ភ្នំពេញ៖ កម្លាំងការិយាល័យប្រឆាំងគ្រឿងញៀនសាលារាជធានីភ្នំពេញដឹកនាំដោយលោកវរសេនីយ៍ត្រី ប៉ុល និលអែក អនុប្រធានការិយាល័យ បង្រ្កាបគ្រឿងញៀន សហការជាមួយកម្លាំងនគរបាលមូលមូលដ្ឋាននិងដោយមានការសម្របសម្រួលនិងការអនុញ្ញាតពីលោក ស៊ាង សុខ ព្រះរាជអាជ្ញារងអមសាលាដំបូងរាជធានីភ្នំពេញផងនោះបានចុះធ្វើប្រតិបត្តិការ បង្ក្រាបទីតាំងហ្គេមបាញ់ត្រីមួយកន្លែងទាំងយប់ដោយឃាត់ខ្លួនមនុស្ស១០នាក់ ក្នុងនោះមានស្រី២នាក់ផងដែរ ។
ប្រតិបត្តិការនេះបានធ្វើឡើងកាលពីវេលាម៉ោង១០និង១០នាទីយប់ ថ្ងៃទី៣១ ខែកក្កដា ឆ្នាំ២០១៥ ស្ថិតនៅតាមបណ្តោយផ្លូវ២៧១ ផ្ទះលេខ៤០៧Eo ក្រុមទី៩ ភូមិទី១ សង្កាត់ផ្សារដើមថ្កូវ ចំការមន រាជធានីភ្នំពេញ ដោយបានរឹបអូសទូហ្គេមបាញ់ត្រីចំនួន២ទូ និងសម្ភារសេពគ្រឿងញៀនមួយចំនួន និងមនុស្សប្រុស ស្រី១០នាក់ បញ្ជូនទៅកាន់ការិយាល័យប្រឆាំងបទល្មើសគ្រឿងញៀនរាជធានីភ្នំពេញដើម្បីសាកសួរកសាងសំណុំរឿងតាមច្បាប់។
លោកវរសេនីយ៍ត្រី ប៉ុល និលអែក បានមានប្រសាសន៍ឲ្យដឹងថា កិច្ចប្រតិបត្តិការនេះធ្វើឡើងក្រោមការណែនាំរបស់លោកស្នងការនគរបាលរាជធានីភ្នំពេញ និងបញ្ជាផ្ទាល់ពីលោក ស្នងការរង ប៊ន សំអាត ទទួលបន្ទុកការិយាល័យគ្រឿងញៀន បន្ទាប់ពីកម្លាំងរបស់លោកស្រាវជ្រាវដឹងថា ទីតាំងខាងលើបើកល្បែងហ្គេមបាញ់ត្រីខុសច្បាប់និងបង្កប់ដោយសេពគ្រឿងញៀនជាយូរមកហើយ ៕ ស រស្មី
