋាភិបាលចិនក្នុងយុទ្ធនាការប្រឆាំងទៅលើមន្ត្រីជាន់ខ្ពស់ដែលប្រព្រឹត្តអំពើពុករលួយ ស៊ីសំណូកសូកប៉ាន់ ។
ទីភ្នាក់ងារព័ត៌មានស៊ីនហួបានផ្សព្វផ្សាយថា លោក Guo Boxiong ត្រូវបណ្តេញចេញពីបក្សកុម្មុយនីស្តចិន ដោយសារតែបានទទួលសំណូក សូកប៉ាន់ជាថ្នូរនឹងការផ្តល់តួនាទីជាមន្ត្រីយោធា ។ ប្រភពនេះបានដកស្រង់ព័ត៌មានចេញពីការិយាល័យនយោបាយគណៈកម្មាធិការកណ្តាលបក្សកុម្មុយនីស្តចិន ។
លោក Guo Boxiong អាយុ៧៣ឆ្នាំ មានតួនាទីជាអនុប្រធានគណៈកម្មាធិការកណ្តាលដ៏មានអំណាចជិតមួយទសវត្សរ៍រហូតមកដល់ឆ្នាំ២០១២ ។ លោក Guo Boxiong ត្រូវគេរាយការណ៍ថា ស្ថិតនៅក្នុងចំណោមមន្ត្រីជាន់ខ្ពស់ដែលត្រូវដកហូតពីតំណែងពីក្រុមប្រឆាំងអំពើពុករលួយរបស់រដ្ឋាភិបាល ។
ទីភ្នាក់ងារស៊ីនហួបានផ្សព្វផ្សាយថា ផ្អែកតាមការស៊ើបអង្កេតបានរកឃើញថា លោក Guo Boxiong បានទទួលសំណូក ខណៈលោកនៅកាន់តួនាទី ។ ជាមួយគ្នានោះ លោកនៅបានគៃបង្វែរផលប្រយោជន៍នោះទៅឲ្យអ្នកដទៃផ្សេងទៀត ក៏ដូចជាការទទួលសំណូកដោយខ្លួនឯង និងតាមរយៈក្រុមគ្រួសារជាដើម ។
ការផ្តន្ទាទោសទៅលើលោក Guo Boxiong ត្រូវបានធ្វើឡើង នៅមុនពិធីខួបទី៨៨ឆ្នាំ ថ្ងៃបង្កើតកងកម្លាំងយោធាចិន ដែលប្រព្រឹត្តទៅនៅថ្ងៃទី១ ខែសីហា ។ លោក Guo Boxiong ត្រូវគេដាក់ឲ្យស្ថិតក្រោមការស៊ើបអង្កេតតាំងពីខែមេសា ឆ្នាំ២០១៥រៀងមក ។
ការប្រគល់សំណុំរឿងរបស់លោកទៅឲ្យរដ្ឋអាជ្ញាយោធា មានន័យថា លោកនឹងប្រឈមមុខការផ្តន្ទាទោស ដែលត្រូវផ្តន្ទាទោសយ៉ាងធ្ងន់ គ្មានត្រាប្រណីជាប់នៅក្នុងពន្ធនាគារ ។
វិធានការប្រឆាំងអំពើពុករលួយនេះធ្វើឡើងតាមគោលនយោបាយរបស់ប្រធានាធិបតីចិនបច្ចុប្បន្ន លោក ស៊ី ជីនពីង ដែលពេលកន្លងមក មន្ត្រីជាន់ខ្ពស់ចិនជាច្រើនរូប ក្នុងនោះមានអតីតប្រធានក្រុមសន្តិសុខ Zhou Yongkang ផងដែរត្រូវតុលាការផ្តន្ទាទោស ។
រដ្ឋាភិបាលចិនបានចេញសេចក្តីថ្លែងថា ទោះបីជាអ្នកនោះមានអំណាច មានតួនាទីខ្ពង់ខ្ពស់យ៉ាងណាក៏ដោយ ប្រសិនបើបុគ្គលនោះប្រព្រឹត្តអំពើពុករលួយ ស៊ីសំណូកសូកប៉ាន់ រំលោភទៅលើច្បាប់បក្ស ពួកគេនឹងត្រូវទទួលទោស ដកហូតពីតួនាទី និងបណ្តេញចេញពីបក្សដោយគ្មានការញញើត រអែងឡើយ ៕
