ភ្នំពេញ៖ លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានលើកឡើងតាមរយៈហ្វេសប៊ុកផ្លូវការរបស់នៅថ្ងៃទី២១ ខែតុលា ឆ្នាំ២០២៥នេះថា៖ គេខ្លះនៅតែមានទស្សនៈភាន់ច្រឡំ អំពីករណីទិញ-លក់អាវុធ ដោយគិតតាមវិធីងាយៗ ថា ឱ្យតែមានលុយអាចទិញអាវុធបាន ឱ្យតែចិត្តចង់ទិញគឺទិញបាន…។
លោកបណ្ឌិត យង់ ពៅ បានបញ្ជាក់ថា ទីផ្សារអាវុធមិនមែនជាទំនិញទិញ-លក់ ស្រួលៗដូច្នេះនោះទេ បើទោះជាប្រទេសឧស្សាហកម្មសព្វាវុធ ខិតខំផលិតយ៉ាងសម្បូរបែបយ៉ាងណាក៏ដោយ។ ពោលគឺ លក់-ទិញ ដោយកិច្ចព្រមព្រៀងរវាងរដ្ឋនិងរដ្ឋ លក់-ទិញ សម្រាប់សម្ព័ន្ធមិត្ត ។ល។និង។ល។
បន្ថែមពីនេះ លោក បានគូសបញ្ជាក់ថា រឿងសំខាន់មួយដែលត្រូវចងចាំ ប្រសិនមានប្រទេសណាគេព្រមលក់អាវុធឱ្យ នោះចាត់ទុកគេជួយយើងសម្បើមហើយ និងអរគុណគេទៅ។ ម្យ៉ាងទៀត មិនចាំបាច់ឱ្យប្រទេសនោះបង្ហាញចេញមកជាសាធារណៈទើបបានហៅថាគេបានជួយនោះទេ។ ការដែលធ្វើបែបនេះ នាំទៅដល់ជម្លោះភូមិសាស្ត្រនយោបាយ និងបែកការសម្ងាត់យោធា…។ សូមប្រយ័ត្ន និងបន្តស្វែងយល់ផង៕
ដោយ៖តារា
