ភ្នំពេញ៖ ជនអន្តោប្រវេសន៍ វៀតណាមចំនួន១២នាក់ត្រូវបានកម្លាំងនគរបាលនៃអគ្គនាយកដ្ឋានអន្តោប្រវេសន៍សហការជាមួយកម្លាំងនគរបាលមូលដ្ឋានបានធ្វើការឃាត់ខ្លួនកាលពីវេលាម៉ោង៣និង៣០នាទីរសៀលថ្ងៃទី២៩ ខែកញ្ញា ឆ្នាំ២០១៥ នៅចំនុចភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ ។
ប្រតិបត្តិការថ្មីនេះដឹកនាំ ដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការជាមួយ កម្លាំង នគរបាលមូលដ្ឋាន និងមាន ការសម្របសម្រួលពីលោកព្រះរាជអាជ្ញារង អមសាលា ដំបូងរាជធានីភ្នំពេញ ។ ជនបរទេសអន្តោប្រវេសន៍ ទាំង១២នាក់នេះសុទ្ធតែជាជនជាតិវៀតណាម ស្រី៥នាក់ ត្រូវបញ្ជូនទៅកាន់អគ្គនាយកដ្ឋានអន្តោប្រវេសន៍ដើម្បីសាកសួរនិងត្រួតពិនិត្យឯកសារពាក់ព័ន្ធ ។
តាមការអោយដឹងពីនគរ បាលអន្តោប្រវេសន៍បានប្រាប់ថា ជនជាតិវៀតណាម ទាំង១២នាក់អាចប្រឈមមុខនិងការបណ្តេញពីប្រទេសកម្ពុជាប្រសិនបើសមត្ថកិច្ចរកឃើញថាគ្មានឯកសារគ្រប់គ្រាន់ស្របតាមច្បាប់អន្តោប្រវេសន៍របស់កម្ពុជា ។
ដោយឡែកអ្នកដែលហួសសុពលភាពទិដ្ឋាការនិងធ្វើការផាកពិន័យ១ថ្ងៃ៥ដុល្លារ ប្រសិនបើរកឃើញគ្មានសៀវភៅចេញដោយក្រសួងការសម្គាល់ថាជាពលករបរទេសទេនោះ ក៍ប្រឈមមុខនិងការ ផាកពិន័យផងដែរចំនួន៥០ម៉ឺនរៀល ហើយទឹកប្រាក់បានមកពី ការផាកពិន័យគឺបង់ចូលរដ្ឋ ៕
ដោយ៖ សណ្តោស
