ភ្នំពេញ៖ ស្រ្តីម្នាក់ជាអ្នកលក់ដូរលើចិញ្ចើមផ្លូវផ្សារដើមគរ បានស្លាប់យ៉ាងអាណោចអាធម៌ ដោយសារបុរសម្នាក់ស្រវឹងស្រាជោកជាំបានបើករថយន្តក្នុងល្បឿនលឿនបុករះ កាលពីវេលាម៉ោង២ និង១០នាទីរំលងអធ្រាត្រឈានចូលថ្ងៃទី២០ ខែតុលា ឆ្នាំ២០១៦ ត្រង់ចំណុចមុខផ្សារដើមគរ តាមបណ្តោយផ្លូវព្រះមុន្នីរ៉េត ក្នុងសង្កាត់ផ្សារដើមគរ ខណ្ឌទួលគោក ។

បុរសបើករថយន្តបង្កឈ្មោះសឿន សីុម៉ា អាយុ៣១ឆ្នាំ មុខរបរលក់ដូរ ស្នាក់នៅផ្ទះលេខ៣៨៦ ផ្លវលំភូមិអូបែកក្អម សង្កាត់ទឹកថ្លា ខណ្ឌសែនសុខ ។ សពស្ត្រីរងគ្រោះមិនត្រូវបានស្គាល់ឈ្មោះ អាយុ៥៣ឆ្នាំមុខរបរលក់បនែ្លស្នាក់នៅភូមិកោះថ្មី ស្រុកកោះធំ ខេត្តកណ្តាល ។

ប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តនីសាន់ ពាក់ស្លាកលេខ ភ្នំពេញ 2AF-9482 បើកតាមបណ្តោយផ្លូវព្រះមុន្នីរ៉េតទិសដៅពីកើតទៅលិច ហើយរថយន្តរេពេញផ្លូវដោយម្ចាស់ទំនងជាស្រវឹងស្រា ពេលមកដល់ចំណុចកើតហេតុបានបុករះអីវ៉ាន់ បន្លែ ដែលដាក់លក់លើចិញ្ចើមផ្លូវ ហើយជ្រុលទៅបុកនិងកិនស្រ្តីម្នាក់ដែលកំពុងអង្គុយលក់ បណ្តាលឱ្យស្លាប់ភ្លាមៗយ៉ាងអាណោចអាធ័មនៅនឹងកន្លែងកើតហេតុ ។

ប្រភពបន្តថា បន្ទាប់ពីកើតហេតុជនបង្កមិនបានចុះពីលើរថយន្តនោះទេ ហើយមានស្ថានភាពស្រវឹងស្រាជោកជាំថែមទៀតផង ដោយប្រជាពលរដ្ឋខឹងខ្លាំងពេកទប់កំហឹងមិនបាន ក៏បានវាយម្នាក់មួយដៃមួយជើងបែកមុខមាត់ ។

ក្រោយមកសមត្ថកិច្ចមូលដ្ឋានបាននាំខ្លួនជនបង្កទៅអធិការដ្ឋាននគរបាលខណ្ឌទួលគោកដើម្បីកសាងសំណុំរឿង និងបានធ្វើការវាស់វែងយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយបន្ត ចំណែកសពស្រ្តីរងគ្រោះសមត្ថកិច្ច ទំនាក់ទំនងទៅក្រុមគ្រួសារឱ្យមកទទួលយកទៅធ្វើបុណ្យតាមប្រពៃណី ៕

ដោយ៖ សុខាសែនជ័យ