ភ្នំពេញ ៖ យ៉ាងតិចមានមនុស្សចំនួន១៧នាក់ ត្រូវបានដោះលែងដោយតំណាងអយ្យការ និងចៅក្រមស៊ើបសួរសាលាដំបូងរាជធានីភ្នំពេញ ពាក់ព័ន្ធទៅនឹង ការក្លែងបន្លំឯកសារសាធារណៈ និងប្រើប្រាស់អត្តសញ្ញាណខុសពីអត្តសញ្ញាណផ្លូវការក្នុងកិច្ចការសាធារណៈ ប៉ុន្មានថ្ងៃជាប់ៗគ្នានេះ ដែលគេសង្ស័យថា អាចនឹងពាក់ព័ន្ធទៅនឹងការទទួលសំណូកណាមួយ ទើបឈានដល់ការដោះលែង និងចេញដីកាសម្រេចដាក់ជនត្រូវចោទ ឲ្យស្ថិតក្រោមការត្រួតពិនិត្យតាមផ្លូវតុលាការ?
ប្រភពពីមន្ដ្រីតុលាការបានឲ្យដឹងថា លោកលី លីបម៉េង ចៅក្រមស៊ើបសួរសាលាដំបូងរាជធានីភ្នំពេញ បានដោះលែងជនត្រូវចោទចំនួន៥នាក់ ពាក់ព័ន្ធទៅនឹងការប្រព្រឹត្តបទល្មើសព្រហ្មទណ្ឌ ដែលបានក្លែងបន្លំឯកសារសាធារណៈ និងប្រើប្រាស់អត្តសញ្ញាណខុស ពីអត្តសញ្ញាណផ្លូវការ ក្នុងកិច្ចការសាធារណៈ នៃបទល្មើសដែលមានចែងឲ្យផ្ដន្ទាទោស តាមមាត្រា៦២៩ និង៦២១ នៃក្រមព្រហ្មទណ្ឌ។
ជនជាប់ចោទទាំង៥នាក់រួមមាន ១-ឈ្មោះ អេង វុត្ថា ភេទប្រុស អាយុ២៦ ឆ្នាំ,២-ឈ្មោះ គង់ ចណ្ណៈ ភេទប្រុស អាយុ៣៥ឆ្នាំ, ៣ ឈ្មោះ វ៉ា សិត ភេទប្រុស អាយុ៣០ឆ្នាំ, ៤ ឈ្មោះ ភិន សៅនាង ភេទស្រី អាយុ២៣ឆ្នាំ និង៥ ឈ្មោះ សឹង ពិសាល ភេទប្រុស អាយុ២២ឆ្នាំ។ ពួកគេបាន ប្រព្រឹត្តដូចតទៅ កាលពីថ្ងៃទី២៧ ខែមិថុនា ឆ្នាំ២០១៥ ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំការប្រលងភាសាកូរ៉េ ក្រោយប្រព័ន្ធអនុញ្ញាតមុខរបរសម្រាប់ពលករ ដែលមានចំនួន៧មណ្ឌល ក្នុងនោះមានមណ្ឌលវិទ្យាល័យសន្ធរម៉ុក, មណ្ឌលអនុវិទ្យាល័យចតុមុខ និងមណ្ឌលបឋមសិក្សាព្រះនរោត្តម ដែលក្រសួងរកឃើញថា មានជនសង្ស័យចំនួន៥នាក់ខាងលើនេះ បានប្រើប្រាស់អត្តសញ្ញាណមិនពិត ខុសពីអត្តសញ្ញាណផ្លូវការរបស់ខ្លួន គឺបានយកអត្តសញ្ញាណបណ្ណ និងបង្កាន់ដៃអនុញ្ញាតប្រឡង ធ្វើតេស្ដភាសាកូរ៉េរបស់អ្នកដ៏ទៃ មកបង្ហាញដល់មន្ដ្រីអនុរក្សប្រឡង ដើម្បីបានចូលប្រឡងជំនួសឲ្យអ្នកដ៏ទៃ ទើបក្រសួងការងារ និងបណ្ដុះបណ្ដាលវិជ្ជាជីវៈ ធ្វើការឃាត់ខ្លួនជនសង្ស័យទាំង៥នាក់ ប្រគល់ឲ្យសមត្ថកិច្ចតែម្ដង។
ពាក់ព័ន្ធនឹងមនុស្សទាំង៥នាក់នេះ ប្រព្រឹត្តនៅបទល្មើសខាងលើ តំណាងអយ្យការ លោកមាស ច័ន្ទពិសិដ្ឋ កាលពីថ្ងៃទី១ ខែកក្កដា ឆ្នាំ២០១៥ បានចេញដីការសន្និដ្ឋានបញ្ជូន រឿងឲ្យស៊ើបសួរបន្តទៅចៅក្រមស៊ើបសួរសាលាដំបូងរាជធានីភ្នំពេញ លោកលី លីបម៉េង ចាត់ការបន្តតាមនីតិវិធី។ ប៉ុន្តនៅរសៀលថ្ងៃទី ១ ខែកក្កដា ឆ្នាំ២០១៥ដដែលនោះ ចៅក្រមស៊ើបសួរ លោកលី លីបម៉េង បានចេញដីការសម្រេចដាក់ជនត្រូវចោទឲ្យស្ថិតក្រោមការត្រួតពិនិត្យតាមផ្លូវតុលាការ។
