ខេត្តកំពង់ចាម៖ ការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ចាមបានសហការណ៍នឹងបង្ក្រាបករណីរក្សាទុកនិងជួញដូរដោយខុសច្បាប់នូវសារធាតុញៀនបាន២ករណីកាលពីថ្ងៃទី៩ ខែសីហា ឆ្នាំ២០១៥ វេលាម៉ោង៤និង៣០នាទីរសៀលនៅចំណុចទួលស្នួលខាងកើត ភូមិក្សេរ ឃុំព្រែករំដេង ស្រុកស្រីសន្ធរ ខេត្តកំពង់ចាម ។
កម្លាំងអធិការនគរបាលស្រុកស្រីសន្ធរសហការជាមួយកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ចាមបានបង្ក្រាបករណីរក្សាទុកនិងជួញដូរគ្រឿងញៀនចំនួន១ករណីហើយបានឃាត់ខ្លួនជនសង្ស័យចំនួនម្នាក់ឈ្មោះ ផេង ឡេងហ៊ាប ភេទប្រុស អាយុ២២ឆ្នាំ ជនជាតិខ្មែររស់នៅភូមិក្សេរ ឃុំព្រែករំដេង ស្រុកស្រីសន្ធរ ខេត្តកំពង់ចាម។ វត្ថុតាងដែលដកហូតបានមានថ្នាំញៀនចំនួន៣កញ្ចប់តូច ម៉ូតូម៉ាកវ៉េវមួយគ្រឿង ទូរស័ព្ទដៃម៉ាកណូគាចុចពិលចំនូន២គ្រឿង ។
នៅថ្ងៃទី១១ ខែសីហា ឆ្នាំ២០១៥ វេលាម៉ោង១៧និង០០នាទីនៅចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ដឹកនាំដោយលោក វរសេនីយ៍ទោ សោម រស់ នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ចាមបានសហការជាមួយកម្លាំងអធិការស្រុកស្ទឹងត្រង់ចុះបង្ក្រាបករណីរក្សាទុក និងដឹកជញ្ជូនដោយខុសច្បាប់នូវសារធាតុញៀនដោយឃាត់ខ្លួនជនសង្ស័យ០១នាក់ឈ្មោះ យ៉ន អ៊ីវ៉ា ភេទប្រុស អាយុ២៣ឆ្នាំ ជនជាតិខ្មែរ រស់នៅភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ជាលទ្ធផលរឹបអូសបានថ្នាំញៀនប្រភេទក្រាមពណ៌សចំនួន៤កញ្ចប់ ប្រាក់ញុះញង់ចំនួន២០.០០០០រៀល អាវុធខ្លីម៉ាកK៥៤ចំនួន០១ដើមមានគ្រាប់១០គ្រាប់អាវុធមានលេខ៣០០០១២២២ ពូថៅដៃចំនួន១ និងឧបករណ៍សេពគ្រឿងញៀនមួយចំនួនទៀត ។
បច្ចុប្បន្នជនសង្ស័យទាំង២នាក់កម្លាំងជំនាញការិយាល័យប្រឆាំងគ្រឿញកំពុងកសាងសំណុំរឿងបញ្ជូនទៅសាលាដំបូងខេត្តកំពង់ចាមដើម្បីចាត់ការតាមច្បាប់ ៕
ដោយ៖ ហេង នរិន្ទ្រ
