ភ្នំពេញ៖ បុរសមា្នក់បើករថយន្តកម៉ាកឡិចស៊ីស GX470 ទាំងស្រវឹងជោគជាំរេចង្កូតទៅបុកក្បាលនាគពុះចែកទ្រូងផ្លូវបាក់អស់៤កង់ខ្ទាតទៅកណ្តាលថ្នល់ត្រូវរថយន្តកាមរីឆ្លាមមួយគ្រឿងទៀតដែលបើកមកពីក្រោក៏ចាប់ហ្រ្វាំងមិនទាន់បើកបុកក្បាលនាគនោះធ្វើឲ្យខូចខាតរថយន្ត។ ហេតុកាលនេះកើតឡើងកាលពីវេលាម៉ោង១២និង៣០នាទីរំលងអាធ្រាត្រឈានចូលថ្ងៃទី១៩ខែសីហាឆ្នាំ២០១៥ ក្បែរស្តុបវត្តមហាមន្ត្រី តាមបណ្ដោយផ្លូវមហាវិថីព្រះសីហនុ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។
បើតាមប្រភពព័ត៌មានឲ្យដឹងថា មុនពេលកើតហេតុគេឃើញបុរសម្នាក់បើករថយន្តបង្កម៉ាកឡិចស៊ីស GX470 ពណ៌ទឹកប្រាក់ ពាក់ស្លាកលេខ ភ្នំពេញ2AE-3738បើកបរតាមបណ្ដោយផ្លូវមហាវិថីព្រះសីហនុ ក្នុងទិសដៅពីកើតទៅលិច ក្នុងស្ថានភាពស្រវឹងស្រាជោកជាំហើយបើកយ៉ាងលឿនមកដល់ចំណុចកើតហេតុស្រាប់តែរេចង្កូតពេញផ្លូវក៏បាន ទៅបុកក្បាលនាគពុះចែកទ្រូងផ្លូវបាក់អស់មួយកង់ហើយរថយន្តនៅមិនទាន់អស់ល្បឿនក៏បានខ្ទាតទៅកណ្តាលថ្នល់ ហើយរថយន្តបានរេចង្កូតទៅបុកទ្រូងពុះចែកផ្លូវបាក់អស់៣កង់ទៀតធ្វើឲ្យរថយន្តដាច់កង់មុខចំហៀងខាងឆ្វេងទៅមុខលែងរួច។
ស្របពេលនោះស្រាប់តែមានរថយន្តម៉ាកកាមរីឆ្លាមមួយគ្រឿងទៀត ពណ៌ខ្មៅ ពាក់ស្លាកលេខ ភ្នំពេញ2-M9964 ជិះគ្នា២នាក់ស្រីម្នាក់និងប្រុសម្នាក់ ដែលជាអ្នកបើកបរ ធ្វើដំណើរក្នុងទិសពីលិចទៅកើតក្នុងល្បឿនយ៉ាងលឿនដូចគ្នាហើយចាប់ហ្រ្វាំងមិនទាន់ស្រាប់តែរេង្កូតជ្រុលទៅបុកក្បាលនាគដែលខ្ទាតមកកណ្តាលផ្លូវបណ្តាលឲ្យរថយន្តឆ្លាមខ្ទេចផ្នែកខាងមុខទាំងស្រុងតែសំណាងល្អមិនបណ្តាលឲ្យមនុស្សរងរបួសនោះទេ ។
ក្រោយពេលកើតហេតុអ្នកបើករថយន្តកាមរីឆ្លាមបានបើកទ្វាររថយន្តចេញទៅបាត់ទុកនៅសល់តែស្រីម្នាក់ និងមានសាច់ញាតិមកដល់មិនបានទាមទារសំណងពីរថយន្តឡិចស៊ីសទេ សុខចិត្តយក រថយន្តទៅជួសជុលដោយខ្លួនឯង ។ ចំណែករថយន្តបង្កនិងអ្នកបើកបរ ត្រូវបានសមត្ថកិច្ចបញ្ជូនទៅកាន់ការិយាល័យនគរបាលចរាចរណ៍ផ្លូវគោក រង់ចាំធ្វើការដោះស្រាយតាមច្បាប់ ៕
...
ដោយ៖ ស រស្មី