ករណីនេះ លោកមាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ កាលពីព្រឹកថ្ងៃទី៣ ខែកក្កដា ឆ្នាំ២០១៥ បានប្រាប់នគរវត្តឲ្យដឹងថា “ខ្ញុំមិនបានដោះលែងទេ គឺមានឯកសារច្បាស់លាស់ដែលខ្ញុំបានធ្វើ ដីការសន្និដ្ឋានបញ្ជូនរឿងឲ្យស៊ើបសួរ ទៅលោកលី លីបម៉េង បន្តតាមនីតិវិធី”។ លោកបន្តថា នេះជារឿងចៅក្រមស៊ើបសួរ។
ដោយឡែកលោក លី លីបម៉េង ចៅក្រមស៊ើបសួរ សាលាដំបូងរាជធានីភ្នំពេញ នារសៀលថ្ងៃទី៣ ខែកក្កដា ឆ្នាំ២០១៥ ប្រាប់នគរវត្តតាមទូរស័ព្ទថា “ពួកគេជាប់ចោទពីបទប្រើប្រាស់អត្តសញ្ញាណខុសពីអត្តសញ្ញាណផ្លូវការ ក្នុងកិច្ចការសាធារណៈ ដោយឡែកអ្នកក្លែងលិខិតសាធារណៈ គឺឈ្មោះសុធា និងគូកនដែលពួកគេទាំង២នាក់គេចខ្លួន។ ដូច្នេះការប្រើប្រាស់អត្តសញ្ញាណខុសពីអត្តសញ្ញាណផ្លូវការ ជាបទល្មើសត្រូវផ្តន្ទាទោសពី១-៦ខែ ទើបខ្ញុំចេញដីកា សម្រេចដាក់ជនត្រូវចោទឲ្យស្ថិតក្រោមការត្រួតពិនិត្យតាមផ្លូវតុលាការ។
គួររំលឹកថា ករណីក្លែងបន្លំឯកសារសាធារណៈ និងប្រើប្រាស់អត្តសញ្ញាណ ខុសពីអត្តសញ្ញាណផ្លូវការ ក្នុងកិច្ចការសាធារណៈត្រូវបានសមត្ថកិច្ចនគរបាលព្រហ្មទណ្ឌ ឃាត់ខ្លួនមនុស្សចំនួន១៧នាក់។ ជនសង្ស័យ៥នាក់ធ្វើរបាយការណ៍សំយោគបទល្មើសបញ្ជូនមកតំណាងអយ្យការលោកមាស ច័ន្ទពិសិដ្ឋ ចាត់ការបន្តតាមនីតិវិធី ហើយចំនួន១២នាក់ផ្សេងទៀត បញ្ជូនទៅតំណាងអយ្យការ លោក វង្ស ប៊ុនវិសុទ្ធ ប៉ុន្តែអ្នកទាំងនោះត្រូវបានដោះលែងទាំងអស់។
លោក វង្ស ប៊ុនវិសុទ្ធ ព្រះរាជអាជ្ញារងអមសាលាដំបូងរាជធានីភ្នំពេញ ពាក់ព័ន្ធនឹងករណីដោះលែងជនសង្ស័យ១២នាក់ ក្លែងបន្លំឯកសារសាធារណៈ និងប្រើប្រាស់អត្តសញ្ញាណខុសពីអត្តសញ្ញាណផ្លូវការ ក្នុងកិច្ចការសាធារណៈនោះ កាលពីរសៀលថ្ងៃទី៣ ខែកក្កដា ឆ្នាំ២០១៥ បានប្រាប់នគរវត្តតាមទូរស័ព្ទថា “យើងបានពិនិត្យទៅលើឯកសារឃើញថា ពុំមានលក្ខណៈសម្បត្តិគ្រប់គ្រាន់កំណត់បទល្មើស ទើបឲ្យពួកគេត្រឡប់ទៅវិញ។”
