ភ្នំពេញ៖ អ្នកមេម៉ាយចាយរាងសំនៀង ក្រអួន ឈួន សុវណ្ណឆៃ បានធ្វើឲ្យអ្នកចូលរួមពិធីមង្គលការអ្នកនាងប៉េងប៉ោងភ្ញាក់ផ្អើលខ្លាំងព្រោះតែតារាស្រីរូបនេះបានគ្រងនូវសម្លៀកបំពាក់ដ៏ស្រស់ស្អាត ជាមួយនឹងគ្រឿងមាសឆ្នៃយ៉ាងប្រណិតតាមក្បាច់បុរាណខ្មែរ ប្រមាណជិត៥០ដំឡឹងមាស។ ការគ្រងម៉ូដមាសស្រោចខ្លួននេះធ្វើឲ្យតារាស្រីរូបនេះលេចធ្លោរខ្លាំងនិងធ្វើឲ្យចូលរួមសំឡឹងមើលនាងគ្រប់ៗគ្នា។
ខុសប្លែកពីលើកមុនៗដែលតារាចម្រៀង ឈួន សុវណ្ណឆៃ ឆ្នៃគ្រឿងពេជ្រពាក់នៅនឹងខ្លួន គឺលើកនេះ នាងបានតម្រូវឲ្យជាងដ៏ល្បីមួយនៅជិតវត្តកោះច្នៃម៉ូដគ្រឿងមាសប្រណីតស្រស់ស្អាត។ នាងលើកឡើងថា គ្រឿងមាសរបស់នាងត្រូវបានច្នៃដោយក្រុមអ្នកជំនាញផ្នែកគ្រឿងមាស និងប្រាក់ដ៏មានទឹកដៃសម្រាប់ខ្សែរាជវង្ស។ នាងបញ្ជាក់ថា ឈុតគ្រឿងមាសរបស់នាងច្នៃដោយក្បាច់ភ្ញីពីបុរាណដែលមើលមកមិនដូចការច្នៃរបស់ជាងនានា ដែលមានទាំងកាបូប ខ្សែក្រវ៉ាត់ ក្រវឹល ចិញ្ចៀន ខ្សែក កងដៃជាដើម។ តារាស្រីរូបនេះលើកឡើងថា ក្នុងមួយឈុតនោះរួមមាន ខ្សែក-ក្រវិលទម្ងន់ជាង៨ដំឡឹង ខ្សែក្រវាត់ទម្ងន់២៦ដំឡឹង កាបូបដៃទម្ងន់១១ដំឡឹង និងចិញ្ចៀនដាំត្បួងរួមជាមួយកងដៃ មានទម្ងន់ជាង២ដំឡឹង។ អ្នកនាងថា មួយឈុតនេះមានទម្ងន់សរុបជាង៤៧ដំឡឹង ហើយជាថវិកាដែលបានពីការលក់ជ្រូកសុទ្ធសាធ ដោយមិនមានអ្នកណាជួយពីក្រោយនោះទេ។ បើទោះបីជាពាក់មាសស្ទើរស្រោចខ្លួនក្តីក៏តារាស្រីរូបនេះមិនបានព្រួយបារម្ភពីរឿងសុវត្ថិភាពនោះទេ ដោយសារតែអ្នកនាងមិនបានពាក់សម្ញ៉ែងគ្រឿងមាសទាំងនោះខុសពីចូលក្នុងកម្មវិធីផ្លូវការសំខាន់នោះទេ។
នាងបញ្ជាក់ដែរថា មូលហេតុដែលនាងសម្រេចចិត្តលេងឈុតមាសជំនួសឈុតគ្រឿងត្បូងព្រោះមាសងាយនឹងធ្វើការលក់ដូរវិញដោយមិនប្រឈមនឹងការខាតបង់ច្រើនដូចគ្រឿងពេជ្រ ពិសេសគ្រឿងមាសនេះច្នៃដោយជាងខ្មែរមានជំនាញ និងបង្កប់ដោយអត្ថន័យលើកតំកើងស្នាដៃសិល្បៈខ្មែរផងដែរ។ ប្រសិនបើគេគិតពីតម្លៃវិញគឺមិនក្រោម៧ម៉ឺនដុល្លារអាមេរិកទេសម្រាប់គ្រឿងមាស មួយឈុតនេះ។ នាងនិយាយបែបលេងសើចថា ក្រោយប្រមូលជ្រូកលក់នាងអាចទិញគ្រឿងមាសនេះបានហើយក៏ងាយនឹងបង្វិលលក់វិញដែរប្រសិនបើត្រូវការលុយចាំបាច់វិញ៕
ដោយ៖ វឌ្ឍនា
