កាលពីថ្ងៃទី១៣ ខែសីហា ឆ្នាំ២០១៥ កូរ៉េខាងជើងបានរិះគន់យ៉ាងខ្លាំងក្លាទៅលើការធ្វើសមយុទ្ធរបស់កម្លាំងទាហានរាប់ពាន់នាក់របស់កូរ៉េខាងត្បូង និងអាមេរិកស្ថិតនៅតាមបន្ទាត់ព្រំដែនកូរ៉េខាងត្បូង ដោយកូរ៉េខាងជើងអះអាងថា នោះជាសកម្មភាពបង្កសង្គ្រាម ។ កូរ៉េខាងជើងបានគំរាមបាញ់ប្រហារតាមដែនអាកាសទៅកាន់ទីក្រុងសេអ៊ូល និងសេតវិមាន ថែមទៀតផង ។
សមយុទ្ធកម្លាំងយោធារួមមានរយៈពេល២សប្តាហ៍ដែលមានឈ្មោះថា Ulchi Freedom បានចាប់ផ្តើមធ្វើឡើងកាលពីថ្ងៃទីចន្ទ ទី១០ ខែសីហា ។ សមយុទ្ធនេះមានការចូលរួមពីកងកម្លាំងយោធារាប់ពាន់នាក់ និងពីគ្រប់ផ្នែកពាក់ព័ន្ធទាំងអស់ ដែលជាសកម្មភាពមួយត្រៀមលក្ខណៈទប់ទល់ការលុកលុយឈ្លានពានពីកូរ៉េខាងជើង ។ នេះជាការធ្វើសមយុទ្ធទ្រង់ទ្រាយធំមួយដែលទីក្រុងសេអ៊ូល និងទីក្រុងវ៉ាស៊ីនតោនតែងតែបានធ្វើឡើងជាប្រចាំ ។ ពួកគេអះអាងថា ការធ្វើសមយុទ្ធទាំងនេះមានលក្ខណៈការពារខ្លួនតែប៉ុណ្ណោះ ប៉ុន្តែទីក្រុងព្យុងយ៉ាងបានថ្កោលទោសយ៉ាងខ្លាំងដល់សកម្មភាពធ្វើសមយុទ្ធទាំងនេះ ហើយបានព្រមានថាពីការបាញ់ប្រហារដោយប្រើអាវុធមហាប្រល័យលោកនុយក្លេអ៊ែរទៀតផង ។
ការធ្វើសមយុទ្ធរួមដែលមានឈ្មោះថា Ulchi Freedom នៅក្នុងឆ្នាំនេះបានកើតឡើងចំពេលដែលកំពុងមានស្ថានការតានតឹងខ្លាំងឡើងនៅឧបទ្វីបកូរ៉េ បន្ទាប់ពីមានការលួចកប់គ្រាប់មីនបណ្តាលឲ្យផ្ទុះនៅតាមបន្ទាត់ព្រំដែនកូរ៉េខាងត្បូង ខណៈដែលមានការដើរល្បាតរបស់កងកម្លាំងការពារព្រំដែន ហើយដែលទីក្រុងសេអ៊ូលចាត់ទុកថា ជាទង្វើរបស់កូរ៉េខាងជើងនោះ ។
គណៈកម្មាធិការសន្តិភាព និងបង្រួបបង្រួមកូរ៉េខាងជើង (CPRK) ដែលជាគណៈកម្មាធិការមួយត្រួតពិនិត្យមើលទូទៅបញ្ហាទាំងឡាយឆ្លងកាត់តាមព្រំដែនបានចេញសេចក្តីថ្លែងការណ៍មួយដោយថ្កោលទោសទៅលើការធ្វើសមយុទ្ធ Ulchi Freedom នេះ ។ CPRK បានចាត់ទុកសមយុទ្ធនេះថាជាការបង្កសង្គ្រាមនុយក្លេអ៊ែរប្រឆាំងជាមួយកូរ៉េខាងជើង ។
សេចក្តីថ្លែងការដដែលនេះបញ្ជាក់ថា សមយុទ្ធយោធារួមទ្រង់ទ្រាយធំបែបនេះ ជាការប្រកាសសង្គ្រាមមួយយ៉ាងពិតប្រាកដ និងឆាបរហ័សបំផុត ។ ការប៉ះទង្គិចជាយថាហេតុដោយកងកម្លាំងធាអាចនឹងកើតឡើង ហើយការប៉ះទង្គិចនោះកាន់តែទ្រង់ទ្រាយធំហួសពីការគ្រប់គ្រង ដោយសារតែសកម្មភាពសមយុទ្ធនេះ ។
ប្រភពបន្តថា អាមេរិក និងកូរ៉េខាងត្បូងគួរតែដឹងហើយថា សកម្មភាពរបស់ពួកគេទាំងនេះជាការបង្ករឿងដ៏ធំធេងបំផុត ហើយកុំភ្លេចថា សេតវិមាន និងវិមានពណ៌ខៀវរបស់ប្រធានាធិបតីក្នុងទីក្រុងសេអ៊ូល គឺជាគោលដៅនៃកាំជ្រុចមីស៊ីលប្រភេទUltra-precision របស់កូរ៉េខាងជើងឲ្យសោះ ៕
ប្រែសម្រួល៖ យ៉ាត
