ភ្នំពេញ៖ កម្លាំងអាវុធហត្ថខណ្ឌទួលគោកសហការជាមួយអាវុធហត្ថរាជធានីភ្នំពេញ បានចុះបង្ក្រាបទីតាំងសេពគ្រឿងញៀនបានមួយសម្បុកធំ ឃាត់ខ្លួនបានមនុស្សប្រុសស្រី២៦នាក់(ស្រីម្នាក់) ដែលកំពុងតែប្រមូលគ្នាជក់និងចែកចាយគ្រឿងញៀននៅភូមិត្រពាំងឈូក សង្កាត់ទឹកថ្លា ខណ្ឌសែនសុខ កាលពីវេលាម៉ោង៧និង៣០នាទីយប់ ថ្ងៃទី១៨ ខែសីហា ឆ្នាំ២០១៥។
ប្រភពព័ត៌មានពីសមត្ថកិច្ចបានប្រាប់អោយដឹងថា ការចុះបង្រ្កាប់ទ្រង់ទ្រាយធំនេះបានបន្ទាប់ពីកម្លាំងអាវុធហត្ថខណ្ឌទួលគោកល្បាតក្នុងមូលដ្ធានឃាត់ខ្លួនបានជនសង្ស័យប្រើប្រាស់ និងចែកចាយគ្រឿងញៀនបាន៥នាក់ កាលពីវេលាម៉ោង៩និង១០នាទីយប់ ថ្ងៃទី១៧ ខែសីហា នៅចំនុចផ្លូវលេខ១៨២ សង្កាត់ទឹកល្អក់៣ ខណ្ឌទួលគោក យកទៅសាកសួរនៅអាវុធហត្ថខណ្ឌទួលគោក រួចទើបសហការជាមួយអាវុធហត្ថរាជធានីភ្នំពេញ ចុះទៅបង្រ្កាប នៅក្នុងសំបុកចែកចាយនិងប្រើប្រាស់ ឃាត់បានជនសង្ស័យដែលកំពុងតែប្រមូលគ្នាជក់ និងចែកចាយបាន២៦នាក់ទៀត ដកហូតបានវត្ថុតាងរួមមាន ជញ្ជីង២ ម៉ាទឹកកកមួយចំនួនតូច ដាវសាំម៉ូរៃ២ដើម និងដបសម្រាប់ជក់៨ដប ។
គួរកត់សម្គាល់ថា ទីតាំងប្រើប្រាស់និងចែកចាយគ្រឿងញៀននៅម្ដុំកើតហេតុនេះ គឺត្រង់ចំណុចភូមិត្រពាំងឈូក មុខមន្ទីរពេទ្យព្រះកុសុមៈ ជាទីតាំងដុះស្លែដែលសមត្ថកិច្ចបង្រ្កាបមិនចេះអស់ ហើយតែងតែចាប់បានជារៀងរាល់ថ្ងៃ ។ តំបន់នេះជាតំបន់ដែលអសន្តិសុខនោះទេនៅពេលយប់ស្ងាត់ ដែលប្រជាពលរដ្ឋមិនហ៊ានធ្វើដំណើរឆ្លងកាត់ឡើយ។
បច្ចុប្បន្នជនសង្ស័យរួមនិងវត្ថុតាង កម្លាំងអាវុធហត្ថខណ្ទទួលគោក បានកសាងសុំណុំរឿងបញ្ជូនទៅទីបញ្ជាការអាវុធហត្ថរាជធានីភ្នំពេញ ដើម្បីចាត់ការតាមច្បាប់ ៕
ដោយ៖ វិបុល
