អាជ្ញាធរសុចរិតភាពកីឡាវាយកូនបាល់អន្តរជាតិ (ITIA) បានប្រកាសថា កីឡាករវាយកូនបាល់បារាំង Quentin Folliot ត្រូវបានពិន័យ 20 ឆ្នាំមិនឱ្យចូលរួមពីការលេងកីឡា បន្ទាប់ពីត្រូវបានគេកំណត់ថាជាតួអង្គសំខាន់នៅក្នុងបណ្តាញរៀបចំលទ្ធផលការប្រកួតទុកមុន។
កីឡាករវ័យ 26 ឆ្នាំដែលបានឈានដល់ចំណាត់ថ្នាក់ ATP អាជីពខ្ពស់នៃ លេខរៀងទី 488 ក្នុងឆ្នាំ 2022 ត្រូវបានផ្អាកមិនឱ្យចូលរួមប្រកួតរហូតដល់ឆ្នាំ 2044 ។
ការហាមឃាត់ដែលចូលជាធរមានចាប់ពីថ្ងៃទី 17 ខែឧសភា ឆ្នាំ 2024 ហាម Folliot ពីការប្រកួត បង្វឹក ឬចូលរួមក្នុងព្រឹត្តិការណ៍កីឡាវាយកូនបាល់ណាមួយដែលត្រូវបានដាក់ទណ្ឌកម្មដោយសមាជិក ITIA ។ នេះរួមបញ្ចូលទាំងការប្រកួតដែលរៀបចំដោយ ATP, ITF, WTA និង Grand Slams ទាំងបួន ក៏ដូចជាសមាគមជាតិណាមួយ។
កាសែត The New York Times បានរាយការណ៍ថា បន្ថែមពីលើការព្យួរនេះ Folliot ត្រូវបានពិន័យជាប្រាក់ចំនួន 70,000 ដុល្លារ និងត្រូវបានបញ្ជាឱ្យសងប្រាក់រង្វាន់ជាង 44,000 ដុល្លារផងដែរ។
Folliot ត្រូវបានរកឃើញថាមានពិរុទ្ធពីបទរំលោភបំពានចំនួន 27ករណី ដាច់ដោយឡែកពីគ្នាដោយកម្មវិធីប្រឆាំងអំពើពុករលួយ (TACP) ។
ការស៊ើបអង្កេតបានបង្ហាញថាគាត់គឺអ្នកដើរតួដ៏សំខាន់នៅក្នុងបណ្តាញឧក្រិដ្ឋកម្ម ដោយមានការចោទប្រកាន់រាប់ចាប់ពីរៀបចំលទ្ធផលនៃការប្រកួតរបស់គាត់ និងទទួលយកប្រាក់ដើម្បីធ្វើឱ្យដំណើរការអន់ថយ រហូតដល់ការសូកប៉ាន់អ្នកលេងផ្សេងទៀតដើម្បីរៀបចំលទ្ធផលការប្រកួត និងសម្របសម្រួលការភ្នាល់ដោយផ្តល់ព័ត៌មានខាងក្នុង។
គាត់ក្លាយជាកីឡាករទីប្រាំមួយដែលត្រូវបានដាក់ទណ្ឌកម្មនៅក្នុងការស៊ើបអង្កេតនេះដោយចូលរួមជាមួយ Jaimee Floyd Angele, Paul Valsecchi, Luc Fomba, Lucas Bouquet និង Enzo Rimoli ។
សេចក្តីសម្រេចនេះជាការដាក់ទណ្ឌកម្មដ៏តឹងរ៉ឹងជាបន្តបន្ទាប់ដែលមានគោគោលដៅំបាត់អំពើពុករលួយក្នុងកីឡាវាយកូនបាល់អាជីព។
ករណីដែលល្បីល្បាញពីមុនរួមមាន Daniel Koellerer ជនជាតិអូទ្រីស ដែលត្រូវបានហាមឃាត់អស់មួយជីវិតសម្រាប់ការរៀបចំលទ្ធផលការប្រកួត និងការរំលោភលើការស៊ីសំណូកដែលបានប្រព្រឹត្តនៅចន្លោះឆ្នាំ 2009 និង 2010។ បងប្អូនជនជាតិអេហ្ស៊ីប Karim និង Youssef Hossam ក៏ទទួលបានបម្រាមពេញមួយជីវិតសម្រាប់ការរៀបចំលទ្ធផលការប្រកួតជាច្រើនចាប់ពីកម្រិត Futures ដល់កម្រិតខ្ពស់ជាងនេះ។
កីឡាករសញ្ជាតិអេស្បាញ Marc Fornell Mestres ត្រូវបានជាប់បម្រាមជាង 22 ឆ្នាំ និងពិន័យជាប្រាក់យ៉ាងធ្ងន់ធ្ងរសម្រាប់ការដឹកនាំរៀបចំលទ្ធផលការប្រកួត ខណៈដែលកីឡាករថៃ Jatuporn Na Lamphun ថ្មីៗនេះត្រូវបានហាមឃាត់អស់មួយជីវិត បន្ទាប់ពីជាប់ពាក់ព័ន្ធក្នុងរឿងចំនួន 22ករណី ដាច់ដោយឡែកពីគ្នារវាងឆ្នាំ 2023 និង 2024 ៕
