សាក្សី និងពលរដ្ឋបាននិយាយថា យ៉ាងហោចណាស់មនុស្ស២៧នាក់បានបាត់បង់ជីវិត និងរាប់សិបនាក់ផ្សេងទៀតបានរងរបួស បន្ទាប់ពីហេតុការណ៍ឧទ្ធម្ភាគចក្រមួយគ្រឿងរបស់កម្លាំងយោធាស៊ីរីបានហោះទៅធ្លាក់ចូលក្នុងផ្សារដែលកំពុងមមាញឹក ស្ថិតនៅទីប្រជុំជន Ariha ភាគពាយព្យ តំបន់គ្រប់គ្រងកាន់ដោយក្រុមឧទ្ទាមកាលពីថ្ងៃទី៣ ខែសីហា ឆ្នាំ២០១៥ ។
ក្រុមសង្កេតការណ៍សិទ្ធិមនុស្សស៊ីរីមានមូលដ្ឋាននៅអង់គ្លេសដែលជាអ្នកស៊ើបអង្កេតតាមដានដោយផ្ទាល់ជនរងគ្រោះបាត់បង់ជីវិតជីវិតក្នុងហេតុការណ៍សង្គ្រាមស៊ីវិលស៊ីរីនោះបានបញ្ជាក់ថា ជនរងគ្រោះភាគច្រើនជាពលរដ្ឋស៊ីវិល ស្ថិតនៅលើដី ក្នុងទីរួមខេត្ត Idlib ដែលទីតាំងនេះបានក្លាយទៅជាសម្ពន្ធមិត្តរបស់ក្រុមឧទ្ទាមរដ្ឋអ៊ិស្លាមកាលពីខែឧសភា កន្លងទៅនេះ ។
ក្នុងរយៈពេលភ្លាមៗនេះ គេមិនទាន់ឃើញប្រតិកម្មបែបណានៅឡើយពីកងកម្លាំងយោធាស៊ីរីដែលជាដើមចមនៃបញ្ហាបើកឧទ្ធម្ភាគចក្រធ្លាក់ទៅក្នុងផ្សារ។ ក្រុមសាក្សីឃើញហេតុការណ៍ផ្ទាល់ភ្នែក ក៏ដូចក្រុមអ្នកសង្កេតការណ៍បានបញ្ជាក់ថា ជនរងគ្រោះច្រើននាក់បានរងរបួស ។
ទីភ្នាក់ងាររ៉យទ័របានផ្សព្វផ្សាយដោយស្រង់ប្រភពពីសាក្សីឃើញហេតុការណ៍ផ្ទាល់ភ្នែកបញ្ជាក់ថា ឧទ្ធម្ភាគចក្រ កម្លាំងយោធាស៊ីរីបានទម្លាក់គ្រាប់បែក នៅចំកណ្តាលទីប្រជុំជន និងតាមដងវិថីដែលកំពុងមានការបើកទ្វារពេលព្រឹកដើម្បីធ្វើអាជីវកម្ម លក់ដូរ ហើយបន្ទាប់មក ឧទ្ទម្ភាគចក្រនោះស្រាប់តែធ្លាក់ចូលទៅក្នុងកណ្តាលផ្សារតែម្តង ។
សាក្សីឈ្មោះ Ghazal Abdullah និយាយថា ឧទ្ធម្ភាគចក្រទម្លាក់គ្រាប់បែកនៅតាមផ្លូវធំ Bazaar ហើយក្រោយមកឧទ្ធម្ភាគចក្រស្រាប់តែធ្លាក់ទៅក្នុងផ្សារ ។ ក្រុមសង្កេតការណ៍និយាយថា ឧទ្ធម្ភាគចក្រនេះទទួលរងការបាញ់ទម្លាក់។
ការប្រយុទ្ធគ្នាយ៉ាងខ្លាំងក្លាបាននិងកំពុងកើតឡើងស្ថិតនៅខេត្តដាច់ស្រយាល Idlib របស់ស៊ីរី រវាងកងកម្លាំងរដ្ឋាភិបាលស្មោះត្រង់លោកបាសា អាល់អាសាដ នឹងក្រុមឧទ្ទាមដែលមានឈ្មោះហៅថា ក្រុម Jaish al Fateh ឬហៅថាកងកម្លាំងសញ្ជ័យ ដែលរួមមានក្រុមសមាសភាអាល់កៃដា រណសិរ្សនូស្រ៊ា ផងដែរ ។
ការបាត់បង់សិទ្ធិគ្រប់គ្រងទៅលើតំបន់ Ariha របស់កម្លាំងយោធាស៊ីរីនោះបានធ្វើឲ្យក្រុមឧទ្ទាមកាន់តែមានសមត្ថភាពថែមទៀតនៅក្នុងការគ្រប់គ្រងខេត្ត Idlib ស្ទើរតែទាំងស្រុង ។ ខេត្តនេះមានទីតាំងស្ថិតនៅជាប់បណ្តោយព្រំដែនជាមួយប្រទេសទួរគី និងនៅជិតទីក្រុង Latakia ដែលជាដែនដីបេះដូងរបស់និកាយ Alawite របស់ប្រធានាធិបតីបាសា អាល់អាសាដ ស្ថិតតាមឈូងសមុទ្រមេឌីទែរ៉ាណេ ។
តំបន់សម្បុរដោយធនធានកសិកម្ម ទោះបីយ៉ាងណាក៏ដោយ បានរងការបំផ្លិចបំផ្លាញដោយសារតែការបំផ្ទុះគ្រាប់ និងការប្លោងអាវុធធុនធ្ងន់ដាក់គ្នារវាងកងកម្លាំងស្មោះត្រង់លោកប្រធានាធិបតីស៊ីរីបាសា អាល់អាសាដ នឹងក្រុមប្រឆាំង ។
កម្លាំងទាហានស៊ីរីបានបង្កើនសកម្មភាពវាយប្រហារពីលើដែនអាកាសប្រឆាំងទៅលើក្រុមឧទ្ទាម ដើម្បីដណ្តើមទីតាំងកាន់កាប់ឡើងវិញ ដែលក្រុមឧទ្ទាមបានដណ្តើមកាន់កាប់ ព្រមទាំងបិតច្រកសំខាន់ៗរបស់ស៊ីរីដូចជានៅតំបន់ជ្រលងភ្នំខេត្ត Latakia និងតំបន់ឈូងសមុទ្រភាគខាងជើងទីក្រុងដាម៉ាកាសជាដើម ៕
