កីឡាករវ័យក្មេងជនជាតិជប៉ុន Sora Matsushima បានបង្កើតប្រវត្តិសាស្ត្រថ្មី ដោយឡើងឈរនៅចំណាត់ថ្នាក់លេខ១ ពិភពលោកក្នុងវិញ្ញាសាវាយកូនឃ្លីលើតុ(ប៉េងប៉ុង)បុរស។ សមិទ្ធផលនេះបានបញ្ចប់ការគ្រប់គ្រងដ៏យូរអង្វែងរបស់ប្រទេសចិន និងធ្វើឱ្យរូបគេក្លាយជាកីឡាករវ័យក្មេងបំផុតដែលធ្លាប់ឡើងដល់កំពូលតារាងចំណាត់ថ្នាក់ឯកត្តជន។

 

Matsushima បានឡើងកាន់តំណែងកំពូលជាផ្លូវការក្នុងតារាងចំណាត់ថ្នាក់ឯកត្តជនបុរសរបស់សហព័ន្ធកីឡាវាយកូនឃ្លីលើតុអន្តរជាតិ (ITTF) នៅខែតុលា ឆ្នាំ២០២៦ បន្ទាប់ពីបង្ហាញសមត្ថភាពយ៉ាងល្អក្នុងការប្រកួត China Smash។

 

កីឡាករដ៏មានទេពកោសល្យវ័យ ១៩ ឆ្នាំរូបនេះ មិនត្រឹមតែបានយកឈ្នះគូប្រជែងប៉ុណ្ណោះទេ ប៉ុន្តែថែមទាំងបានបង្កើតគម្លាតពិន្ទុយ៉ាងច្រើនពីកីឡាករដទៃទៀតផងដែរ។ លទ្ធផលនេះធ្វើឱ្យរូបគេមានឱកាសខ្ពស់ក្នុងការរក្សាតំណែងលេខ១ រហូតដល់ដំណាច់ឆ្នាំ។

 

យោងតាមតារាងចំណាត់ថ្នាក់ដែលបានចេញផ្សាយកាលពីថ្ងៃចន្ទ Matsushima ឈរនៅលេខ១ ដោយមាន ៨.៥៥០ ពិន្ទុ នាំមុខកីឡាករបារាំង Felix Lebrun ដែលមាន ៦.៦៥៩ ពិន្ទុ។

 

មិត្តរួមជាតិជប៉ុនរបស់គេ Tomokazu Harimoto ឈរនៅលេខ៣ ដោយមាន ៦.៣៦៣ ពិន្ទុ បន្ទាប់មកគឺកីឡាករស៊ុយអែត Truls Moregard មាន ៦.១៨០ ពិន្ទុ និងកីឡាករចិន Wang Chuqin មាន ៦.១៥៧ ពិន្ទុ។

 

Matsushima គឺជាកីឡាករជប៉ុនដំបូងគេដែលឡើងឈរនៅកំពូលតារាងចំណាត់ថ្នាក់ឯកត្តជនបុរស ចាប់តាំងពី Seiji Ono សម្រេចបានសមិទ្ធផលនេះក្នុងខែកក្កដា ឆ្នាំ១៩៨០។ ជាមួយគ្នានេះ រូបគេក៏បានបញ្ចប់យុគសម័យដែលកីឡាករចិនគ្រប់គ្រងតំណែងនេះ ដោយក្លាយជាកីឡាករដំបូងគេដែលមិនមែនជាជនជាតិចិនឡើងកាន់តំណែងលេខ១ ចាប់តាំងពីកីឡាករអាល្លឺម៉ង់ Dimitrij Ovtcharov ក្នុងឆ្នាំ២០១៨។

 

Matsushima ក៏បានក្លាយជាកីឡាករវាយកូនឃ្លីលើតុបុរសក្នុងវិញ្ញាសាឯកត្តជនដែលមានអាយុក្មេងបំផុតក្នុងប្រវត្តិសាស្ត្រដែលឡើងដល់លេខ១ ដោយបំបែកកំណត់ត្រាមុនរបស់ Lin Shidong។ រូបគេសម្រេចបានសមិទ្ធផលនេះក្នុងវ័យត្រឹមតែ ១៩ ឆ្នាំ បន្ទាប់ពីមានការរីកចម្រើនយ៉ាងឆាប់រហ័ស ចាប់ពីការប្រកួតកម្រិតយុវជនរហូតដល់ឆាកអាជីព។

 

ការប្រកួត China Smash បានដើរតួនាទីសំខាន់ក្នុងការកំណត់ចំណាត់ថ្នាក់បច្ចុប្បន្នរបស់ Matsushima។ ទោះបីការព្យាករណ៍បានបង្ហាញថា រូបគេអាចឡើងដល់លេខ១ តាំងពីដើមខែក៏ដោយ ក៏គេនៅតែត្រូវការលទ្ធផលចុងក្រោយនៃការប្រកួត ដើម្បីបញ្ជាក់ចំណាត់ថ្នាក់ជាផ្លូវការ។

 

