ខេត្ដសៀមរាប ៖ ល្បែងស៊ីសងប្រភេទ ហ្គេមបាញ់ត្រីដែលគេលេងមានការចាញ់ឈ្នះ រហូតដល់រាប់ពាន់រាប់ម៉ឺនដុល្លារ នោះបានកើតឡើងយ៉ាងចំហពេញបន្ទុក នៅក្រុងសៀមរាបដោយគ្មានសមត្ថកិច្ច និងអាជ្ញាធរខេត្ដ-ក្រុងមានវិធានការ ទប់ស្កាត់និងបង្ក្រាបនោះឡើយ ។
បើតាមប្រភពច្បាស់ការណ៍ពីអ្នក ញៀនល្បែងស៊ីសងដែលធ្លាប់ចេញចូល លេងទាំងយប់ទាំងថ្ងៃបានឱ្យអ្នកយកព័ត៌មានដឹងថា ល្បែងស៊ីសងប្រភេទហ្គេម បាញ់ត្រីនេះមានច្រើនកន្លែងណាស់ស្ទើរពេញក្រុងសៀមរាបហើយបានដំណើរ ការជាច្រើនឆ្នាំមកហើយដោយគ្មានការបង្ក្រាបពីសមត្ថកិច្ចនោះទេ ពីព្រោះថៅ កែបើកហ្គេមបាញ់ត្រីគេបានត្រូវរ៉ូវជាមួយ សមត្ថកិច្ចមូលដ្ឋានរហូតដល់ថ្នាក់ក្រុង ខេត្ដសៀមរាបខ្លះអស់ទៅហើយ ។ ម្យ៉ាង ទៀតថៅកែហ្គេមបាញ់ត្រីនីមួយៗមានអ្នកធំមានអំណាចកាងពីក្រោយថែមទៀត ។
ប្រភពដដែលបានបន្ដថា នៅក្នុង ទីតាំងល្បែងស៊ីសងហ្គេមបាញ់ត្រីនីមួយៗពោរពេញទៅដោយការជួញដូរនិងប្រើ ប្រាស់គ្រឿងញៀនយ៉ាងខ្លាំងផងដែរ ។ ជាក់ស្ដែងនៅក្នុងក្លិបស្នុកឃ័រ B S C និង មួយកន្លែងទៀតក្នុងផ្ទះល្វែងខាងស្ដាំដៃ ផ្លូវចូលទៅក្លិបកម្សាន្ដខារ៉ាអូខេបាក់ខែងពោរពេញទៅដោយក្រុមអ្នកប្រើប្រាស់ និងជួញដូរគ្រឿងញៀនយ៉ាងច្រើន ។ ទីតាំង ហ្គេមបាញ់ត្រីទាំងពីរកន្លែងនេះ ស្ថិត នៅក្នុង សង្កាត់ស្វាយដង្គុំ ក្រុងសៀមរាប ខេត្ដសៀមរាប ។
ប្រភពច្បាស់ការណ៍ដដែលបានបញ្ជាក់ទៀតថា ល្បែងស៊ីសងប្រភេទហ្គេមបាញ់ ត្រីនេះជាល្បែងញៀនមិនព្រមចេញរហូតអ្នកខ្លះអង្គុយលេងទាំងយប់ទាំងថ្ងៃចាញ់ អស់ប្រាក់រាប់ពាន់រាប់ម៉ឺនដុល្លារនិងអ្នកខ្លះទៀតឈានដល់បញ្ចាំ ម៉ូតូ បញ្ចាំរថយន្ដ ទៀតផង ។
ប្រភពដដែលបានរៀបរាប់ទៀតថា ល្បែងស៊ីសងហ្គេមបាញ់ត្រីនេះនៅក្នុង កន្លែងនីមួយៗគេប្រើស្រីក្មេងស្រីស្អាត ជាច្រើននាក់ឈរចាំចុចដំឡើងពិន្ទុក្នុង តាបហ្គេមបាញ់ត្រីលក់ជូនភ្ញៀវដែលជាអ្នកលេងតាមតម្រូវការ និងរាប់លុយ យកពីភ្ញៀវទុកឱ្យថៅកែពីព្រោះទីតាំង នីមួយៗគេមានបំពាក់កាមេរ៉ាវីដេអូ ។
ប្រភពបានបញ្ជាក់ទៀតថា នៅក្នុង ក្លិបស្នូកឃ័រ B S C មានទូហ្គេមចំនួន២ ធំៗនិងមួយកន្លែងទៀត ត្រង់ផ្លូវចូល បាក់ខែងមានបីទូដែលក្នុងនោះមួយតាបៗអាចអង្គុយលេងបាន១០នាក់ ។
