សេដ្ឋកិច្ច៖ តម្លៃហាងឆេងមាសបានដាំក្បាលចុះក្រោម ៥ ០០០ ដុល្លារ ក្នុងមួយតម្លឹងនៅថ្ងៃពុធនេះ បន្ទាប់ពីបានកើនឡើងនៅរយៈពេលប៉ុន្មានខែជាប់ៗគ្នាកន្លងមកនេះ។
លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities បានឱ្យដឹងថា តម្លៃមាសឱ្យតែមានការហក់ឡើងខ្ពស់ហើយ វានឹងធ្លាក់ចុះមកវិញនៅក្នុងកម្រិតណាមួយ ដែលនេះជាការប្រុងប្រយ័ត្នសម្រាប់បងប្អូនដែលជួញដូរទៅលើតម្លៃហាងឆេងមាស។
ជាក់ស្ដែងគិតត្រឹមម៉ោង ៩ ព្រឹកថ្ងៃពុធទី ២២ ខែតុលា ឆ្នាំ២០២៥ នេះ ហាងឆេងមាសកំពុងជួញដូរក្នុងតម្លៃ ៤ ៩៤០ ដុល្លារ ក្នុងមួយតម្លឹង ពោលគឺមានការធ្លាក់ចុះយ៉ាងគំហុកប្រមាណ ៣០០ ដុល្លារ ធៀបនឹងថ្ងៃម្សិលមិញ ដែលមានតម្លៃ ៥ ២៥០ ដុល្លារ ក្នុងមួយតម្លឹង។
ជាមួយគ្នានេះ លោក ឡុង សំណាង យល់ឃើញថា ប្រសិនបើមានការប្រកាសគម្រោង ឬគោលការណ៍ណាមួយពីសហរដ្ឋអាមេរិក នៅក្នុងឆ្នាំ ២០២៦ ខាងមុខនេះ តម្លៃមាសអាចនឹងមានការធ្លាក់ចុះមកវិញ ដោយសារមានគម្រោងក្នុងការគ្រប់គ្រងដឹកនាំជាប្រទេសមហាអំណាចមួយដូចជាការបិទបញ្ចប់សង្គ្រាមមួយចំនួនផងដែរ ឬក៏ការប្រកាសពីធនាគារកណ្ដាលរបស់សហរដ្ឋអាមេរិកពាក់ព័ន្ធជាមួយការតម្លឹង ឬទម្លាក់អត្រាការប្រាក់ វាអាចនឹងទម្លាក់ខ្លួនចុះ៕
ដោយ៖តារា