នៅពេល Felix Lebrun និង Moregard ត្រូវបានជម្រុះចេញក្នុងវគ្គ ៨ នាក់ចុងក្រោយ ខណៈ Harimoto ធ្លាក់ត្រឹមវគ្គ ១៦ នាក់ចុងក្រោយ តំណែងលេខ១ របស់ Matsushima ក៏ត្រូវបានធានា ទោះបីការប្រកួតមិនទាន់បញ្ចប់ក៏ដោយ។

 

រូបគេបានបញ្ចប់ការប្រកួតនេះយ៉ាងល្អឥតខ្ចោះ ដោយឈ្នះជើងឯកឯកត្តជនបុរស បន្ទាប់ពីយកឈ្នះកីឡាករ Lin Yun-ju មកពីតៃវ៉ាន់ ក្នុងលទ្ធផល ៤-៣ នៅវគ្គផ្តាច់ព្រ័ត្រ។

 

កន្លងមក Matsushima ធ្លាប់ឈ្នះជើងឯក United States Smash ឆ្នាំ២០២៦ និង WTT Champions Frankfurt ឆ្នាំ២០២៥។ រូបគេក៏បានឡើងដល់វគ្គពាក់កណ្តាលផ្តាច់ព្រ័ត្រក្នុងការប្រកួត Europe Smash, WTT Champions Yokohama និង WTT Champions Chongqing ព្រមទាំងបានឡើងដល់វគ្គ ៨ នាក់ចុងក្រោយនៅទីក្រុងដូហា និងម៉ាកាវ។

 

នៅដើមឆ្នាំនេះ ក្នុងការប្រកួត World Cup ឆ្នាំ២០២៦ នៅម៉ាកាវ Matsushima បានឡើងដល់វគ្គផ្តាច់ព្រ័ត្រវិញ្ញាសាឯកត្តជនបុរស ហើយក្លាយជាកីឡាករជប៉ុនទី២ ប៉ុណ្ណោះដែលសម្រេចបានសមិទ្ធផលនេះ។ ក្នុងការប្រកួតដណ្តើមជើងឯកជាមួយ Wang Chuqin រូបគេបាននាំមុខ ៣-២ មុនពេលចាញ់យ៉ាងប្រកៀកប្រកិតក្នុងលទ្ធផល ៣-៤។

 

ទោះបីត្រូវទទួលបានត្រឹមមេដាយប្រាក់ក៏ដោយ ក៏ការបង្ហាញសមត្ថភាពរបស់ Matsushima បានបញ្ជាក់ថា រូបគេមានសមត្ថភាពប្រកួតប្រជែងយ៉ាងស្វិតស្វាញជាមួយកីឡាករឆ្នើមៗរបស់ចិន។

 

ក្នុងការប្រកួតជាក្រុម Matsushima បានជួយឱ្យជប៉ុនដណ្តើមបានមេដាយប្រាក់ក្នុងព្រឹត្តិការណ៍ World Championships នៅទីក្រុងឡុងដ៍ កាលពីដើមឆ្នាំ២០២៦។ រូបគេក៏បានដើរតួនាទីយ៉ាងសំខាន់ក្នុងជ័យជម្នះរបស់ក្រុមបុរសជប៉ុនលើក្រុមចិន ដើម្បីដណ្តើមបានមេដាយមាសក្នុងព្រឹត្តិការណ៍ Asian Games ដែលរៀបចំនៅលើទឹកដីជប៉ុនផ្ទាល់ផងដែរ។

 

ការឡើងមកកាន់កំពូលតារាងយ៉ាងឆាប់រហ័សរបស់ Matsushima បានកើតឡើងក្នុងពេលដែល Wang Chuqin អវត្តមានពីការប្រកួតជាច្រើនលើកនាពេលថ្មីៗនេះ ដោយសាររបួស។ ទោះបីកីឡាករឆ្នើមរបស់ចិនរូបនេះនៅតែជាគូប្រជែងដ៏ខ្លាំងក្លាក៏ដោយ ក៏ការមិនអាចចូលរួមប្រកួតបានពេញលេញតាមកាលវិភាគ បានធ្វើឱ្យគេបាត់បង់ឱកាសប្រមូលពិន្ទុចំណាត់ថ្នាក់បន្ថែម។

 

បច្ចុប្បន្ន ការប្រកួតវាយកូនឃ្លីលើតុបុរសកំពុងមានការប្រជែងកាន់តែខ្លាំង ដោយមានកីឡាករលេចធ្លោជាច្រើនដូចជា Matsushima, Lebrun, Harimoto, Moregard និង Lin Yun-ju។

 

បន្ទាប់ពីប្រទេសចិនបានឈ្នះជើងឯកទាំង ១០ ក្នុងការប្រកួតពីរលើកមុនរបស់ China Smash ឆ្នាំនេះ ម្ចាស់ផ្ទះអាចរក្សាបានតែជើងឯកពីរក្នុងវិញ្ញាសានារីប៉ុណ្ណោះ ខណៈជើងឯកវិញ្ញាសាបុរស និងវាយគូបុរស-នារី ត្រូវបានដណ្តើមដោយកីឡាករមកពីប្រទេសផ្សេងៗ៕