ហេតុការណ៍ផ្ទុះដែលមានកម្លាំងខ្លាំង២លើកបានកើតឡើងបន្ទាប់មកក្លាយទៅជាអគ្គិភ័យស្ថិតនៅក្នុងតំបន់ឧស្សាហកម្មនៃទីក្រុងកំពង់ផែ Tianjin ភាគឦសានប្រទេសចិនបណ្តាលឲ្យស្លាប់មនុស្ស១៧នាក់ និងរងរបួស៤០០នាក់ ។ នេះបើតាមការផ្សព្វផ្សាយរបស់បណ្តាញព័ត៌មានចិន China Daily ។
វេដីអូដែលផ្សព្វផ្សាយនៅលើគេទំព័រព័ត៌មានរបស់ចិនបានបង្ហាញឲ្យឃើញថា អគ្គិភ័យកំពុងឆាបឆេះយ៉ាងសន្ធោសន្ធៅបាញ់ផ្សែងទៅលើលំហអាកាសខ្ពស់រាប់រយម៉ែត្រ ។ នៅជិតកន្លែងឆេះនោះមានអគារខ្ពស់២អមសងខាង ។ ពលរដ្ឋ បុគ្គលិកកម្មករដែលនៅទីនោះបាននាំគ្នារត់គេចខ្លួន អ្នកខ្លះបែបន់ស្វែងរកការជួយពីព្រះជាម្ចាស់ ។
បណ្តាញព័ត៌មានចិន CCTV បានផ្សព្វផ្សាយថា ហេតុការណ៍ផ្ទុះបង្កទៅជាអគ្គិភ័យបានកើតឡើង អំឡុងពេលដែលមានការដឹកជញ្ជូនជាតិផ្ទុះ(រំសេវធ្វើកាំជ្រួច)នៅវេលាម៉ោង១១និង៣០នាទីយប់ ម៉ោងនៅក្នុងតំបន់ ថ្ងៃទី១២ ខែសីហា ។ ហេតុការណ៍ផ្ទុះនេះមានកម្លាំងខ្លាំងធ្វើឲ្យកម្រើកញាប់ញ័រ និងជះចំហាយក្តៅជិត១គីឡូម៉ែត្រ ។
ទីភ្នាក់ងារព័ត៌មានស៊ីនហួបានបញ្ជាក់ថា ក្រោយពីហេតុការណ៍ផ្ទុះទី១កើតឡើងបានរយៈពេល៣០នាទី ស្រាប់តែមានហេតុការណ៍ផ្ទុះមួយទៀតកើតឡើង ។
សាក្សីឃើញហេតុការណ៍ផ្ទាល់ភ្នែកម្នាក់ឈ្មោះ Monica Andrews ជនជាតិកាណាដា និងជាគ្រូបង្រៀនផងនោះបានបញ្ជាក់ថា អ្នកស្រីមើលចេញទៅខាងក្រៅតាមបង្អូចទៅលើអាកាសឃើញផ្ទៃមេឃពណ៌ក្រហមឆ្អៅតែម្តង ។ អ្នកស្រីបានមើលឃើញហេតុការណ៍ផ្ទុះលើកទី២ ហើយមានសភាពវឹកវរចលាចល មនុស្សគ្រប់គ្នារត់ចាកចេញពីអគារ លំនៅឋានរៀងៗខ្លួនដោយស្មានថា ជាការរញ្ជួយដី ។ រថយន្តចាប់ផ្តើមប្រជៀតគ្នាចាកចេញ ។ អ្នកស្រីបញ្ជាក់ថា ហេតុការណ៍ផ្ទុះឆេះអីកាចសាហាវម៉េះ ។
ទីភ្នាក់ងារស៊ីនហួបានបញ្ជាក់ថា ហេតុការណ៍ផ្ទុះឆេះនេះបណ្តាលឲ្យឆេះឃ្លាំងស្តុកទំនិញដែលគ្រោះថ្នាក់ដល់សុខភាពផងដែរ ។ ហេតុការណ៍ផ្ទុះលើកដំបូងមានម្សៅជាតិផ្ទុះTNT ប្រមាណ៣តោន ។ ចំណែកហេតុការណ៍ផ្ទុះលើកទីមានម្សៅជាតិផ្ទុះប្រមាណ២១តោន ។
ពលរដ្ឋដែលរស់នៅជិតកន្លែងកើតហេតុបានប្រាប់ប្រភពព័ត៌មានថា ឥទ្ធិពលផ្ទុះមានកម្លាំងខ្លាំងរហូតធ្វើឲ្យបាក់បែកបង្អូច និងខូចខាតអគារថែមទៀតផង ។ មនុស្សជាច្រើននាក់បានរងរបួសដោយសារតែកញ្ចក់បង្អូច និងថ្មនៃអគារបាក់បែកខ្ទាតត្រូវទៅចំ។ ប្រភពព័ត៌មាន CCTV បានបញ្ជាក់ថា រថយន្តប្រមាណ១០០គ្រឿងត្រូវភ្លើងឆាបឆេះ ៕
ប្រែសម្រួល៖ យ៉ាត
