មន្ត្រីមីយ៉ាន់ម៉ាបានប្រកាសថា កាលពីថ្ងៃទី៣០ ខែកក្កដា មីយ៉ាន់ម៉ាបានដោះលែងជនជាតិចិន១៥៥នាក់ដែលកាលពីសប្តាហ៍មុនត្រូវផ្តន្ទាទោសជាប់ពន្ធនាគារពីបទលួចកាប់ឈើខុសច្បាប់។ ការដោះលែងនេះបន្ទាប់ពីជនជាតិចិនទាំងអស់នោះបានសន្យាឈប់ប្រព្រឹត្តបែបនេះតទៀត ក៏ដូចជាមានការបញ្ចុះបញ្ចូលយ៉ាងខ្លាំងក្លាពីសំណាក់រដ្ឋាភិបាលចិននោះ ។
ការប្រកាសដោះលែងអ្នកទោសចិនទាំង១៥៥នាក់ពីសំណាក់មីយ៉ាន់ម៉ានាពេលនេះធ្វើឡើង បន្ទាប់ពីមានការលើកឡើងថា ខ្លាចមានការប្រឈមមុខតានតឹងកាន់តែខ្លាំងឡើងថែមទៀតរវាងប្រទេសជិតខាងទាំងពីរនេះ ក្នុងរយៈពេលចុងក្រោយនេះ មិនដូចកាលពីរបបយោធាមីយ៉ាន់ម៉ាកាន់អំណាចពីទសវត្សរ៍កន្លងមករហូតដល់ឆ្នាំ២០១១នោះឡើយ ដែលប្រទេសទាំងពីរមានការជិតស្និទ្ធល្អូកល្អិនចាក់ទឹកមិនលិច ។
សេចក្តីថ្លែងការផ្សព្វផ្សាយនៅលើគេហទំព័រក្រសួងព័ត៌មានមីយ៉ាន់ម៉ាបញ្ជាក់ថា ការដោះលែងអ្នកទោសទាំងនេះ គឺស្ថិតក្នុងទម្រង់នៃការលើកលែងទោសកាលពីថ្ងៃទី៣០ ខែកក្កដា ដល់អ្នកទោសទូទាំងប្រទេសប្រមាណ៦.៩៦៦នាក់ ដែលពួកគេទាំងនេះបានកែប្រែខ្លួន ក្នុងនោះរួមមានអ្នកទោស ២១០នាក់ផងដែរ ។
ប្រភពបន្តថា ការដោះលែងនេះជាក្តីសង្ឃឹមមួយជួយលើកស្ទួយដល់ទំនាក់ទំនងមិត្តភាពល្អប្រសើររវាងប្រទេសជិតខាងជាមួយគ្នា ។
អ្នកនាំពាក្យក្រសួងការបរទេសចិនប្រចាំនៅទីក្រុងប៉េកាំង លោក Hong Lei បានថ្លែងនៅក្នុងសេចក្តីប្រកាសព័ត៌មានថា ក្នុងចំណោមអ្នកទោសបរទេសដែលមីយ៉ាន់ម៉ាដោះលែងនោះ មានរួមបញ្ចូលជនជាតិ១៥៥នាក់ផងដែរដែលត្រូវចោទប្រកាន់ពីបទចូលកាប់ឈើខុស ច្បាប់ស្ថិតនៅភាគខាងជើងមីយ៉ាន់ម៉ាជាប់ព្រំដែនចិន ។
ប្រភពបានបន្តថា មីយ៉ាន់ម៉ាបានជូនដំណឹងដល់ចិនកាលពីព្រឹកមិញថា ពួកគេនឹងបញ្ជូនអ្នកដែលត្រូវដោះលែងទាំងនោះមកឲ្យប្រទេសចិនវិញនៅថ្ងៃស្អែក ។ ប្រភពបញ្ជាក់ថា មានការទំនាក់ទំនងពិភាក្សាគ្នាយ៉ាងផុសផុលរវាងប្រទេសទាំងពីស្តីអំពីករណីកាប់ឈើនេះ ៕
