ខេត្តព្រះសីហនុ៖ គ្រោះថ្នាក់ចរាចរណ៍រវាងម៉ូតូវេវបុកជាមួយរថយន្តកូរ៉េបុកគ្នាពេញទំហឹងក្នុងទិសដៅបញ្ច្រាស់គ្នា បណ្តាលឲ្យរថយន្តក្រឡាប់នៅចិញ្ចើមផ្លូវ រងរបួសធ្ងន់ម្នាក់។

ករណីគ្រោះថ្នាក់ចរាចរណ៍នេះកើតឡើងនៅវេលាម៉ោង៦ និង៥០នាទីព្រឹកថ្ងៃទី១ ខែសីហា ឆ្នាំ២០១៦ នៅចន្លោះគីឡូម៉ែត្រលេខ១៦២-១៦៣ ភូមិតានៃ ឃុំជើងគោ ស្រុកព្រៃនប់ ខេត្តព្រះសីហនុ។

សមត្ថកិច្ចបានឲ្យដឹងថា ជនរងគ្រោះដែលរងរបួសឈ្មោះនៅសា រាំ ភេទស្រី អាយុ២១ឆ្នាំ មុខរបរកម្មករដូងប្រេង មានទីលំនៅភូមិជើងគោ ឃុំជើងគោ ស្រុកព្រៃនប់ ខេត្តព្រះសីហនុ បើកម៉ូតូម៉ាកវេវ ពណ៌ក្រហម ស៊េរី០១១។ ចំណែករថយន្តម៉ាកទីតាន់កូរ៉េ ពណ៌ស ពាក់ស្លាកលេខកំពត 2A-0683 បើកបរដោយឈ្មោះវង្ស ប៊ុនធឿន ភេទប្រុស អាយុ២៨ឆ្នាំ មុខរបរបើកបរ មានទីលំនៅ ភូមិបិតត្រាង ឃុំបិតត្រាង ស្រុកព្រៃនប់  ខេត្តព្រះសីហន(របួសស្រាល)។

សូមបញ្ជាក់ថា រថយន្តកូរ៉េបើកក្នុងល្បឿនពីភ្នំពេញមកខេត្តព្រះសីហនុ ខណៈធ្វើដំណើរមកដល់កន្លែងកើតហេតុក៏ជួបគ្រោះថ្នាក់ចរាចរណ៍តែម្តង។

បច្ចុប្បន្នស្ត្រីរងគ្រោះត្រូវបានសមត្ថកិច្ចហៅរថយន្តសង្គ្រោះដឹកយកទៅមន្ទីរពេទ្យ ចំណែករថយន្តនិងម៉ូតូសមត្ថកិច្ចរកទៅរក្សាទុករង់ចាំដោះស្រាយគ្នាពេលក្រោយ៕

ដោយ៖ សុវណ្ណារ៉ា