ពលរដ្ឋអ្នកសៀមរាបបាននិយាយថា ខេត្ដសៀមរាបគឺជាតំបន់ទេសចរណ៍ វប្បធម៌ និងជាទីក្រុងអចរិយៈមិនត្រូវ សមត្ថកិច្ច អាជ្ញាធរខេត្ដ និងក្រុង បណ្ដែតបណ្ដោយធ្វើមិនដឹងមិនឮបើក ឱកាសឱ្យកើតមានល្បែងស៊ីសងដូចខាងលើរីកសាយដូចផ្សិតគ្រប់ទិសទីពេញ ក្រុងសៀមរាបនោះទេ ។
ពលរដ្ឋបានរិះគន់បន្ដថា ការដែល មានល្បែងស៊ីសងច្រើនបណ្ដាលឱ្យមានអំពើឆក់ប្លន់និងឃាតកម្មកើតឡើងទៅ លើពលរដ្ឋស្លូតត្រង់ក៏ដូចជាភ្ញៀវជាតិនិងអន្ដរជាតិដែលគេមកទេសចរណ៍កម្សាន្ដនៅខេត្ដសៀមរាប ។
ទាក់ទិនទៅនឹងកាបើកល្បែងស៊ីសង ហ្គេមបាញ់ត្រីខាងលើ លោក សូវ៉ាន់ ដេត នាយប៉ុស្ដិ៍រដ្ឋបាលនគរបាលសង្កាត់ ស្វាយដង្គុំបានឱ្យដឹងតាមទូរស័ព្ទថា គេ បើកលេងមានច្បាប់ត្រឹមត្រូវចេញពី ក្រសួងប្រៃសណីយ៍និងទូរគមនាគមន៍ ហើយសមត្ថកិច្ចរបស់លោកបានធ្វើ របាយការណ៍បញ្ជូនទៅថ្នាក់លើរួចរាល់អស់ហើយ ។
ដោយឡែក លោក ទិត ណារ៉ុង អធិការ នគរបាលក្រុងសៀមរាបបានឱ្យដឹងតាមទូរសព្ទ័ថា ចំពោះការបើកល្បែងស៊ីសង ហ្គេមបាញ់ត្រីទាំងនោះខាងស្នងការបាន ប្រជុំនិងបានដាក់ការងារនេះឱ្យខាងនគរបាលព្រហ្មទណ្ឌកម្រិតស្រាលចុះធ្វើកំណត់ ហេតុដើម្បីធ្វើរបាយការណ៍បញ្ជូនទៅ គណៈបញ្ជាការឯកភាពខេត្ដមានចំណាត់ការបង្ក្រាបក្នុងពេលឆាប់ៗនេះ ។
លោកអធិការបានបន្ដថា ការបើក ល្បែងស៊ីសងខាងលើគេមានច្បាប់មែន គឺច្បាប់បើកអ៊ិនធឺណេតមិនមែនច្បាប់ បើកលែងល្បេងស៊ីសងនោះទេ ។ ម្យ៉ាង ទៀតថៅកែបើកល្បែងស៊ីសងគេមានខ្នងបង្អែកអ្នកធំនៅពីក្រោយ ។
គួររំលឹកថាល្បេងស៊ីសងប្រភេទហ្គេមបាញ់ត្រីមានការចាញ់ឈ្នះរហូតរាប់ពាន់រាប់ម៉ឺនដុល្លារ និងបានកើតឡើងយ៉ាង ច្រើននៅក្នុងសៀមរាបនិងយូរឆ្នាំទៀត ផង ពិសេសថៅកែទីតាំងល្បែងនីមួយៗ បានអះអាងថា គាត់បានបង់លុយឱ្យសមត្ថ កិច្ចរាប់មិនអស់ចាប់ពីមូលដ្ឋានរហូត ដល់ខេត្ដយ៉ាងគាប់ចិត្ដទើបដំណើរការ លេងបានរហូតមកទល់ពេលនេះគ្មានការ បង្ក្រាបឡើយ ។ ពិសេសនៅទីក្រុង ភ្នំពេញ ប្រភេទល្បែងស៊ីសងហ្គេមបាញ់ ត្រីក៏សមត្ថកិច្ចកំពុងមានវិធានការបង្ក្រាបយ៉ាងក្ដៅគគុកដែរ ។ ដោយឡែកសមត្ថ កិច្ចនិងអាជ្ញាធរខេត្ដសៀមរាបបែរជា បណ្ដែតបណ្ដោយឱ្យកើតឡើងយ៉ាងពេញ បន្ទុកនៅក្នុងក្រុងសៀមរាបទៅវិញ ៕
