ខេត្តរតនគិរី៖ រថយន្តដឹកឈើប្រណិតប្រភេទគ្រញូងចំនួន២គ្រឿង ដែលដឹកជញ្ជូនចេញពីខេត្តព្រះវិហារឆ្លងកាត់ខេត្តស្ទឹងត្រែងឆ្ពោះមកខេត្តរតនគិរី ហើយត្រូវបានកម្លាំងនគបាលប្រឆាំងបទល្មើសសេដ្ឋកិច្ចខេត្តសហការជាមួយនគបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងកម្លាំងអធិការស្រុកកូនមុំបង្ក្រាបបាននៅវេលាម៉ោង៨និង៣០ព្រឹកថ្ងៃទី២៧ ខែកញ្ញា ឆ្នាំ២០១៥ បន្ទាប់ពីស្រាវជ្រាវដឹងអំពីរថយន្តខាងលើមានការរត់គេចពីការតាមប្រមាញ់តាំងពីវេលាម៉ោង៧និង៣០នាទីយប់ ថ្ងៃទី២៦ ខែកញ្ញា ឆ្នាំ២០១៥ ស្ថិតនៅភូមិ១ឃុំត្រពាំងច្រេស ស្រុកកូនមុំ ខេត្តរតនគិរី ។
យោងតាមសំដីលោកនូវ ដារា ប្រធានការិយាល័យនគរបាលប្រឆាំងបទល្មើសសេដ្ឋកិច្ចខេត្តបានឲ្យដឹងថា ឈើដែលបង្ក្រាបបាននោះសរុបចំនួន៦៤ដុំ ស្មើនឹង៥៣៩គីឡូក្រាម ដោយមិនបានបង្ក្រាបរថយន្ត និងឈ្មួញនោះទេ ដោយសារថយន្តដឹកបទល្មើសដឹងខ្លួនទាន់ សមត្ថកិច្ចពួនស្ទាក់ចាប់ ខណៈនោះឈ្មួញ ក៍បានយករថយន្តមួយទៀតមកពាំងដើម្បីរំដោះរថយន្តដឹកបទល្មើស ហើយរថយន្តដឹកបទល្មើសបានយកឈើគ្រូញូងនោះយកទៅទម្លាក់ចោលនៅផ្ទះរបស់ប្រជាពលរដ្ឋមួយកន្លែង ។
លោកបានបន្តទៀតថា ពេលនោះប្រជាពលរដ្ឋក៍បានរាយការណ៍មកដល់សមត្ថកិច្ច ទើបសមត្តកិច្ចសុំដីការពីព្រះរាជអាជ្ញាហើយក៍បានយកឈើក្រញូងទាំងនោះមករក្សាទុកនៅស្នងការដ្ឋាននគបាលខេត្តនៅល្ងាចថ្ងៃទី២៧ ខែកញ្ញា ឆ្នាំ២០១៥ ទើបប្រគល់ទៅឲ្យជំនាញរដ្ឋបាលព្រៃឈើផ្នែកលំផាត់ចាត់ការបន្ត ៕
ដោយ៖ អ៊ុចសាវុទ្ធ
