ខេត្តកំពង់ឆ្នាំង៖ គ្រូបង្រៀនបើកបររថយន្តសាលាដៃទំនើបថយរថយន្តសម្រាប់បង្ហាត់សិស្សទៅបុករបងវិទ្យាល័យព្រះបាទសុរាម្រឹតអស់មួយផ្ទាំង ជាប់រថយន្តក្នុងរបងសាលា បើកមកមុខមិនរួច ហៅរថយន្តមកសណ្តោងទាញ ។
ហេតុការណ៍នេះបានកើតឡើងកាលពីវេលាម៉ោង៥និង១៥នាទីល្ងាច ថ្ងៃទី២៤ ខែកញ្ញា ឆ្នាំ២០១៥ នៅតាមបណ្តោផ្លូវជាតិលេខ៥ ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ។
សមត្ថកិច្ចបានអោយដឹងថា គ្រូបង្ហាត់បើកបរមានឈ្មោះថាគ្រូវាសនា ជាអ្នកបង្ហាត់សិស្សដែលចូលមករៀនបើកបរនៅសាលាបើកបរដៃទំនើប ។ នៅមុនពេលកើតហេតុ លោកគ្រូបើកបរនេះបានបើកបរចេញពីទីតាំងសាលាបើកបរ ហើយឆ្លងផ្លូវជាតិមកខាងស្តាំ ហើយនៅពេលមកដល់ទីតាំងនេះបានដាក់លេខរឺយ៉ែថយក្រោយ ប៉ុន្តែដោយខុសបច្ចេកទេសក៍បានថយក្នុងល្បឿនមួយយ៉ាងខ្លាំង ជ្រុលទៅបុករបងសាលាវិទ្យាល័យព្រះបាទសុរាម្រឹតពេញមួយ ទំហឹងបណ្តាលអោយរបងនៃវិទ្យាល័យព្រះបាទសុរាម្រឹតបាក់អស់មួយប្រឡោះធំ ដែលមានប្រវែងជាង៥ម៉ែត្រ ។
ក្រោយពេលកើតហេតុត្រូវបានម្ចាស់សាលាបើកបរនេះរូតរះយករថយន្តមកទាញអូសចូលទៅទុកក្នុងទីតាំងសាលាបើកបរ ដើម្បីលាក់បាំងអោយផុតពីអ្នកសារព័តមាន និង ចង់គេចពីការសងនៃការខូចខាតរបងសាលាវិទ្យាល័យព្រះបាទសុរាម្រឹត ប៉ុន្តែក្រោយពីសមត្ថកិច្ចនគរបាលចរាចរណ៍ដឹងទៅពិនិត្យនឹងកន្លែងកើតហេតុ បានហៅភាគីសាលាបើកបរដៃទំនើប ជាមួយនឹងភាគីសាលានៃវិទ្យាល័យព្រះបាទសុរាម្រឹតដើម្បីចេញថ្លៃសងនៃការខូចខាត ។
សមត្ថកិច្ចបានអោយដឹងថា សាលាបើកបរបានយល់ចេញថ្លៃសងនៃការខូចខាតដែលរថយន្តសាលាបើកបរបានថយបុកបាក់ ។
មជ្ឈដ្ឋាននានាបាននិយាយថា សាលាបើកបរដៃទំនើបមួយនេះតែងតែបង្ករនូវគ្រោះថ្នាក់ចរាចរណ៍នៅលើផ្លូវសាធារណៈ ពេលខ្លះកំពុងបង្រៀនសិស្សតែម្តង តែពេលនេះលោកវាសនា គឺបានថយបុករបងបាក់ខ្លួនឯង ៕
ដោយ៖ ចន្ថា
