លោក Arteta បានទទួលស្គាល់ថា Arsenal គួរត្រូវបានរិះគន់ ព្រោះកំហុសដែលបង្កដោយខ្លួនឯង កំពុងគំរាមកំហែងដល់ឱកាសឈ្នះពាន Premier League បន្ទាប់ពីក្រុមនាំមុខតារាងនេះ បោះបង់ការនាំមុខពីរគ្រាប់ និងស្មើ 2-2 ក្នុងការប្រកួតក្រៅដីកាលពីថ្ងៃពុធ។

 

គ្រាប់បាល់ពី Bukayo Saka និង Piero Hincapie បានធ្វើឲ្យ Arsenal ជិតទទួលបានជ័យជម្នះ និងអាចនាំមុខ ៧ ពិន្ទុនៅកំពូលតារាង។ ប៉ុន្តែ ក្រុមរបស់ Arteta ត្រូវបានវាយបកតាមបានស្មើនៅចុងការប្រកួត នៅទីលាន Molineux ដែលមានព្រិលធ្លាក់ បង្កើតឱកាសថ្មីឲ្យ Manchester City ក្នុងការប្រជែងពាន។

 

នេះជាលើកទី២ជាប់គ្នា ដែល Arsenal មិនអាចរក្សាការនាំមុខបាន បន្ទាប់ពីស្មើ 1-1 ជាមួយ Brentford កាលពីសប្តាហ៍មុន។ បច្ចុប្បន្ន Man City តាមពីក្រោយ ៥ ពិន្ទុពី Arsenal ហើយនៅសល់ការប្រកួតមួយក្នុងដៃ ព្រមទាំងមានការប្រកួតក្នុងផ្ទះជាមួយ Arsenal នៅខែមេសាផងដែរ។

 

អ្នកចាត់ការសញ្ជាតិអេស្ប៉ាញArteta បាននិយាយថា៖ «ខ្ញុំខកចិត្តខ្លាំងណាស់។ យើងត្រូវទទួលយកវា ហើយត្រូវរិះគន់ខ្លួនឯង ព្រោះការលេងមិនគ្រប់គ្រាន់។ ក្នុងលីគ យើងមិនមានភាពស្ថិរភាពក្នុងរយៈពេលប៉ុន្មានខែចុងក្រោយនេះទេ»។

 

ក្រុមភាគខាងជើងទីក្រុងឡុងដ៍នេះ ក៏មានហានិភ័យត្រូវរងឥទ្ធិពលពីបរាជ័យអតីតកាល ក្នុងការប្រជែងពានជាមួយ Man City ខណៈពួកគេបានបាត់បង់ ១១ ពិន្ទុក្នុង ៨ ប្រកួតលីគឆ្នាំ ២០២៦៕