មន្ត្រីឥណ្ឌូនេស៊ីបានបញ្ជាក់ថា ប៉ូលិសឥណ្ឌូនេស៊ីបានចាប់ខ្លួនជនអន្តោប្រវេសន៍១៨នាក់ ខណៈដែលអណ្តែតនៅលើផ្ទៃសមុទ្រ ជិតតំបន់កោះជ្វា ក្រោយពីទូករបស់ពួកគេព្យាយាមធ្វើដំណើរទៅកាន់ប្រទេសអូស្ត្រាលីនោះអស់ប្រេង ។
លោក Filianto Akbar អ្នកទទួលបន្ទុកកិច្ចការជនភៀសខ្លួនក្នុងតំបន់បានបញ្ជាក់ថា ក្រុមជនភៀសខ្លួនដែលមកពីបង់ក្លាដែស ឥណ្ឌា និងប៉ាគីស្ថានផងដែរបានរសាត់អណ្តែតតាមទូកឈើ១គ្រឿងដែលធ្វើដំណើរមកពីច្រាំង Pameungpeuk ភាគខាងលិចកោះជ្វានោះឆ្ពោះទៅកាន់ដែនកោះ Christmas ស្ថិតទីតាំងដាច់ស្រយាល់របស់ប្រទេសអូស្ត្រាលី ។
ប្រភពបានបន្តថា ជនភៀសខ្លួនទាំងនោះបានធ្វើដំណើរក្នុងគោលដៅឆ្ពោះទៅកាន់ដែនកោះ Christmas ប្រទេសអូស្ត្រាលី ប៉ុន្តែចៃដន្យទូកឈើរបស់ពួកគេអស់សាំង ខណៈមកដល់ជិតច្រាំងក្នុងស្រុក Cianjur កាលពីថ្ងៃទី២៣ ខែកញ្ញា ឆ្នាំ២០១៥ ។ ក្រុមជនភៀសខ្លួនទាំងនោះបានស្វះស្វែងការជួយពីសំណាក់ទូកនេសាទដែលឆ្លងកាត់នៅទីនោះ ប៉ុន្តែក្រោយមក ក្រុមអ្នកនេសាទបានរាយការណ៍ព័ត៌មាននេះមកអាជ្ញាធរមានសមត្ថកិច្ច ។
លោក Akbar បានបន្តទៀតថា បន្ទាប់ពីមានការចាប់ខ្លួនរួចមក ជនភៀសខ្លួន១៦នាក់ត្រូវបញ្ជូនទៅកាន់មន្ទីរឃុំឃាំងជនភៀសខ្លួន ខណៈដែលអ្នកនៅសេសសល់កំពុងត្រូវបានសាកសួរដោយប៉ូលិស ។ លោកបញ្ជាក់ថា នាវិក និងកម្មករដើរទូក២នាក់ត្រូវចាប់ខ្លួនផងដែរ ។
គោលនយោបាយអភិរក្សរដ្ឋាភិបាលអូស្ត្រាលី កាលពីឆ្នាំ២០១៣បានដាក់ចេញវិធានការរឹតត្បិតទៅលើគោលនយោបាយជនភៀសខ្លួន ដោយអនុញ្ញាតឲ្យអាជ្ញាធរមានសមត្ថកិច្ច ទោះចង់មិនចង់ត្រូវតែទប់ស្កាត់ការចូលជនភៀសខ្លួនទៅកាន់ទឹកដីអូស្ត្រាលី ។ ប្រទេសឥណ្ឌូនេស៊ី កាលពីពេលកន្លងមកនេះបានសម្តែងការអាក់អន់ស្រពន់ចិត្តចំពោះគោលនយោបាយខាងលើរបស់រដ្ឋាភិបាលអូស្ត្រាលី ដែលកាលណោះស្ថិតក្រោមការដឹកនាំរបស់នាយករដ្ឋមន្ត្រី តូនី អាប៊ូត ។
គោលនយោបាយទៅលើជនភៀសខ្លួននោះបានបញ្ជូនត្រឡប់ទៅវិញនាវាដឹកជនភៀសខ្លួនដែលចូលដល់ទឹកដីអូស្ត្រាលីហើយនោះ បើទោះបីជាដឹងថា ជនភៀសខ្លួនទាំងនោះពិតជារងទុក្ខទោសពិតៗយ៉ាងណាក៏ដោយ ។ ក្រៅពីនេះ នៅមានការបញ្ជូនជនស្វែងរកសិទ្ធិជ្រកកោនទាំងនោះទៅឃុំឃាំងនៅដែនកោះ Nauru និង Papua New Guinea ហើយដែលទទួលរងការរិះគន់យ៉ាងខ្លាំងក្លាពីសំណាក់ក្រុមសិទ្ធិមនុស្ស ។
នេះជាករណីលើកដំបូងបំផុតស្តីអំពីជនភៀសខ្លួនធ្វើដំណើរតាមទូកដើម្បីទៅកាន់ប្រទេសអូស្ត្រាលីសុំសិទ្ធិជ្រកកោន ចាប់តាំងពីនាយករដ្ឋមន្ត្រីអូស្ត្រីថ្មី លោក Malcolm Turnbull ឈ្នះឆ្នោតក្លាយជានាយករដ្ឋមន្ត្រីនោះរួចមក ៕
ប្រែសម្រួល៖ ថាច់ យ៉ាត
