ភ្នំពេញ៖ រថយន្តស៊េរីទំនើបមួយគ្រឿងបានឆ្លងភ្លើងឆាបឆេះយ៉ាងសន្ធោសន្ធៅខណៈម្ចាស់រថយន្តបម្រុងបើកចូលការ៉ាស់សាំង PTT ចាក់សាំង កាលពីវេលាម៉ោង៦ និង៤៥នាទីល្ងាចថ្ងៃទី២ ខែវិច្ឆិកា ឆ្នាំ២០១៦ នៅក្នុងការ៉ាស់សាំង PTT តាមបណ្តោយផ្លូវសហពន្ធ័រុស្សីក្បែរក្លោងទ្វាចូលវត្តនាគវ័ន្ត ស្ថិតក្នុងសង្កាត់ស្រះចក ខណ្ឌដូនពេញ ។

រថយន្តស៊េរីទំនើបដែលឆេះខាងលើម៉ាកឡង់គ្រីស័រ ពណ៌ស ពាក់ស្លាកលេខភ្នំពេញ 2AK-9689 បើកដោយបុរសម្នាក់មិនស្គាល់អត្តសញ្ញាណនោះទេ ។

បើតាមសាក្សីដែលបានឃើញហេតុការណ៍បានឲ្យដឹងថា មុនពេលកើតហេតុគេបានឃើញរថយន្តខាងលើបើកតាមបណ្តោយផ្លូវសហពន្ធ័រុស្ស៊ីក្នុងទិសដៅពីកើតទៅលិច ហើយបត់ស្តាំចូលការ៉ាស់សាំង PTT បម្រុងចាក់សាំង តែពេលដែលកំពុងបត់ចូលនោះបុគ្គលិកចាក់សាំងបានឃើញអណ្តាតភ្លើងឆេះចេញពីក្រោមរថយន្តភ្នែកខាងមុខ ឃើញដូចនេះបុគ្គលិករូបនោះបានរត់មកប្រាប់អ្នកបើកបរថា មានភ្លើងឆេះក្រោមរថយន្ត ហើយឲ្យបើកចេញពីហាងសាំងជាប្រញ៉ាប់ដើម្បីកុំឲ្យឆេះរាលដាលខ្លាំង ។ គ្រាន់តែអ្នកបើកបរបើកចេញមកវិញមិនទាន់ដល់ថ្នល់ផងភ្លើងក៏ចាប់ផ្តើមឆេះយ៉ាងសន្ធោសន្ធៅតែម្តងទៅ ធ្វើឲ្យម្ចាស់ស្ទុះរត់ចេញពីក្នុងរថយន្តយ៉ាងលឿន ។ ចំណែកបុគ្គលិកនៅក្នុងហាងសាំងនោះបាននាំគ្នាយកបំពង់ពន្លត់អគ្គីភ័យជួយបាញ់ពន្លត់រហូតរលត់ទាំងស្រុង ។

ក្រោយពេលកើតហេតុម្ចាស់រថយន្តបានទាក់ទងហៅខាងយាន្តដ្ឋានមកស្ទូចរថយន្តចេញពីកន្លែងកើតហេតុដើម្បីយកទៅធ្វើការជួសជុលដោយខ្លួនឯង ៕

ដោយ៖ សុខាសែនជ័យ