ភ្នំពេញ៖ លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា បានថ្លែងនៅរសៀលថ្ងៃទី១៤ ខែវិច្ឆិកា ឆ្នាំ២០២៥នេះថា៖ នេះគឺជាលើកទី១៦ ហើយដែលខ្ញុំបានធ្វើការបរិច្ចាគឈាម។ ថ្ងៃនេះខ្ញុំបានចូលរួមបរិច្ចាគឈាមសារជាថ្មីម្ដងទៀត ក្នុងព្រឹត្តិការណ៍ផ្ដល់ឈាម ក្រោមមូលបទ«យើងផ្ដល់ឈាម ផ្តល់ក្តីស្រឡាញ់ សម្រាប់កម្ពុជា» ដែលរៀបចំដោយក្រុមពិធីករកីឡាកម្ពុជា សហការជាមួយ មជ្ឈមណ្ឌលជាតិផ្ដល់ឈាម ព្រមទាំងទទួលបានការគាំទ្រដ៏ខ្ពង់ខ្ពស់បំផុតពីសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា។
លោក ហ៊ុន ម៉ានី បានថ្លែងបន្តថា កម្មវិធីបរិច្ចាគឈាមនេះ មិនត្រឹមតែជាការផ្ដល់ឈាម សម្រាប់ត្រៀមទុកជូនប្រជាពលរដ្ឋដែលត្រូវការឈាមនោះទេ ក៏គឺជាការបង្ហាញស្មារតីតែរួមគ្នាតែមួយនៅពេលដែលប្រជាពលរដ្ឋត្រូវការឈាម និងបង្ហាញពីស្មារតីដែលបងប្អូនប្រជាពលរដ្ឋខ្មែរ ខ្មែរចេះជួយគ្នានៅក្នុងគ្រាមានទុក្ខលំបាក។
លើសពីនេះទៀតនោះ ការរៀបចំនេះក៏ជាផ្នែកមួយនៃការបង្ហាញពីជំហរគាំទ្ររបស់ប្រជាជនដែលនៅតែបន្តផ្ដល់កម្លាំងចិត្ត ផ្ដល់ការគាំទ្រដល់រាជរដ្ឋាភិបាល និងកងទ័ពជួរមុខក្នុងការរិះរកវិធីសាស្រ្តដោះស្រាយបញ្ហារដោយសន្តិវិធី និងនាំយកការវិលត្រឡប់ទៅការអនុវត្តកិច្ចព្រមព្រៀងសន្តិភាពឱ្យបានដោយភាគីថៃ។
សូមចូលរួមបរិច្ចាគឈាមដោយស្ម័គ្រចិត្ត ដើម្បីជួយសង្គ្រោះជីវិតអ្នកត្រូវការឈាម៕ដោយ៖តារា
