ភ្នំពេញ៖ សមត្ថកិច្ចនគរបាលប៉ុស្ត៍ទឹកថ្លា បានឃាត់ខ្លួនមេឆ្នោតល្បែងសីុសងកន្ទុយលេខម្នាក់ និងដកហូតបានលុយខ្មែរនិងលុយអាមេរិកបានចំនួនជិត៥០០០ដុល្លាររួមទាំងវត្ថុតាងប្រព្រឹត្តបទល្មើសជាច្រើនទៀត កាលពីព្រឹកម្សិលមិញ ថ្ងៃទី១៨ ខែធ្នូ ឆ្នាំ២០១៦ នៅចំណុចភូមិទឹកទឹកថ្លា សង្កាត់ទឹកថ្លា ខណ្ឌសែនសុខ។
ជនដែលឃាត់ខ្លួននោះមានឈ្មោះ តាំង ហុក ភេទប្រុស អាយុ៤០ឆ្នាំ មានទីលំនៅ ភូមិដំណាក់ធំ សង្កាត់ស្ទឹងមានជ័យ ខណ្ឌ
មានជ័យ រាជធានីភ្នំពេញ។
លោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខបានឲ្យដឹងថា មុននិងឃាត់ខ្លួនជនសង្ស័យរូបនេះគឺលោកបានដឹកនាំកម្លាំងធ្វើការល្បាតក្នុងមូលដ្ឋាន លុះទៅដល់ចំណុចខាងលើក៏ឃើញជននេះកំពុងអង្គុយក្នុងដីឡូតិ៍វាលមួយកន្លែងដោយមានការសង្ស័យបានហៅសួរនាំ និងឆែកឆេរហើយក៏ឃើញមានក្រដាសសម្រាប់កត់កន្ទុយលេខមួយចំនួន និងមានប្រាក់ជាច្រើនទើបលោកបញ្ជាឲ្យឃាត់ខ្លួនយកមកធ្វើការសាកសួរនៅអធិការដ្ឋានខណ្ឌសែនសុខតែម្តង។
ក្នុងនោះសមត្ថកិច្ចបានដកហូតម៉ូតូ១គ្រឿង និងក្រដាសឯកសារកត់ត្រាលេខឆ្នោតប្រភេទកន្ទុយលេខមួយចំនួន, លុយខ្មែរចំនួន៥លាន៧សែនរៀល(៥៧០០០០០៛) ,លុយដុល្លារចំនួន៣៤១២ដុល្លារ ($3412) ទៀត។
ជនជាប់ចោទរូបនេះត្រូវបានបញ្ជួនទៅកាន់នគរបាលព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញដើម្បីកសាងឯកសារបញ្ជូនទៅតុលាការផ្តន្ទាទោសតាមច្បាប់៕
ដោយ៖ តុង សីហា
