ភ្នំពេញ៖ លោកស្រីម៉ែន សំអន បានអំពាវនាវ ឲ្យមូលនិធិវេទិការសេដ្ឋកិច្ច ពិភពឥស្លាមWIEFបន្ដកៀរគរអ្នកវិនិយោគទុន ក្នុងតំបន់ និងនៅលើពិភពលោក បង្វែរទិសដៅមកធ្វើធុរកិច្ចរបស់ខ្លួន នៅកម្ពុជា ព្រោះ ប្រទេសកម្ពុជា កំពុងក្លាយទៅជាគោលដៅ នៃកូនសោរ វិនិយោគមួយ និងជាទីផ្សារ នៃអ្នកប្រើ ប្រាស់ទំនិញ ដ៍មានសក្ដានុពលមួយ សម្រាប់ ក្រុមហ៊ុន ដែលបានផ្ដោតចំណាប់អារម្មណ៍ វិនិយោគនៅតំបន់ អាស៊ីអាគ្នេយ៍ ។
លោកស្រី ម៉ែន សំអន ឧបនាយក រដ្ឋមន្ត្រីរដ្ឋមន្ត្រី ក្រសួងទំនាក់ទំនងរដ្ឋសភា ព្រឹទ្ធសភានិងអធិការកិច្ច តំណាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើការអំពាវនាវបែបនេះ ក្នុងខណៈ ដែលោកស្រី ចូលរួម ក្នុងវេទិកាសេដ្ឋកិច្ចពិភពឥស្លាម ឆ្នាំ២០១៥ ដោយមានអ្នកវិនិយោគទុន ម៉ាឡេស៊ី សំាងហ្គាពួ ចិន ថៃ ឥណ្ឌូនេស៊ី និងអារ៉ាប់ ប៊ីសាអូឌីត ប្រមាណជាង២០០នាក់ នៅសណ្ឋាគារអ៊ិនធើខុនកង់ទីណង់តាល់ កាលពីថ្ងៃទី០៤ ខែសីហា ឆ្នំា២០១៥។
លោកស្រីម៉ែន សំអន បានបញ្ជាក់ថា៖ វេទិកាតុមូល ស្ដីពីមូលនិធិវេទិកាសេដ្ឋកិច្ច ពិភពឥស្លាម WIFEនៅភ្នំពេញសម្រាប់ឆ្នំា២០១៥នេះ ពិតជាធ្វើឡើងស្របពេល ដែលរាជរដ្ឋាភិបាល កម្ពុជា កំពុងធ្វើការកំណែទម្រង់ យ៉ាងស៊ីជម្រៅលើគ្រប់វិស័យ ដើម្បីធានាប្រសិទ្ធភាពសេវាសាធារណៈ និងជំរុញឲ្យអនុវត្ដ ភាពវិនិយោគ មិនតែប៉ុណ្ណោះព្រឹត្ដិការនេះ ពិតជាជួយរួមចំណែកផ្សព្វផ្សាយ ដល់អ្នកវិនិយោគ អ្នកជំនួញនានា នៅក្នុងតំបន់ និងនៅលើពិភពលោកឲ្យបង្វែទិសដៅធុរកិច្ច របស់ខ្លួនមករកស៊ីនៅកម្ពុជាវិញ ។
ហើយ វិទិកានេះពិតតែជាវេទិកាលើកទី១ តែក៏ជាព្រឹត្ដិការ ប្រកបដោយសក្ដានុពល និងជាពិសេស ផ្ដល់បទពិសោធន៍ដល់ក្រុមយុវជនជំនាន់ក្រោយ ឲ្យត្រៀមខ្លួនជាស្រេច ដើម្បីចូលរួមប្រឡូក ក្នុងវិស័យធុរកិច្ច និងក៏ដើម្បីចូលរួមកដបទពិសោធន៍ ទស្សនៈយោបល់ល្អៗ គន្លឹះសំខាន់ៗ និងវិធីសាស្រ្ដផ្សេងៗ ដើម្បីជោគជ័យ ក្នុងការងាររបស់ខ្លួន ក្នុងពេលអនាគត ។
លោកស្រីបន្ដថា៖ រាជរដ្ឋាភិបាលកម្ពុជា ក្នុងនីតិកាលទី៥ នៃរដ្ឋសភាដែលដឹកនំាដោយសម្ដេចអគ្គមហាសេនាបតីតេជោហ៊ុន សែន ជានាយករដ្ឋមន្ដ្រី បានកំណត់យុទ្ធសាស្រ្ដ៤យ៉ាង ស្ដែងចេញតាមរយៈ បាវចនា កំណើន ,ការងារ សមធម៌ និងប្រសិទ្ធភាព ឆ្ពោះទៅប្រទេសមានចំណូលមធ្យមមកម្រិតខ្ពស់ ជាមួយនេះ រាជរដ្ឋាភិបាលកម្ពុជា បានចាត់ទុកវិស័យឯកជនជាផ្នែកដ៍សំខាន់ សម្រាប់ការអភិវឌ្ឍ សង្គម សេដ្ឋកិច្ច របស់កម្ពុជា ។
