ភ្នំពេញ៖ ទីភ្នាក់ងារសារព័ត៌មាន AKP បានចុះផ្សាយថា លោកបណ្ឌិត គឹម សន្តិភាព រដ្ឋលេខាធិការក្រសួងយុត្តិធម៌ និងជាប្រធានគណៈកម្មការជាតិដោះលែងដោយមានលក្ខខណ្ឌ បានជួបពិភាក្សាការងារជាមួយលោក ហ៊ីរ៉ូស៊ី ស៊ូដា (Horoshi Suda) ប្រធានកម្មវិធីទប់ស្កាត់បទល្មើស និងយុត្តិធម៌ព្រហ្មទណ្ឌប្រចាំការិយាល័យអង្គការ UNODC ស្តីពីការលើកកម្ពស់ការអប់រំជនល្មើសដោយផ្អែកលើសហគមន៍ ផ្តោតលើយន្តការការដោះលែងដោយមានលក្ខខណ្ឌ និងទោសការងារសហគមន៍ កាលពីព្រឹកថ្ងៃពុធទី២២ ខែតុលា ឆ្នាំ២០២៥ នាទីស្តីការក្រសួងយុត្តិធម៌។
ក្នុងកិច្ចជំនួបពិភាក្សានោះ លោក ហ៊ីរ៉ូស៊ី ស៊ូដា (Horoshi Suda) ប្រធានកម្មវិធីទប់ស្កាត់បទល្មើស និងយុត្តិធម៌ព្រហ្មទណ្ឌប្រចាំការិយាល័យអង្គការ UNODC បានថ្លែងអំណរគុណយ៉ាងជ្រាលជ្រៅចំពោះកិច្ចសហប្រតិបត្តិការដ៏យូរអង្វែងជាមួយក្រសួងយុត្តិធម៌កម្ពុជាក្នុងកិច្ចការលើកកម្ពស់ការអប់រំជនល្មើសដោយផ្អែកលើសហគមន៍ ទាក់ទងការដោះលែងដោយមានលក្ខខណ្ឌ និងទោសការងារសហគមន៍។
បន្ថែមពីលើនេះ លោកបណ្ឌិត គឹម សន្តិភាព និងលោក ហ៊ីរ៉ូស៊ី ស៊ូដា (Horoshi Suda) ក៏បានពិភាក្សា ផ្តល់មតិយោបល់ និងបទពិសោធន៍ទៅវិញទៅមក ស្តីពីការលើកកម្ពស់កិច្ចការនេះ ព្រមទាំងគម្រោងសកម្មភាពថ្មីៗរបស់ UNODC និងកិច្ចសហប្រតិបត្តិការបន្តនាពេលអនាគតរវាងក្រសួងយុត្តិធម៌កម្ពុជា និង UNODC សម្រាប់ឆ្នាំ២០២៦ ខាងមុខនេះផងដែរ ដោយក្នុងនោះ UNODC នឹងបន្តការគាំទ្រលើផែនការសកម្មភាពការងាររបស់គណៈកម្មការជាតិដោះលែងដោយមានលក្ខខណ្ឌ ដើម្បីចូលរួមពង្រឹង និងពង្រីកបន្ថែមទៀតលើយន្តការដោះលែងដោយមានលក្ខខណ្ឌនេះ ប្រកដដោយតម្លាភាព និងប្រសិទ្ធិភាពក្នុងការចូលរួមកែប្រែទណ្ឌិតដែលបញ្ចប់ការដោះលែងដោយមានលក្ខខណ្ឌឱ្យក្លាយជាពលរដ្ឋល្អក្នុងសង្គមវិញ៕
ដោយ៖តារា
