ភ្នំពេញ៖ នៅរសៀលថ្ងៃទី២៧ ខែ កញ្ញា ឆ្នាំ២០១៥ខាងមុខនេះ កីឡាករ ផល សោភ័ណ្ឌ សិស្សគុនរបស់ក្លិបតាឡី ដំរីមានឫទ្ធិត្រូវជួបប្រកួតជាមួយអ្នក ប្រដាល់ថៃឈ្មោះ Khunphen Keajpetch Noy ក្នុងប្រភេទទម្ងន់៦៣,៥គីឡូក្រាម ខណៈដែលកីឡាករ ឡៅ ចន្ទ្រា សិស្ស គុនក្លិបកងទ័ពឆត្រយោងលេខ៩១១ត្រូវផ្គូផ្គងឱ្យជួបប្រកួតជាមួយអ្នកប្រដាល់ថៃឈ្មោះ Kaophong Chaiphum ក្នុង ប្រភេទទម្ងន់៦១គីឡូក្រាមលើសង្វៀន ប្រដាល់ទូរទស្សន៍បាយ័នបឹងស្នោ ។
មួយរយៈពេលចុងក្រោយនេះកីឡាករ ផល សោភ័ណ្ឌ និង ឡៅ ចន្ទ្រា កំពុង ទទួលបានការចាប់អារម្មណ៍យ៉ាងខ្លាំងពីសំណាក់អ្នកនិយមទស្សនាការប្រកួត កីឡាប្រដាល់ក្បាច់គុនបុរាណខ្មែរតាម រយៈការប្រកួតប្រដាល់ក្នុងកម្មវិធីនានា ជាមួយកីឡាករថៃ ។
ផល សោភ័ណ្ឌ និង ឡៅ ចន្ទ្រា ពួក គេម្នាក់ៗធ្លាប់ប៉ះអ្នកប្រដាល់ថៃមិនតិចជាង១០ដងនោះទេ លើសពីនេះកីឡាករ ផល សោភ័ណ្ឌ ត្រូវគ្រូបង្ហាត់របស់ខ្លួន លោកញ៉ូវ ម៉ាក់ បានដាក់រហស្សនាម ឱ្យថា“កំពូលអ្នកប្រដាល់កូនដំរីភ្លុកស” ហើយលោកគ្រូក៏កំពុងរំពឹងថាសិស្ស របស់គាត់ ផល សោភ័ណ្ឌ អាចដណ្ដើម យកខ្សែក្រវាត់គូកូតា១គ្រឿងទៀតក្រោយ ប៉ះជាមួយអ្នកប្រដាល់ថៃ Khunphen Keajpetch Noy នៅរសៀលថ្ងៃអាទិត្យ ទី២៧ ខែកញ្ញា ឆ្នាំ២០១៥ខាងមុខ ។
កំណតត្រាប្រកួតជាលក្ខណៈមិត្ដភាពអន្ដរជាតិរបស់កីឡាករ ផល សោភ័ណ្ឌ មានចំនួន១៥ប្រកួតក្នុងនោះសោភ័ណ្ឌ វាយឈ្នះបាន១២ដង ចាញ់២ដង ដោយ សារប្រើស្នៀតជង្គង់ថែមទៅលើគូប្រកួត របស់ខ្លួនការប្រកួតចុងក្រោយសោភ័ណ្ឌ បានវាយឱ្យកីឡាកថៃឈ្មោះ Chhouy Chhai គ្មានឱកាសតដៃរួចត្រូវអាជ្ញា កណ្ដាលបញ្ឈប់ក្នុងទឹកទី២ ។
ចំណែកឯកីឡាករ ឡៅ ចន្ទ្រាវិញ កាន់តែមានថ្វីដៃល្អគូឱ្យកោតសរសើរ ថែមទៀតតាមរយៈការប្រើស្នៀតជង្គង់ និងកែងរបស់គេទាំងល្បឿនវាយចេញ និងមានទម្ងន់ធ្ងន់អាចផ្ដួលដៃគូឱ្យសន្លប់ភ្លាមៗបើ Kaophong Chaiphum ខ្វះ ការប្រុងប្រយ័ត្ន ។ ចន្ទ្រា សិស្សគុនលោក ហង់ សឿន និងជាប្អូនប្រុសកីឡាករ ឡៅ ស៊ីណាត ធ្លាប់ប្រកួតមិត្ដភាពអន្ដរជតិ បានចំនួន១៦ដង ឈ្នះ១៤ដង ចាញ់ម្ដង ស្មើម្ដង ប្រកួតចុងក្រោយគេវាយឱ្យ កីឡាថៃឈ្មោះ Jok Kie Pech សន្លប់ក្នុង ទឹកទី៣ ។ ចាំមើលអ្នកប្រដាល់ថៃទាំង២ នាក់គឺឈ្មោះ Khun phen Keajpetch Noy និងឈ្មោះ Kaophong Chaiphum មានឱកាសបានស្ពាយជ័យជម្នះត្រឡប់ ទៅប្រទេសរបស់ខ្លួនបានឬអត់?
ដោយ៖ សារីម
