ខេត្តពោធិ៍សាត់៖ រថយន្ដធន់ធំមួយគ្រឿងម៉ាក ហ្វុយហ្សូ (FUSO) ពណ៌ស គ្មានស្លាកលេខ បានរេចង្កូតធ្លាក់ស្នាមភ្លោះ បណ្ដាលឱ្យកកការស្ទះចរាចរណ៍កកកុញ និងរងរបួសតៃកុង និងព្រូ ។
ហេតុការណ៍នេះបានកើតឡើងកាលពីរំលងអធ្រាត្រ ថ្ងៃទី២៥ ខែកញ្ញា ឆ្នាំ២០១៥ តាមបណ្ដោយផ្លូវជាតិលេខ៥ ត្រង់ចំណុចភូមិសាលាគំរូ សង្កាត់ព្រៃញី ក្រុង-ខេត្តពោធិ៍សាត់។
ប្រភពនានាជុំវិញកន្លែងកើតហេតុ បាននិយាយថា គេឃើញរថយន្ដប្រភេទទ្រុងធន់ធំ ជារថយន្ដដឹកសត្វគោក្របី បើកបរក្នុងទិសដៅពីកើតមកលិច ស្រាប់តែមកដល់ចំណុចកើតហេតុ ឃើញរថយន្ដខាងលើនេះ រេចង្កូតធ្លាក់ចូលស្នាមភ្លោះតែម្ដង បណ្ដាលឱ្យរងរបួសស្រាលមនុស្ស ២នាក់ អ្នកបើកបរនិងអ្នករួមដំណើរ ដែលករណីនេះគេសង្ស័យអ្នកបើកបរងងុយដេក ប៉ុន្ដែគេមិនបានបញ្ជាក់ពីអត្ដសញ្ញាណនោះទេ ហើយក៏មិនបានបញ្ជាក់ថា រថយន្ដបង្កខាងលើនេះជារបស់ក្រុមហ៊ុនដឹកសត្វគោក្របីអ្វីដែរ ។
ក្រោយកើតហេតុគេកំពុងយកអេស្កាវទ័រ និងរថយន្ដធន់ធំៗផ្សេងទៀតមកជួយទាញ បង្កការកកស្ទះចរាចរណ៍កកកុញពេញផ្លូវ ករណីនេះគេពុំឃើញមានអាជ្ញាធរមានសមត្ថកិច្ចចុះអន្ដរាគមន៍នោះទេ ។
ដោយ៖ ប៉ឹម ពិន
