ភ្នំពេញ៖ បន្ទាប់ពីបើកយុទ្ធនាការស្វែងរកកញ្ញាឯកកម្ពុជា អស់រយៈពេលជាង៣សប្តាហ៍ ដែលបានពាក្យសុំប្រឡងរាប់រយកន្លងទៅនេះ ទីបំផុត បានរកឃើញកញ្ញាឯកកម្ពុជាផ្លូវការ២០រូប នៃកម្មវិធីប្រឡងជ្រើសរើស «កញ្ញាឯកកម្ពុជា២០១៦ សម្រស់ព្រះរាជាណាចក្រខ្ញុំ» ។
ពិធីប្រកាសបេក្ខនារីសម្រាប់វគ្គផ្តាច់ព្រ័ត្រនេះ បានត្រូវធ្វើឡើងនៅសាលពិធី Ballroom នៃសណ្ឋាគារណាហ្គាវើល ដែលជាមណ្ឌលកម្សាន្តប្រណីតមួយក្នុងតំបន់ឥណ្ឌូចិន ។
លោក Romyr Libo-on នាយកចាត់ការទូទៅនៃក្រុមហ៊ុនភ្នាក់ងារ«អារ៉ាយអេជិនស៊ី Arise Agency» និងជាអ្នករៀបចំកម្មវិធីប្រឡងកញ្ញាឯកកម្ពុជា២០១៦ បាននិយាយថា «កម្មវិធីប្រឡងកញ្ញាឯកកម្ពុជាឆ្នាំ២០១៦នេះនឹងធ្វើឲ្យសុបិន្តរបស់សុភាពនារីកម្ពុជាក្លាយជាការពិត»។
លោកបានបន្ថែមថា «ដល់ពេលដែលយើងត្រូវស្វែងរកសុភាពនារីកម្ពុជាវ័យក្មេងដែលមានទាំងរូបសម្បត្តិ ចរិយាសម្បត្តិ ប្រាជ្ញានិងរក្សាបាននូវប្រពៃណីដ៏ល្អផូរផង់របស់ខ្មែរដើម្បីតំណាងឲ្យព្រះរាជាណាចក្រកម្ពុជាក្នុងការប្រឡងកញ្ញាឯកជាលក្ខណៈអន្តរជាតិ» ហើយ។
លោកបានបញ្ជាក់ថា គោលបំណងចម្បងនៃការរៀបចំប្រកួតកញ្ញាឯកនេះ គឺស្វែងបេក្ខនារីកម្ពុជាស្រស់ស្អាតមានមន្តសេហ្ន៍និងប្រាជ្ញាដើម្បីគ្រងម្កុដកញ្ញាឯកកម្ពុជា២០១៦ និងចង់ឲ្យបេក្ខនារីខ្មែរបង្ហាញសមត្ថភាពនិង ទេពកោសល្យរបស់ខ្លួន។
គួររម្លឹកថា អ្នករៀបចំកម្មវិធីនិងគណៈកម្មាធិការជ្រើសរើស បានទៅខេត្តបាត់ដំបង កំពងចាម តាកែវ និងរាជធានីភ្នំពេញនៅក្នុងវគ្គជ្រើសរើសដំបូង។ កញ្ញាឯកទាំងអស់នឹងចូលរួមធ្វើសកម្មភាពជាច្រើនផងដែរ ដូចជាធ្វើដំណើរកម្សាន្តនិងលើកកម្ពស់អេកូទេសចរណ៍ក្នុងខេត្តព្រះសីហនុ ការធ្វើទស្សនកិច្ចទីតាំងវប្បធម៌ក្នុងខេត្ត សៀមរាប ចូលរួមការងារសង្គមក្នុងរាជធានីភ្នំពេញនិង ទស្សនកិច្ចជាច្រើនកន្លែងទៀតក្នុងរាជធានីភ្នំពេញ។
គួរបញ្ជាក់ថា ការប្រកួតវគ្គផ្តាច់ព្រ័ត្រ នឹងធ្វើឡើងនៅថ្ងៃទី១៤ ខែតុលា ឆ្នាំ២០១៦ ចាប់ពីម៉ោង៧យប់ដល់១០យប់នៅណាហ្គាវើល៕
ដោយ៖ ស ដារ៉ា
