សារព័ត៌មានកូរ៉េខាងត្បូង Yonhap បានដកស្រង់សម្តីរដ្ឋមន្ត្រីការបរទេសកូរ៉េខាងជើង លោកRi Su Yong បានប្រកាសនៅក្នុងកិច្ចប្រជុំអង្គការសហប្រជាជាតិនៅទីក្រុងញូវយ៉កបានប្រកាសថា ការដាក់ទណ្ឌកម្មសេដ្ឋកិច្ចបានរារាំងគោលដៅអភិវឌ្ឍន៍។ ទន្ទឹមនឹងនោះក៏បានថ្កោលទោសអាមេរិកថា បានរក្សាគំនុំប្រឆាំងកូរ៉េខាងជើង ។
លោក Ri Su Yong បានបញ្ជាក់នៅក្នុងកិច្ចប្រជុំពីរបៀបវារៈពីការអភិវឌ្ឋរឹងមាំរបស់អង្គការសហប្រជាជាតិ ដោយលោកបានបញ្ជាក់ថា របៀបវារៈនេះពិតជាសំខាន់ក្នុងការអភិវឌ្ឍន៍ ប៉ុន្តែលោកព្រមានថា ការអភិវឌ្ឍនឹងមិនឈានដល់គោលដៅនោះឡើយ ប្រសិនបើការដាក់ទណ្ឌកម្មប្រឆាំងទៅនឹងប្រទេសមួយចំនួននៅតែរក្សាយូរអង្វែងនោះ។
កាលពីថ្ងៃទី២៥ ខែកញ្ញា សមាជិកអង្គការសហប្រជាជាតិបានអនុម័តគម្រោងអភិវឌ្ឍន៍រឹងមាំហើយយកគោលដៅចុងក្រោយនាឆ្នាំ២០៣០ ដោយក្នុងរយះពេលនោះត្រូវតែកាត់បន្ថយភាពក្រីក្រ ការពារផែនដី និងអប់រំគុណភាពខ្ពស់ ។
ក្រៅពីនេះ សុន្ទរកថារបស់លោក Ri su yongដែលបានផ្តល់ដោយអង្គការសហប្រជាជាតិ មានឃ្លាមួយសសេរថា អាមេរិកនៅតែ ព្យាយាមគៀបសង្គត់លើវិស័យសំខាន់សម្រាប់ជីវភាពរស់នៅរបស់ពលរដ្ឋកូរ៉េខាងជើងនៅក្រោមរូបភាពផ្សេងៗ ក៏ដូចជាចងគំនុំក្នុងគោលដៅលុបបំបាត់របស់សង្គមនិយមនៅកូរ៉េខាងជើង ។
លោក Ri ក៏បានប្រកាសទៀតថា ក្រោមការដឹកនាំដ៏ឈ្លាសវៃរបស់មេដឹកនាំគីម ជុងអ៊ុន កូរ៉េខាងជើងកំពុងតែទទួលជោគជ័យនៅក្នុងគោលដៅអភិវឌ្ឍន៍រឹងមាំ បើទោះបីកំពុងទទួលរងការដាក់ទណ្ឌកម្មក៏ដោយ។ ជាយូរណាស់មកហើយ កូរ៉េខាងជើងបានទទួលរងការដាក់ទណ្ឌកម្មពីអាមេរិក និងសហគមន៍អន្តរជាតិដោយសារតែកម្មវិធីបរមាណូ និងកាំជ្រួចមីស៊ីលរបស់ប្រទេសនេះ ហើយទណ្ឌកម្មនោះអាចនឹងបង្កើនបន្ថែមទៀតប្រសិនបើកូរ៉េខាងជើងនៅតែបន្តសាកល្បងមីស៊ីលក្នុងឱកាសខួប គម្រប់៧០ឆ្នាំ ថ្ងៃដែលបង្កើតបក្សពលករកូរ៉េខាងជើង៕
ប្រែសម្រួល៖ ម៉ែវ សាធី
