ភ្នំពេញ៖ ជនសង្ស័យប្រុសស្រី វ័យក្មេងចំនួន៨នាក់ ត្រូវបានកម្លាំងនគរបាលព្រហ្មទណ្ឌខណ្ឌមានជ័យ សហការជាមួយនគរបាលប៉ុស្តិ៍រដ្ឋបាលសង្កាត់ស្ទឹងមានជ័យ ធ្វើរដ្ឋបាលឃាត់ខ្លួនបាន ដកហូតថ្នាំញៀនចំនួន៣៤កញ្ចប់ធំនិងតូច រួមនិងឧបករណ៍សម្រាប់ធ្វើសកម្មភាពមួយចំនួន។ ប្រតិបត្តិការបង្ក្រាបនេះបានធ្វើឡើងកាលពីវេលាម៉ោង ៩ និង៣០នាទី ព្រឹកថ្ងៃទី៥ ខែកុម្ភៈ ឆ្នាំ២០១៧ ស្ថិតនៅចំណុចបន្ទប់ផ្ទះជួលលេខ១០៥ ជាន់ទី១ ផ្លូវលំ ក្រុម៤ ភូមិដំណាក់ធំ៤ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
លោក ម៉ៅ សាវឿន នាយប៉ុស្តិ៍នគរបាលរដ្ឋបាលសង្កាត់ស្ទឹងមានជ័យ បានឲ្យដឹងថា មុននឹងឈានដល់ការចាប់ខ្លួនបានជនស្ស័យខាងលើ ដោយទទួលបានបញ្ជាដោយផ្ទាល់ពីលោកវរសេនីយ៍ឯក តេង ស៊ីណូ អធិការនគរបាលខណ្ឌមានជ័យ រួចមកទើបកម្លាំងនគរបាលជំនាញខណ្ឌមានជ័យ ដឹកនាំដោយលោក ហួរ ម៉េង វ៉ាង អធិការរងទទួលបន្ទុកផែនយុត្តិធម៌នគរបាលខណ្ឌមានជ័យ សហការជាមួយនិងនគរបាលប៉ុស្តិ៍ស្ទឹងមានជ័យ រួមនិងអាជ្ញាធរមូលដ្ឋាន ចុះធ្វើរដ្ឋបាលត្រង់បន្ទប់ជួលខាងលើ។
ជាក់ស្តែងនៅក្នុងប្រតិបត្តិការបង្ក្រាបនេះដែរ សមត្ថកិច្ចធ្វើការឃាត់ខ្លួនបានជនសង្ស័យប្រុសស្រីចំនួន៨នាក់ ក្នុងនោះមានស្រីចំនួន៤នាក់ ប្រុស៤នាក់ ដែលសុទ្ធសឹងតែស្ថិតក្នុងវ័យក្មេងធ្វើការនៅក្នុងក្លឹបកម្សាន្ត ដកហូតបានថ្នាំញៀនចំនួន ៣៤កញ្ចប់ ក្នុងនោះមាន ២៨កញ្ចប់តូច និង៦កញ្ចប់ធំ រួមនិងជញ្ជីងថ្លឹងគ្រឿងញៀនចំនួន២ផងដែរ។
បច្ចុប្បន្នជនសង្ស័យទាំង៨នាក់ រួមនិងវត្ថុតាង ត្រូវបានសមត្ថកិច្ចនាំខ្លួនមកកាន់ប៉ុស្តិ៍នគរបាលរដ្ឋបាលសង្កាត់ស្ទឹងមានជ័យ ដើម្បីសាកសួរ និងបញ្ជូនខ្លួនមកកាន់អធិការដ្ឋាននគរបាលខណ្ឌមានជ័យ ដើម្បីឃាត់ខ្លួនបណ្តោះអាសន្ន និងកសាងសំណុំរឿងបញ្ជូនខ្លួនទៅកាន់ តុលាការចាត់ការតាមផ្លូវច្បាប់៕ តាឡឹម
