ខេត្តកំពង់ធំ ៖ សង្វៀនមាន់ដ៏ធំនៅភូមិ-ឃុំចំបក់ជ្រុំ ស្រុកសន្ទុក ខេត្តកំពង់ធំ អ្នកណាក៏ដឹង អ្នកណាក៏ កោតទទួលស្គាល់ថា ពិតជាមានអំណាចមែន ទាំងសមត្ថកិច្ច អាជ្ញាធរមិនហ៊ានប៉ះពាល់ដោយសារតែ ម្ចាស់សង្វៀនមាន់ត្រូវជាបងបង្កើតរបស់អភិបាលខេត្តកំពង់ធំ ហើយសកម្មភាពល្បែងស៊ីសងនេះ ក៏បានធ្វើឲ្យប្រជាពលរដ្ឋក្នុងមូលដ្ឋាន ស្អប់ខ្ពើមយ៉ាងខ្លាំង ចំពោះអ្នកមានអំណាច មានលុយ ប៉ុន្តែមិនបានគិតគូរ សេចក្តីសុខ ការរស់នៅរបស់ប្រជាពលរដ្ឋ ។ អាជ្ញាធរបានខ្សឹបប្រាប់ថា ម្ចាស់សង្វៀនមាន់ដ៏ធំនេះឈ្មោះ អុត ចាន់បុល មានតួនាទីជាសមាជិកក្រុមប្រឹក្សាស្រុកសន្ទុក និងត្រូវជាបងបង្កើតរបស់លោក អុត សំអន អភិបាលនៃគណៈអភិបាលខេត្តកំពង់ធំ បានបើកដំណើរការជាយូរមកហើយ ក្នុងនោះប្រមូលផ្តុំអ្នកញៀនល្បែងនៅក្នុងស្រុក ពីខេត្តផ្សេងៗយ៉ាងច្រើនកុះករ ស្រែកកងរំពង រំខានដល់ការរស់នៅប្រចាំថ្ងៃរបស់ប្រជាពលរដ្ឋនៅក្បែរៗនោះ ។ សមត្ថកិច្ចមូលដ្ឋាននិយាយថា គ្មានអ្នកណាហ៊ានចាត់វិធានការទេ ទី១-លោក អុត ចាន់បុល ក៏មានតួនាទីជាសមាជិកក្រុមប្រឹក្សាស្រុក ទី២-គាត់ក៏ត្រូវជាបងបង្កើតរបស់លោកអភិបាលខេត្តកំពង់ធំ ម្ល៉ោះហើយទាំងសមត្ថកិច្ច និងអាជ្ញាធរមូលដ្ឋានមិនហ៊ានទៅអើតខ្លាចគំនាបថ្នាក់លើ និងប៉ះពាល់តួនាទីជាដើម ។ ប្រជាពលរដ្ឋនិយាយថា ឯណាទៅពាក្យថា ភូមិ-ឃុំមានសុវត្ថិភាព? បើអាជ្ញាធរជាអ្នកដឹកនាំអនុវត្តគោលនយោបាយនេះ បែរជាងុបងល់នឹងបនល្បែងទៅវិញ? ការពិតបទល្មើសបានផ្តើមចេញពីប្រភពនៃបនល្បែងស៊ីសង ដូច្នេះលោក អុត សំអន អភិបាលនៃគណៈអភិបាលខេត្តកំពង់ធំ ដែលជាគណៈបញ្ជាការឯកភាពខេត្តផងនោះ គួរជួយលុបបំបាត់បង្ក្រាបបនល្បែង ពិសេសសង្វៀនមាន់បង់របស់គាត់ មិនត្រូវទុកឲ្យរងនូវការរិះគន់ពីប្រជាពលរដ្ឋ សមត្ថកិច្ច អាជ្ញាធរមូលដ្ឋាននោះឡើយ ។ បើទោះជាមានការលើកឡើងបែបនេះក៏ដោយនគរវត្តមិនអាចទាក់ទងបានទេពីលោក អុត ចាន់បុល មេសង្វៀនមាន់ ក៏ដូចជាលោកអុត សំអន អភិបាលនៃគណៈអភិបាលខេត្តកំពង់ធំ កាលពីព្រឹកថ្ងៃទី២ ខែឧសភា ឆ្នាំ២០១៥ ដោយគ្មានលេខទូរស័ព្ទ ៕
