ខេត្តកណ្តាល ៖ គ្រោះថ្នាក់ចរាចរណ៍មួយបានបណ្តាលឲ្យលោកតាអាយុ៦០ឆ្នាំម្នាក់ស្លាប់នៅនឹងកន្លែង ដោយសារតែអ្នកបើករ៉ឺម៉កបើកមិនប្រកាន់ស្តាំទៅបុក នៅលើកំណាត់ផ្លូវខេត្ត380ត្រង់ចំណុចភូមិព្រែកល្វាឃុំព្រែកតាកូវ  ស្រុកខ្សាច់កណ្តាលខេត្តកណ្តាល កាលពីវេលាម៉ោង១និង៣០នាទី ថ្ងៃទី៨មីនា ឆ្នាំ២០១៧ ។

សាក្សីបានឲ្យដឹងថា អ្នកបើករ៉ឺម៉កម៉ូតូបង្កហេតុ ឈ្មោះតយ សាម៉េត ភេទប្រុស អាយុ21ឆ្នាំនៅភូមិកំរៀងសង្កាត់ព្រៃវែង ខណ្ឌដង្កោ រាជធានីភ្នំពេញ បើកក្នុងទិសដៅពីត្បូងទៅជើង ។ លុះមកដល់ចំណុចកើតហេតុខាងលើមិនប្រកាន់ស្តាំដៃរបស់ខ្លួនបានរេចង្កូតមកបុកជាមួយម៉ូតូមួយគ្រឿងទៀតម៉ាកHonda C100កូរ៉េ ពណ៌ក្រហមពាក់ស្លាកលេខ ឆ1ក3887 បើកបរដោយឈ្មោះទូច  មាយភេទ ប្រុសអាយុ60ឆ្នាំ មានទីលំនៅភូមិលើឃុំស្វាយជ្រំ ស្រុកខ្សាច់កណ្តាល ខេត្តកណ្តាល បើកបរក្នុងទិសដៅពីជើងទៅត្បូង បានស្លាប់នៅកន្លែងកើតហេតុ ។ ចំណែកអ្នកបើកបររ៉ឺម៉កម៉ូតូត្រូវបានសមត្ថកិច្ចឃាត់ខ្លួនបញ្ជូនមកអធិការដ្ធាននគរបាលស្រុកខ្សាច់កណ្តាលតែម្តង។

ក្រោយកើតហេតុសមត្ថកិច្ចជំនាញបានចុះមកវាស់វែង និងធ្វើកំណត់ហេតុ ដោយយកវត្ថុតាងទាំងពីររក្សាទុកនៅអធិការដ្ឋានស្រុក ។ ដោយឡែកសពជនរងគ្រោះប្រគល់អោយក្រុមគ្រួសារយកទៅធ្វើបុណ្យតាមប្រពៃណី ៕ ស្អាងជ័យ