ភ្នំពេញ៖ បុរសម្នាក់ស្រវឹងស្រា បើករ៉ឺម៉កកង់បីមួយគ្រឿងធ្លាក់ប្រឡាយទឹកស្អុយបណ្ដាលឲ្យរងការខូចខាត តែសំណាងល្អមិនបណ្ដាលឲ្យអ្នកបើករ៉ឺម៉កកង់បីរងរបួសនោះទេ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២២និង២៥នាទី ថ្ងៃទី៦ ខែសីហា ឆ្នាំ ២០១៥ តាមបណ្ដោយផ្លូវលេខ៩០៧ កែងនិងផ្លូវបេតុង នៅខាងក្រោយវត្ត ទួលសង្កែរ ស្ថិតក្នុងសង្កាត់ ទួលសង្កែរ ខណ្ឌឬស្សីកែវ ។
ក្រោយកើតហេតុ បងប្អូនប្រជាពលរដ្ឋដែលនៅជិតកន្លែងកើតហេតុ បាននាំគ្នាជួយយកខ្សែចងទាញរ៉ឺម៉កកង់បីឡើងមកលើវិញ និងទំនាក់ទំនង រកបងប្អូនរបស់គាត់ឲ្យមកជួយយកទៅផ្ទះវិញ ព្រោះដោយសារតែគាត់ស្រវឹងហើយ និងម៉ូតូសណ្ដោងធាក់មិនឆេះទៀត ។
សមត្ថកិច្ចដោយមិនឃើញមានបញ្ហាឬក៏គ្រោះថ្នាក់អ្វីធំដុំនោះ ក៏សម្រេចចិត្តអនុញ្ញាតអោយក្រុមគ្រួសារយក រ៉ឺម៉កទៅផ្ទះនិងយកទៅជួសជុលខ្លួនឯងភ្លាមៗផងដែរ ពីព្រោះមិនចង់មានរឿងវែងឆ្ងាយ ៕
ដោយ៖ ចាន់ធឿន
