ខេត្ដតាកែវ៖ នគរបាលប៉ុស្ដិ៍ស្មោង រួមនឹងនគរបាលស្រុកទ្រាំង ខេត្ដតាកែវ បានឃាត់ខ្លួនជនសង្ស័យម្នាក់ក្រោយពី រូបគេបានដុតបំផ្លាញផ្ទះបាយរួមនឹង បំផ្លិចបំផ្លាញទ្រព្យសម្បត្ដិមួយចំនួនទៀត កាលពីថ្ងៃទី១១ ខែសីហា ឆ្នាំ២០១៥ វេលាម៉ោង៩យប់ ។
បើតាមប្រភពព័ត៌មានពីនគរបាល ស្រុកទ្រាំងដែលចុះប្រតិបត្ដិការឃាត់ខ្លួន ជនសង្ស័យបានឱ្យដឹងថា ជនសង្ស័យ ឈ្មោះ សង ភារម្យ អាយុ២៧ឆ្នាំ មុខ របរមិនពិតប្រាកដ រស់នៅភូមិត្រញំង ជ្រៃ ឃុំស្មោង ស្រុកទ្រាំង ។
នៅមុនពេល កើតហេតុវេលាម៉ោង៩យប់ថ្ងៃទី១១ ខែ សីហា ឆ្នាំ២០១៥ ជនសង្ស័យពេល ត្រឡប់មកពីផឹកស្រាវិញក៏បានរករឿង ឈ្លោះប្រកែកជាមួយជីដូនបង្កើតរបស់ ឈ្មោះ សុខ សង្វាន ហៅសែន អាយុ៧៦ ឆ្នាំ ដោយសារខឹងមិនទុកលុយឱ្យចាយ ពីព្រោះរូបគេគ្មានលុយទិញអង្ករដាំបាយ ហូប ព្រមទាំងផ្ដាច់ភ្លើងផងដែរ ។ គាប់ ជួនពេលនោះជីដូនឈ្មោះ សុខ សង្វាន មិននៅផ្ទះផងនោះទើបធ្វើឱ្យជនសង្ស័យ កាន់តែក្រេវក្រោធខ្លាំងឡើងក៏បានយក ដែកកេះដុតសំយាបផ្ទះបាយបណ្ដាលឱ្យ ឆេះមួយចំហៀង ទូរទស្សន៍មួយគ្រឿង កង្ការបញ្ឈរមួយ វិទ្យុមួយគ្រឿង និង សម្ភារមួយចំនួនទៀត ។
សមត្ថកិច្ចបានបន្ដទៀតថា ក្រោយ ពេលទទួលបានព័ត៌មានករណីធ្វើឱ្យខូច ខាតដោយចេតនាទ្រព្យសម្បត្ដិរបស់អ្នក ដទៃរួចមកសមត្ថកិច្ចក៏បានចុះទៅដល់ កន្លែងកើតហេតុក៏ឃាត់ខ្លួនជនសង្ស័យ យកមកកាន់អធិការដ្ឋាននគរបាលដើម្បី កសាងសំណុំរឿងតាមនីតិវិធី ៕
ដោយ៖ ជីសូរកា