យោងតាមអង្គការសិទ្ធិមនុស្ស យ៉ាងហោចណាស់មានមនុស្ស ៣៦ នាក់បានស្លាប់ចាប់តាំងពីការតវ៉ាបានផ្ទុះឡើងនៅក្នុងប្រទេសអ៊ីរ៉ង់ក្នុងខែធ្នូ ឆ្នាំ ២០២៥។

កងកម្លាំងសន្តិសុខអ៊ីរ៉ង់បានប៉ះទង្គិចជាមួយក្រុមបាតុករនៅថ្ងៃទី ៦ ខែមករា នៅផ្សារមួយក្នុងចំណោមផ្សារធំបំផុតរបស់ទីក្រុងតេអេរ៉ង់ ចំពេលមានការតវ៉ាយ៉ាងទូលំទូលាយប្រឆាំងនឹងស្ថានភាពសេដ្ឋកិច្ចរបស់ប្រទេស។ ការតវ៉ាចុងក្រោយបំផុតបានធ្វើឡើងក្នុងទម្រង់ជាការអង្គុយតវ៉ានៅផ្សារប្រពៃណីធំបំផុតរបស់អ៊ីរ៉ង់។ នេះត្រូវបានគេមើលឃើញថាជាសញ្ញាមួយដែលបង្ហាញថារលកនៃភាពចលាចលក្នុងសង្គមទំនងជាមិនថមថយក្នុងពេលឆាប់ៗនេះទេ ខណៈដែលប្រាក់រៀលអ៊ីរ៉ង់បន្តធ្លាក់ចុះដល់កម្រិតទាបបំផុត។
នៅក្នុងខែធ្នូ ឆ្នាំ២០២៥ ប្រាក់រៀលបានធ្លាក់ចុះមកត្រឹម ១,៤លានរៀលក្នុងមួយដុល្លារអាមេរិក មុនពេលធ្លាក់ចុះបន្ថែមទៀតដល់ ១,៤៦លានរៀល/ដុល្លារអាមេរិកនៅដើមខែមករា ឆ្នាំ២០២៦។ មុនបដិវត្តន៍អ៊ីស្លាមឆ្នាំ ១៩៧៩ ប្រាក់រៀលអីរ៉ង់ត្រូវបានជួញដូរមានស្ថេរភាពប្រហែល ៧០រៀល/ដុល្លារអាមេរិក ហើយនៅពេលដែលអ៊ីរ៉ង់បានចុះហត្ថលេខាលើកិច្ចព្រមព្រៀងនុយក្លេអ៊ែរនៅឆ្នាំ ២០១៥ អត្រាប្តូរប្រាក់មានប្រហែល ៣២,០០០រៀល/ក្នុង១ដុល្លារអាមេរិក។
សេដ្ឋកិច្ចអ៊ីរ៉ង់អាចបន្តធ្លាក់ចុះបន្ទាប់ពីធនាគារកណ្តាលអ៊ីរ៉ង់បានសម្រេចចិត្តកាត់បន្ថយអត្រាប្តូរប្រាក់ដុល្លារអាមេរិកសម្រាប់អ្នកនាំចូល និងអ្នកផលិតយ៉ាងខ្លាំង លើកលែងតែថ្នាំពេទ្យ និងស្រូវសាលី។ វិធានការនេះទំនងជាបណ្តាលឱ្យមានការកើនឡើងយ៉ាងខ្លាំងនៃតម្លៃទំនិញសំខាន់ៗក្នុងរយៈពេលប៉ុន្មានថ្ងៃខាងមុខ ខណៈដែលអាជីវកម្មនានាបានផ្ទេរបន្ទុកចំណាយទៅឱ្យអ្នកប្រើប្រាស់ ដែលបានរងទុក្ខវេទនាពីការខាតបង់ដែលប្រមូលផ្តុំអស់រយៈពេលជាច្រើនឆ្នាំដោយសារតែទណ្ឌកម្មអន្តរជាតិ។
នៅថ្ងៃទី ៦ ខែមករា ប្រធានាធិបតីអ៊ីរ៉ង់ Masoud Pezeshkian បានបញ្ជាឱ្យមានការស៊ើបអង្កេតលើឧប្បត្តិហេតុជាច្រើនក្នុងអំឡុងពេលនៃការតវ៉ា ខណៈពេលដែលទទួលស្គាល់ថារដ្ឋាភិបាលទំនងជាមិនអាចគ្រប់គ្រងវិបត្តិទាំងមូលដោយខ្លួនឯងបានទេ។ លោកបានព្រមានថា បើគ្មានការសម្រេចចិត្តជាក់ស្តែងទេ អ៊ីរ៉ង់ប្រឈមនឹងការធ្លាក់ចូលទៅក្នុងវិបត្តិសេដ្ឋកិច្ចសង្គមកាន់តែជ្រៅ៕

រូប​ថត​: VTV