ខេត្តត្បូងឃ្មុំ ៖ គេបានរាយការណ៍មកថា សព្វថ្ងៃនេះនាយខណ្ឌជលផលខេត្តត្បូងឃ្មុំ លោក អៀម ម៉ាយ៉ុងរី និង ឧកញ៉ា លឹម ប៊ុណ្ណា កំពុងឃុបឃិតគ្នា បង្កើតឲមានការនាំ ចូល ត្រីឆ្តោ ត្រីរ៉ស់ ត្រីឌៀប ត្រីផ្ទក់ ខុសច្បាប់ តាមច្រកព្រំដែន ស្អំ ក្នុងស្រុកពញាក្រែក ខេត្តត្បូងឃ្មុំ ហើយការនាំចូលត្រីនៅរស់ខុសច្បាប់របស់ក្រុមឈ្មួញទុច្ចរិត ទាំងនេះមិនក្រោម២០តោន នោះទេ ក្នុងមួយថ្ងៃ ដើម្បីយកមកចែកចាយក្នុងប្រទេសកម្ពុជា ។ ចំណែកការនាំចូលប្រភេទត្រីនៅរស់ខុសច្បាប់ទាំងនេះ មិនមានការត្រួតពិនិត្យ និងទប់ស្កាត់ពីជំនាញជលផលស្ថិតក្រោមការគ្រប់គ្រងរបស់លោក អៀម ម៉ាយ៉ុងរី នោះឡើយ ។
សកម្មភាពទាំងនេះត្រូវបានមន្ត្រីជលផលសុំលាក់ឈ្មោះបញ្ជាក់ប្រាប់ថា លោក អៀម ម៉ាយ៉ុងរី គ្រាន់តែដាក់ក្នីគ្នា អង្គុយចាំតែរាប់ក្បាលឡានយកលុយប៉ុណ្ណោះនៅតំបន់ច្រកព្រំដែនស្អំ ។
មន្ត្រីដដែលបានឲ្យដឹងថា ការនាំចូលប្រភេទត្រីនៅរស់ខុសច្បាប់ខាងលើ ដែលកាងដោយឧកញ៉ាខ្នា នេះគឺគេមិនឃើញមានច្បាប់អនុញ្ញាត អ្វីនោះទេគឺឃើញមានតែលិខិតអនុញាតឲ្យប្តូទីតាំងពីខេត្តកំពង់ចាម មកខេត្តត្បូងឃ្មុំ សម្រាប់កន្លែងបែងចែកផលនេសាទក្នុងស្រុកប៉ណ្ណោះ។
មន្ត្រីដដែលបានបញ្ជាក់ឲ្យដឹងថា សម្រាប់ឈ្មួញដែលមានសិទ្ធិនាំចូលត្រីមកលក់ក្នុងស្រុក ហើយបង់ថ្លៃរត់ការទៅឧកញ៉ាខ្នា មានឈ្មោះដូចជា ទី១-ឈ្មោះ ហាត់ តាលី ដឹកមកចែកចាយ ក្នុខេត្តកំពង់ចាម និងក្នុងស្រុកទូទាំងខេត្ត, ទី២-ឈ្មោះ គឹម ជក់ ដឹកមកចែកចាយខេត្តកំពង់ធំ ខេត្តសៀមរាប, ទី៣-ឈ្មោះ សុខ ជា ដឹកមកចែកចាយខេត្តត្បូងឃ្មុំ ពិសេសក្រុងសួងទាំងមូល,ទី៤-ចែ សុវណ្ណនី ដឹកមកចែកចាយខេត្ត ក្រចេះ ស្ទឹងត្រែង ឬភូមិភាគឥសាន្តទាំងមូល។
ទាក់ទង និងបញ្ហានាំចូលប្រភេទត្រីរស់ពីប្រទេសវៀតណាម មកកម្ពុជាខុសច្បាប់នេះ លោក អៀម ម៉ាយ៉ុងរី បានប្រាប់តាមទូរស័ព្ទឲ្យនគរវត្តដឹងរបៀបស្ទាក់ស្ទើរថា រូបលោកដឹង ហើយថាមានករណីនាំចូលប្រភេទត្រីខុសច្បាប់នេះ ប៉ុន្តែរូបលោកមិនទាន់ហ៊ានបង្ក្រាបទេ ចាំសុំគោលការណ៍ទៅខេត្តសិន។
លោកថា ព្រោះជំនាញយើងរស់នៅក្នុងខេត្តត្បូងឃ្មុំ ដូច្នេះត្រូវស្តាប់អភិបាលខេត្តក្នុងនាមខណះបញ្ជារការឯកភាពខេត្ត? ឆ្លើយនិងសំណួរយើងថា ចុះដីការអម របស់ខុទ្ទកាល័យ សម្តេច នាយករដ្ឋមន្ត្រី ហ៊ុន សែន លេខ៣០១ ខន/០១៤ចុះថ្ងៃទី១៣ខែមីនាឆ្នាំ២០១៤ ស្នើសុំទៅសម្តេច អន្តរាគមន៍ទៅក្រសួងកសិកម្ម ហើយចំណារបស់រដ្ឋមន្ត្រីក្រសួងកសិកម្មចុះថ្ងៃទី១៨ ខែមីនា ឆ្នាំ២០១៤ បញ្ជាឲ្យប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល ចុះបង្ក្រាប និងទប់ស្កាត់ការនាំប្រភេទត្រីខុសច្បាប់ខាងលើពីប្រទេសជិតខាង តើលោកមិនគោរពទេឬ?
សំណួរនេះត្រូវបានលោក អៀម ម៉ាយ៉ុងរី ឆ្លើយប្រាប់ក្នុងន័យកន្ទេលធំបន្លំដេកថា លោកគោរពនៅតែគោរព តែលោកធ្វើទៅខ្លាចប៉ះខេត្ត និងឧកញ៉ា ព្រោះយើងដឹងហើយស្រុកខ្មែរធ្វើតែមិនស្រួលមានរឿងហើយ ៕
