ខេត្តស្ទឹងត្រែង÷ អាជ្ញាធរ និងសមត្ថកិច្ចខេត្តស្ទឹងត្រែង បានសម្តែងការហួសចិត្តយ៉ាងខ្លាំង ក្រោយពីបានបើកការស៊ើបអង្កេតយ៉ាងក្តៅគគុក លើករណីចោរប្លន់ប្រដាប់អាវុធមួយ ប៉ុន្តែចុងក្រោយ បែរជាសាច់រឿងគឺប្រឌិតឡើងទាំងស្រុង ដើម្បីបិទបាំងកំហុសដែលយកទ្រព្យ សម្បត្តិទៅជួយគ្រួសារ ។
ទាក់ទងករណីនេះ កាលពីថ្ងៃទី៥ ខែកុម្ភៈ ឆ្នាំ២០២៦ កន្លងទៅនេះ មានការភ្ញាក់ផ្អើលយ៉ាងខ្លាំង តាមរយៈគណនីហ្វេសប៊ុក ដែលមានឈ្មោះ : “Bong Leang” ដែលបានបង្ហោះសារថា : “លោកចោរចូលប្លន់ដល់ក្នុងបន្ទប់ ជំរិតយកលុយ ដោយអាវុធកាំភ្លើងខ្លី មួយដើម អស់លុយពីផ្ទះសឹងតែមិនមានលុយមួយរៀល នៅហ្នឹងខ្លួនទេ មិនទាន់បានបីថ្ងៃផង ឥឡូវកូនឈឺ ចូលពេទ្យទៀតខេត្តស្ទឹងត្រែង ឥឡូវចាប់ផ្តើមមានចោរប្លន់ហើយ សូមបងប្អូនអាជីវករលក់ដូរនានា សូមមានការប្រុងប្រយ័ត្នទាំងអស់គ្នា លុយពិបាករកណាស់ វាមកប្លន់យើងតែបួនដប់នាទី មួយភ្លែត គឺអស់ហើយសូមប្រុងប្រយ័ត្នអ្នកខេត្តស្ទឹងត្រែងយើង”! ។
ក្រោយការស្រាវជ្រាវយ៉ាងដិតដល់ ពីមន្ត្រីកងរាជអាវុធ ហត្ថ ស្ត្រីជាភរិយា ឈ្មោះ ហាក់ គឹមមួយ អាយុ ២៥ឆ្នាំ បានសារភាពថា ខ្លួនពិតជាបានរៀបចំប្រឌិតសាច់រឿងនេះឡើង ដើម្បីភូតកុហកស្វាមី តែប៉ុណ្ណោះ។
ទ្រព្យសម្បត្តិ ដែលនាងប្រាប់ប្តីថា បាត់បង់រួមមាន ÷ មាស ១តម្លឹង ៣ជី ,គ្រឿងអលង្កាប្លាទីន តម្លៃប្រមាណ ៣លានរៀល ,លុយចំនួន ៧លានរៀល ។ មាស និងលុយទាំងនោះ ទៅជួយបងស្រីបង្កើត ដែលជាមេម៉ាយកូន ៤នាក់ ដើម្បីបើកមុខរបរ ។ ផ្ញើទៅព្យាបាលឪពុកម្តាយនៅពេទ្យប្រទេសវៀតណាម ដែលមានជំងឺចាស់ ជរា ។ ដោយសារខ្លាចប្តីស្តីបន្ទោស ទើបសម្រេចចិត្តបង្កើតរឿងចោរប្លន់នេះឡើងតែម្តង ។
ជាគោលការណ៍ច្បាប់ មាត្រា ៥២៤ : ការប្ដឹងភូតកុហកដល់អាជ្ញាធរមានសមត្ថកិច្ច ឬអាជ្ញាធរតុលាការ នាំឱ្យមានការស៊ើបអង្កេតឥតប្រយោជន៍។ ទោសកំហុស ÷ ត្រូវផ្ដន្ទាទោសដាក់ពន្ធនាគារពី ១ (មួយ) ខែ ដល់ ៦ (ប្រាំមួយ) ខែ និងពិន័យជាប្រាក់ពី ១០០,០០០ (មួយសែន) រៀល ដល់ ១,០០០,០០០ (មួយលានរៀល) ។
ទោះជាយ៉ាងណាដោយមានការយោគយល់ និង
សណ្ដោសប្រណីពី លោក សរ សុពុត្រា អភិបាលខេត្ត លោក កែវ សុធា ព្រះរាជអាជ្ញាអមសាលាដំបូងខេត្ត លោកឧត្តមសេនីយ៍ត្រី សេង សុភាព មេបញ្ជាការកងរាជអាវុធហត្ថខេត្ត អាជ្ញាធរបានសម្រេច មិនកសាងសំណុំរឿងបញ្ជូនទៅតុលាការឡើយ ដោយយល់ឃើញថា គាត់ធ្វើឡើងដោយខ្វះការពិចារណា និងមានបញ្ហាជីវភាពគ្រួសារ។ សមត្ថកិច្ចគ្រាន់តែអប់រំណែនាំ និងឱ្យ ធ្វើកិច្ចសន្យាបញ្ឈប់សកម្មភាពបែបននេះតទៅទៀត ។
កងរាជអាវុធហត្ថខេត្តស្ទឹងត្រែង បានសំណូមពរដល់បងប្អូនប្រជាពលរដ្ឋ កុំប្រឌិតរឿងរ៉ាវក្លែងក្លាយ ដែលបង្កឱ្យមានការភ័យខ្លាចក្នុងសង្គម។ ប្រសិនបើមានបទ ល្មើសពិតប្រាកដ សូមរាយការណ៍មកសមត្ថកិច្ចភ្លាមៗ ដើម្បីចាត់វិធានការតាមច្បាប់ ៕
