ខេត្តបាត់ដំបង ៖ ករណីក្មេងទំនើងនិងចាស់ពាលសរុបចំនួន០៤នាក់ ដែលដេញវាយនិងគប់ដោយដុំថ្មទៅលើបុរសម្នាក់ផ្អើលកណ្ដាលរាត្រីនៅស្រុកសង្កែ ត្រូវបានកម្លាំងអធិការរដ្ឋាននគរបាលស្រុកសង្កែ ស្រាវជ្រាវតាមចាប់ខ្លួនបានចំនួន០៣នាក់ហើយ កាលពីរសៀលថ្ងៃទី១៨ ឧសភា តែនៅសល់មេខ្លោងម្នាក់ទៀត ដែលកំពុងរត់គេច។ នេះបើតាមការផ្ដល់ព័ត៌មានពីមន្ត្រីជំនាញ ។
របាយការណ៍ អធិការរដ្ឋាននគរបាលស្រុកសង្កែលោក យុត តុងហូ បានឲ្យដឹងថា នៅក្នុងករណីអំពើហិង្សាដ៏កំរោលនេះភាគីបង្កមានបក្ខពួក ៤នាក់ បានព្រួតគ្នាជិះម៉ូតូតាមដេញវាយផង និងយកដុំថ្មដេញគប់ផងទៅលើជនរងគ្រោះម្នាក់ឈ្មោះ ឈិន សឿម ភេទប្រុស អាយុ២២ឆ្នាំ នៅភូមិកំពង់ឆ្លង ឃុំវត្តតាមិម ស្រុកសង្កែ ដែលព្យាយាមរត់យ៉ាងត្រដាបត្រដួស ដើម្បីគេចពីហ្វូងចចក ដែលកំពុងតាមប្រមាញ់យ៉ាងប្រកិតពីក្រោយ ។
យុវជន ឈិន សឿម ដែលអះអាងថា ជាជនរងគ្រោះ ត្រូវសមត្ថកិច្ចពិនិត្យឃើញមានស្នាមរបួសជាច្រើនកន្លែងនៅលើខ្លួន ។ ជនសង្ស័យ៣នាក់ ក្នុងចំណោម០៤នាក់ដែលត្រូវឃាត់ខ្លួនរួមមាន៖ ១-ឈ្មោះ លី ឈុនលេង ភេទប្រុស អាយុ៤០ឆ្នាំ នៅភូមិបោះពោធិ៍ ឃុំអូរដំបង១ ស្រុកសង្កែ,២-ឈ្មោះ អ៊ីន រ៉សា ភេទប្រុស អាយុ២០ឆ្នាំ នៅភូមិកំពង់ពិល ឃុំវត្តតាមិម ស្រុកសង្កែ និង ៣-ឈ្មោះ ឃា សុខឡេង ភេទប្រុសអាយុ៣២ឆ្នាំ នៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។ប៉ុន្តែរត់គេចខ្លួនម្នាក់ដែលជាមេខ្លោង តែមន្ត្រីជំនាញបានស្គាល់សាវតាហើយ កំពុងតាមចាប់ខ្លួន ។
របាយការណ៍មិនបានបញ្ជាក់ពីដើមចម ដែលនាំឲ្យក្រុមជនពាលក្មេងចាស់នេះ ព្រូតដេញវាយជនរងគ្រោះទេ។ ប៉ុន្តែបានបញ្ជាក់ថា មេខ្លោងម្នាក់ ដែលកំពុងរត់គេចជាអ្នកនាំអាទិ៍បង្កហិង្សាទៅលើជនរងគ្រោះ ។ នេះបើតាម ចម្លើយជន០៣នាក់ ដែលជាប់ខ្នោះ បានឆ្លើយដាក់ បន្ទុកទៅលើបក្ខពួកដែលរត់គេចខ្លួន ។
យ៉ាងណាក្ដី លោក យុត តុងហូ អធិការស្រុកសង្កែ បានបញ្ជាក់ថា ពេលនេះ មន្ត្រីជំនាញបាននិងកំពុងកសាងសំណុំរឿង ដើម្បីចាត់ការតាមនីតិវិធីហើយ ៕
