ភ្នំពេញ៖ ស្ត្រីម្នាក់គិតខ្លីមិនចង់រស់បានសម្រេចចិត្តលោតពីលើផ្ទះជួលកម្ពស់២ជាន់ ទៅទើរលើដំបូលសំយាបសង្ក័សីបណ្តាលឲ្យរងរបួសស្រាល ដែលករណីនេះគេសង្ស័យថាព្រោះតែតូចចិត្តនឹងប្តីផឹកស៊ីស្រវឹងពូកែប្រចណ្ឌពេក។
ហេតុការណ៍នេះបង្កឲ្យភ្ញាក់ផ្អើលកាលពីវេលាម៉ោង១០និង៣០នាទីយប់ថ្ងៃទី១៤ ខែសីហាឆ្នាំ ២០១៥ នៅបន្ទប់ជួលលេខ៥ ជាន់ទី២ ស្ថិតនៅភូមិដំណាក់ធំ២ ផ្លូវបេតុង សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
ប្រជាពលរដ្ឋរស់នៅក្បែរកន្លែងកើតហេតុបាននិយាយថា ស្រ្តីដែលលោតសម្លាប់ខ្លួនមិនបានសម្រេចនេះមិនស្គាល់ឈ្មោះទេគ្រាន់តែដឹងថា មានអាយុជាង៣០ឆ្នាំនិងធ្វើការអ្នកម៉ាស្សាកោសជប់ មានប្តីជាកម្មករសំណង់ ស្នាក់នៅផ្ទះជួលកើតហេតុខាងលើ ។
ប្រជាពលរដ្ឋបានឲ្យដឹងទៀតថា ពួកគាត់មិនសូវស្គាល់ពីរនាក់ប្តីប្រពន្ធខាងលើ នេះទេ ដោយសារតែពួកគេទៅធ្វើការបាត់ៗពេលយប់ទើបឃើញមកវិញចូលបន្ទប់បិទទ្វារជិត។ កន្លងមកប្តី ប្រពន្ធនេះតែងតែឈ្លោះប្រកែកគ្នា ជាញឹកញាប់ ដោយសារតែបុរសជាប្តីប្រចណ្ឌប្រពន្ធធ្វើជាស្រីម៉ាស្សា ។
លុះដល់ម៉ោងកើតហេតុពេលដែលបន្ទប់នេះមានការផឹកស៊ីជាមួយមិត្តភក្តិ ៤នាក់រួមនឹងប្តីប្រពន្ធនិងបងប្អូនជីដូនមួយប្រុសស្រី២នាក់ទៀតផងហើយគ្រាដែល ពួកគេត្រឡប់ទៅផ្ទះអស់ នៅសល់តែ២នាក់ប្តីប្រពន្ធ ស្រាប់តែប្រពន្ធលោតពីលើផ្ទះជាន់ទី២លាន់សូរគ្រាំងធ្វើឲ្យអ្នក ជិតខាងនាំគ្នារត់ចេញក្រៅផ្ទះមកមើលឃើញស្រ្តីជាប្រពន្ធនៅ ទើលើដំបូលសំយាបសង្ក័សីជាន់ក្រោម ធ្វើឲ្យផុងសង្ក័សីមួយសន្លឹករបួសស្រាលតែសំណាងល្អមិនបានធ្លាក់ទៅដល់ដី ហើយក្រោយមកស្រី្តជាប្រពន្ធ ត្រូវបានគេគ្រាហ៍ចូលទៅក្នុងផ្ទះតែមិនបានបញ្ជូនទៅមន្ទីរពេទ្យទេព្រោះយល់ថារបួសស្រាលហើយសុខចិត្តនៅពួនសំងំក្នុងបន្ទប់ជួលទាំងពីរនាក់ដោយទំនងជាខ្មាសអ្នកជិតខាង ៕
ដោយ៖ ប្រាថ្នា
