ខេត្តកំពង់ឆ្នាំង៖ នៅព្រឹកថ្ងៃទី១០ ខែឧសភា ឆ្នាំ២០១៧ នៅសាលប្រជុំអគារពហុសិក្សា មជ្ឈមណ្ឌលមណ្ឌលហ្វឹកហ្វឺនកងរាជអាវុធហត្ថភ្នំជំរាយ លោក ឧត្តមសេនីយ៍ឯក សុិន សូផាន្នី មេបញ្ជាការរង កងរាជអាវុធហត្ថលើផ្ទៃប្រទេស ទទួលបន្ទុកការងារកសាងកម្លាំង តំណាងដ៏ខ្ពង់ខ្ពស់ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជា មេបញ្ជាការកងរាជអាវុធហត្ថលើផ្ទៃប្រទេស បានអញ្ជើញជាអធិបតីភាព ក្នុងពិធីបំពាក់ឋានន្តរសក្តិ ដល់នាយទាហាន នាយទាហានរងនៃកងរាជអាវុធហត្ថ ៤៤រូប។
លោក ឧត្តមសេនីយ៍ឯក សុិន សូផាន្នី មានប្រសាសន៍ថា ការបំពាក់ឋានន្តរសក្តិ ដល់នាយទាហាន នាយទាហានរងនៃកងរាជអាវុធហត្ថ ទាំង៤៤រូប ដែលបានទទួលសេចក្តីសម្រេចតម្លើងឋានន្តរសក្តិ តាមសំណើររបស់ឯកឧត្តម នាយឧត្តមសេនីយ៍ មេបញ្ជាការ កងរាជអាវុធហត្ថលើផ្ទៃប្រទេស នាពេលនេះ បានបង្ហាញពីការយកចិត្តទុកដាក់ និងមានទំនុបចិត្តខ្ពស់ពីរាជរដ្ឋាភិបាល ក្រសួងការពារជាតិ អគ្គបញ្ជាការដ្ឋាននៃកងយោធពលខេមរភូមិន្ទ និងពីមេបញ្ជាការកងរាជអាវុធហត្ថលើផ្ទៃប្រទេស ដល់នាយទាហាន នាយទាហានរងកងរាជអាវុធហត្ថ ដែលបានខិតខំបំពេញភារកិច្ចមិនខ្លាចនឿយហត់ ហ៊ានធ្វើពលីកម្មគ្រប់បែបយ៉ាង ចូលរួមចំណែកក្នុងការពារសន្តិសុខសង្គម សណ្តាប់ធ្នាប់សាធារណៈ ដើម្បីបំរើភាពសុខសាន្តរបស់ប្រជាពលរដ្ឋនិងសង្គមជាតិទាំងមូល និងស្របតាមកំណែទម្រង់របស់កងយោធពលខេមរភូមិន្ទ ពិសេសកំណែទម្រង់របស់កងរាជអាវុធហត្ថតាមរចនាសម្ព័ន្ធចាត់តាំងថ្មីផងដែរ។
ក្នុងនាមនាយឧត្តមសេនីយ៍ មេបញ្ជាការ កងរាជអាវុធហត្ថលើផ្ទៃប្រទេស និងក្នុងនាមលោកផ្ទាល់ សូមសម្តែងនូវការកោតសរសើរ និង វាយតម្លែខ្ពស់ ចំពោះសា្នដៃ ដែលនាយទាហាន នាយទាហានរងនៃកងរាជអាវុធហត្ថទាំង៤៤រូប និងកងរាជអាវុធហត្ថគ្រប់លំដាប់ថ្នាក់ ដែលបានខិតខំប្រឹងប្រែងយកចិត្តទុកដាក់ក្នុងការបំពេញតួនាទី ភារកិច្ច និងបេសកកម្មរបស់ខ្លួនប្រកបដោយ ស្មារតីទទួលខុសត្រូវ សម្រេចបានសមិទ្ធផលជាផ្លែផ្កាគួរជាទីមោទនះ ជូនជាតិ មាតុភូមិ។
រយៈពេលកន្លងមក កម្លាំងកងរាជអាវុធហត្ថនៅទូទាំងប្រទេស បានខិតខំបំពេញតួនាទី ភារកិច្ចរបស់ខ្លួន ជានគរបាលរដ្ឋបាល ជានគរបាលយុត្តិធម៌ តម្រួតយោធា ផ្តល់កម្លាំងទៅអន្តរក្រសួងតាមការស្នើសុំ ព្រមទាំងយកចិត្តទុកដាក់ក្នុងការបំពេញបេសកកម្ម បង្ការ បង្រ្កាប និងសង្គ្រោះប្រកបដោយប្រសិទ្ធិភាព ដែលគ្រប់ប្រតិបត្តិការរបស់កងរាជអាវុធហត្ថ តែងតែគោរពតាមច្បាប់ គោរពបទបញ្ជា ក្រមសីលធម៌វិជ្ជាជីវះនិងគោរពសិទ្ធិមនុស្ស ធ្វើឲ្យមានការគាំទ្រនិងមានជំនឿទុកចិត្តពីគ្រប់មជ្ឈដ្ឋាន។
លោក ឧត្តមសេនីយ៍ឯក សុិន សូផាន្នី ក៏បានជម្រាបជូនអង្គពិធីផងដែរ ពីទស្សនវិស័យក្នុងការដឹកនាំ នាពេលបច្ចុប្បន្ន និងទៅអនាគត របស់ឯកឧត្តម នាយឧត្តមសេនីយ៍ សៅ សុខា សំដៅធ្វើយ៉ាងណាឲ្យកម្លាំងអាវុធហត្ថ មានភាពរឹងមាំ ទាំងបរិមាណ និងគុណភាព រ៉ាប់រងភារកិច្ចដែលរដ្ឋាភិបាលប្រគល់ជូន ដូច្នេះទាមទារ ឲ្យកម្លាំងកងរាជអាវុធហត្ថ ត្រូវលើកកំពស់សមត្ថភាពបុគ្គលិក គ្រប់ជំនាញទាំងអស់ ប្រកាន់ភ្ជាប់នូវសីលទាំង៥ មាន ស្មោះត្រង់ចំពោះជាតិ សាសនា ព្រះមហាក្សត្រ មានភាពស្អាតស្អំ អត្តចរិកស្លូតបូត សុភាពរាបសារ តែម៉ឹងម៉ាត់ក្នុងតួនាទីភារកិច្ច ដោយប្រកាន់ភា្ជប់នូវការគោរពច្បាប់និងក្រមសីលធម៌វិជ្ជាជីវៈ មានសមត្ថភាពនិងឈ្លាសវៃគ្រប់កាលៈទេសៈ ឧស្សាហ៍ព្យាយាមគ្រប់ការងារ និងមានសេចក្តីក្លាហានចំពោះតួនាទីភារកិច្ច ដោយមានការទទួលខុសត្រូវ ព្រមទាំងកសាងធនធានមនុស្សឲ្យមានគុណភាព៥យ៉ាង និងដោះស្រាយគោលនយោបាយ៕
ដោយ៖ សហការី
