ភ្នំពេញ៖ ជនសង្ស័យកាច់កម៉ូតូ២នាក់ត្រូវសមត្ថកិច្ចចាប់ខ្លួនបាន ខណៈដែលធ្វើសកម្មភាពកាច់កម៉ូតូបានហើយជិះរត់គេចខ្លួន ។ ហេតុការណ៍បានកើតឡើងកាលពីវេលាម៉ោង១២និង៣០នាទីរសៀល ថ្ងៃទី២៩ ខែកញ្ញា ឆ្នាំ២០១៥ ។
ជនសង្ស័យត្រូវនគរបាលប៉ុស្តិ៍ទំនប់ទឹកដែលល្បាតក្នុងមូលដ្ឋានចាប់បាននៅចំណុចបណ្តោយផ្លូវ២៧១ សង្កាត់ទំនប់ទឹក ខណ្ឌចំការមន រាជធានីភ្នំពេញ ហើយនាំខ្លួនជនសង្ស័យ រួមទាំងវត្ថុតាងជាក់ស្តែងទៅកាន់ប៉ុស្តិ៍ដើម្បីប្រគល់បន្តទៅកាន់ទីតាំងម្ចាស់ករណី ។
មុនពេលកើតហេតុ ជនសង្ស័យទាំង២នាក់នេះធ្វើសកម្មភាពកាច់សោ.កម៉ូតូនៅចំណុចផ្ទះជួល ម្តុំបឹងទំពុន ខណ្ឌមានជ័យ ហើយជិះរត់ តែម្ចាស់ម៉ូតូបានដេញតាមស្រែកឆោឡោឲ្យមានការជួយដេញចាប់ ពេលនោះកម្លាំងល្បាតបានដឹងក៏ចាប់តែម្តង ។
បុរសជនសង្ស័យ ១ឈ្មោះ សុខ សៀរ អាយុ២៥ឆ្នាំ រស់នៅភូមិថ្មី សង្កាត់បឹងទំពុន ខណ្ឌមានជ័យ ទី២ ចាន់ អុល អាយុ៣៤ឆ្នាំ រស់នៅភូមិដំណាក់ធំ បឹងទំពុន ខណ្ឌមានជ័យ ៕
ដោយ៖ សរស្មី