លោកអូស្មាន ហាស្សាន់ រដ្ឋមន្ដ្រីប្រតិភូអមនាយករដ្ឋមន្រ្ដី បានបញ្ជាក់ថា៖ បច្ចុប្បន្ននេះ ប្រទេសកម្ពុជា អាច សម្រេចបាននូវកំណើនសេដ្ឋកិច្ច ក្នុងអត្រា ៧ ,៣ ភាគរយ ក្នុងឆ្នំា២០១៣ និងប្រមាណ៧ភាគរយ ក្នុងឆ្នំា២០១៤ ហើយនៅឆ្នំា២០១៥នេះ តាមការព្យាករណ៍បានបង្ហាញថាសេដ្ឋកិច្ចកម្ពុជា នឹងអាចសម្រេច បានកំណើន លើសពី៧ភាគរយបន្ដទៀត។ ត្រង់នេះហើយដែលកំណើនគិតជាមធ្យមភាគរយ ក្នុងរយៈពេលជាង២០ ឆ្នំា កន្លងមក កំណើនសេដ្ឋកិច្ចកម្ពុជា មានប្រមាណជាង៧ភាគរយ ហើយ។
អត្រាប្ដូរប្រាក់ក៏ត្រូវបាន ធានាឲ្យមាន ស្ថិរភាពជាទូទៅក្នុងរង្វង់ ៤០៥០រៀលក្នុង១ដុល្លារអាមេរិក អស់រយៈពេល ២០ឆ្នំាមកហើយ ពុំមានការប្រែប្រួលធ្លាក់ចុះអ្វីឡើយ ។ លើសពីនេះស្ថាបន័ធនាគារមានចំនួនកើនឡើងជាលំដាប់ ដែលមកដល់ពេលនេះ កម្ពុជា មានធនាគារពាណិជ្ជកម្ម ដែលកំពុងបម្រើសេវាកម្ម (Commercial Bank ) ចំនួន៣៦ និងស្ថាប័នមីក្រូហរញ្ញវត្ថុមានចំនួនប្រមាណជាង៤០ទៀត ដែលកំពុងបម្រើសេវាជូនអតិថិជនសព្វថ្ងៃ ។
សូមបញ្ជាក់ថា៖ វេទិកាសេដ្ឋកិច្ចពិភពអ៊ីស្លាម(WIEF)នេះ ត្រូវបានប្រារព្ធឡើងជាលើកដំបូងសម្រាប់កម្ពុជា ដែលមានអ្នកវិនិយោគទុនក្នុងប្រទេស និងក្រៅប្រទេស ចូលរួមប្រមាណជាង២០០នាក់មកពីពិភពអារ៉ាប់ និងអាស៊ីអាគ្នេយ៍ ប៉ុន្តែសម្រាប់ នៅលើពិភពលោក បានប្រារព្ធឡើងចំនួន១០លើកមកហើយដែរ ។ ដោយមានបណ្ដាអ្នកវិនិយោគទុន មកពីពិភពអារ៉ាប់ និងអ៊ឺរ៉ុប អាស៊ីអាគ្នេយ៍ប្រមាណជាង៥០០០នាក់ មកផ្ដល់នូវបទពិសោធន៍ ពីគ្នាទៅវិញទៅមក ដើម្បីបង្កើនចំណេះ មុខជំនួញ ឲ្យទទួលបានជោគជ័យក្នុងការងារប្រកបអាជឹបពាណិជ្ជកម្មរបស់ខ្លួន ទំាង ពេលបច្ចុប្បន្ន និងទៅអនាគត ។
WIEF ផ្ដល់វេទិកាលើកទី១០នៅ ក្រុងឌូបៃ ប្រទេសអារ៉ាប់រួមអេមីរ៉ាត ក្រោមអធិបតីភាព ព្រះអង្គម្ចាស់ Sheikh Mohammed Bin Rashid Al-Maktoum អនុប្រធានាធិបតី នាយករដ្ឋមន្ត្រី និងជាអភិបាលក្រុងឌូបៃ។ ក្នុងគម្រោងលើកទី១១នេះសម្រាប់ឆ្នាំ២០១៥នេះដែរ WIEF នឹងធ្វើជាទីក្រុងកូឡាលំពួរ ប្រទេសម៉ាឡេស៊ី ពីថ្ងៃទី៣-៥ខែវិច្ឆិកា២០១៥ ដែលមានប្រធានាធិបតី នាយករដ្ឋមន្ត្រី ជាង៣០ប្រទេសនឹងអញ្ជើញចូលរួមក្នុងវេទិកាសេដ្ឋកិច្ចពិភពឥស្លាមនេះ ៕
ដោយ៖ សំរិត