ករណីស្រដៀងនេះផងដែរ អង្គភាពប្រឆាំងអំពើពុករលួយ ធ្លាប់បានចាប់ខ្លួនមនុស្សមួយចំនួន ពាក់ព័ន្ធការចូលប្រឡងជំនួស សម័យប្រឡងមធ្យមសិក្សាទុតិយភូមិកាលពី១ឆ្នាំ កន្លងទៅ ហើយអង្គភាពប្រឆាំងអំពើពុករលួយតែងបានរំលឹកក្នុងរឿងនេះ ដើម្បីរឹតបន្តឹង ដល់ការប្រឡងក្រោយៗទៀត មិនអនុញ្ញាតឲ្យជនខិលខូចប្រព្រឹត្តបទល្មើសប្រឡងជំនួសបេក្ខជន។
មន្ត្រីក្រសួងការងារបានបង្កើបថា ការប្រឡងភាសាកូរ៉េក្រោមប្រព័ន្ធអនុញ្ញាតមុខរបរសម្រាប់ពលករ រហូតដល់មានអំពើពុករលួយ ក្លែងបន្លំឯកសារសាធារណៈ ប្រើប្រាស់អត្តសញ្ញាណខុសពីអត្តសញ្ញាណផ្លូវការពេលប្រឡង មានន័យថា ទាំងសាលា និងអ្នកគ្រប់គ្រងអាចនឹងពាក់ព័ន្ធក្នុងអំពើក្លែងទាំងនេះ ដូច្នេះទាំងតំណាងអយ្យការ ចៅក្រមស៊ើបសួរសាលាដំបូងរាជធានីភ្នំពេញ មិនគួរដោះលែងក្នុងបទល្មើសនេះ ដែលពុំបានឈានដល់ការបើកការស៊ើបអង្កេតតាមដាន រកឲ្យឃើញជនណាខ្លះ ដែលពាក់ព័ន្ធក្នុងបទល្មើសនេះ។
អ្នកច្បាប់បានលើកឡើងថា ប្រសិនបើចៅក្រមគាត់ដោះលែងជនត្រូវចោទ មានន័យថា ចេញដីកាសម្រេចដាក់ជនត្រូវចោទ ឲ្យស្ថិតក្រោមការត្រួតពិនិត្យតាមផ្លូវតុលាការ អាចជាការត្រឹមត្រូវ ពីព្រោះបទល្មើសដែលមានចែងផ្ដន្ទាទោស ត្រឹម១-៦ខែមិនត្រូវ ដាក់ឃុំជនត្រូវចោទនោះឡើយ។ ប៉ុន្តែបើជាប់ចោទពីបទក្លែងលិខិតសាធារណៈ ដែលជាបទឧក្រិដ្ឋ គឺការដោះលែងមិនអាចធ្វើទៅបាន។ ប៉ុន្តែក្នុងរឿងនេះ ទាំងតំណាងអយ្យការ និងចៅក្រមស៊ើបសួរ គាត់អាចត្រូវរ៉ូវគ្នា ទើបតំណាងអយ្យការចោទទៅលើឈ្មោះសុធា និងគូកន ដែលគេចខ្លួនចោទពីបទ ក្លែងលិខិតសាធារណៈ ហើយជនសង្ស័យដែលសមត្ថកិច្ចឃាត់ខ្លួនចោទពីបទ ប្រើប្រាស់អត្តសញ្ញាណខុសពី អត្តសញ្ញាណផ្លូវការក្នុងកិច្ចការសាធារណៈ បទល្មើសដែលមានចែង ឲ្យផ្ដន្ទាទោសតាមមាត្រា៦២១ នៃក្រមព្រហ្មទណ្ឌ ទើបលោកលី លីបម៉េង ចៅក្រមស៊ើបសួរសាលាដំបូងរាជធានីភ្នំពេញ ចេញដីកាសម្រេចដាក់ឲ្យជនត្រូវចោទ ឲ្យស្ថិតនៅក្រោមការត្រួតពិនិត្យតាមផ្លូវតុលាការ។
ដោយឡែកព្រះរាជអាជ្ញារងលោក វង្ស ប៊ុនវិសុទ្ធ សម្រេចដោះលែងឆៅៗទាំង១២នាក់ ក៏ជារឿងមិនប្រក្រតី បើទោះជាគាត់លើកឡើងថា គ្មានលក្ខណៈសម្បត្តិគ្រប់គ្រាន់សម្រាប់ចោទប្រកាន់ទៅលើជនសង្ស័យទាំង១២នាក់នោះក៏ដោយ។ ម្យ៉ាងវិញទៀត ការដោះលែងមនុស្សប្រព្រឹត្តបែបនេះ ពិតជាបានបង្ហាញឲ្យឃើញថា ទាំងតំណាងអយ្យការ ទាំងចៅក្រមស៊ើបសួរ កំពុងតែដើរច្រាសទិសដៅគ្នាចំពោះការរឹតបន្តឹង ការបំបាត់អំពើពុករលួយរបស់អង្គភាពប្រឆាំងអំពើពុករលួយដែលកំពុងកំណែកទម្រង់និងពង្រឹងរឿងនេះ៕
