ខេត្តកំពង់ស្ពឺ៖ ការបើកប្រាក់ឧបត្ថម្ភនេះ ធ្វើឡើងខណៈដែលលោកនាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា អញ្ជើញទៅប្រគល់លិខិតតែងតាំងថ្នាក់ដឹកនាំសមាគម អតីតយុទ្ធជនខេត្តកំពង់ស្ពឺ កាលពីព្រឹកថ្ងៃទី៣០ ខែកញ្ញា ឆ្នាំ២០១៥ ។
លោក លុយ ឡំ ប្រធានមន្ទីរសង្គមកិច្ចអតីតយុទ្ធជនខេត្តកំពង់ស្ពឺ បានឲ្យដឹងថា៖ គិតមកដល់ខែកញ្ញា ឆ្នាំ២០១៥នេះ នៅទូទាំងខេត្តកំពង់ស្ពឺមានជនពិការសរុប៨.៩៣៨នាក់ សមាជិកសមាគមន៏អតីតយុទ្ធជនចំនួន៥.០៨៨នាក់។ កន្លងមក គណៈអចិន្ត្រៃយ៍សមាគម អតីតយុទ្ធជនកម្ពុជាបានប្រគល់ថវិកាបេឡាមរណៈសង្គ្រោះបានចំនួន៤៥១សព និង កំពុងបើកជាក់ស្តែងនាពេលនេះចំនួន១១៤សព។
សូមរម្លឹកថា៖ បើយោងតាមការឲ្យដឹងពីមហាសន្និបាតទូទាំងប្រទេសរបស់សមាគម អតីតយុទ្ធជន ដែលបានបញ្ចប់កាលពីថ្ងៃទី២ កញ្ញា កន្លងទៅ សពសមាជិកសមាគម អតីតយុទ្ធជនដែលពុំទាន់បានបើកប្រាក់បេឡាមរណៈសង្គ្រោះមានចំនួន១៥២៣សព។ មកដល់បច្ចុប្បន្ន លោកនាយឧត្តមសេនីយ៍ គន់ គីម បានបន្តដឹកនាំបើកចែកនៅខេត្តចំនួន៤រួចមកហើយ រួមមាន៖ ខេត្តឧត្តរមានជ័យចំនួន៦៦សព ខេត្តបន្ទាយមានជ័យចំនួន១៣២សព ខេត្តបាត់ដំបងចំនួន១៣៨សព ខេត្តកំពង់ស្ពឺ១១៤សព និងនៅថ្ងៃខាងមុខនេះប្រតិភូបន្តបើកចែកនៅតាមបណ្តាខេត្តមួយចំនួនទៀត ដែលនៅសេសសល់។
លោកនាយឧត្តមសេនីយ៍គន់ គីម បានមានប្រសាសន៍ថា៖ ការបើកប្រាក់ឧបត្ថម្ភនេះ ធ្វើឡើងទៅតាមលក្ខន្តិកៈរបស់សមាគម អតីតយុទ្ធជន ដែលបានកំណត់ថា នៅពេលមានសមាជិកណាម្នាក់ទទួលមរណភាព នឹងទទួលបានប្រាក់ឧបត្ថម្ភចំនួន៤លានរៀល ហើយថវិកានេះនឹងផ្តល់ជូនដល់គ្រួសារសពដោយផ្ទាល់តាមរយៈគណៈកម្មាធិការសមាគម អតីតយុទ្ធជនរាជធានី ខេត្ត ស្ថាប័ន ដែលចុះទៅសួរសុខទុក្ខនៅមូលដ្ឋាន។ លោកនាយឧត្តមសេនីយ៍ គន់ គីម បានបន្តថា៖ រាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន ក្រៅពីការដោះស្រាយ ផ្នែកជីវភាពទាំងការឧបត្ថម្ភថវិកា សម្ភារៈ នៅបានយកចិត្តទុកដាក់ដោះស្រាយចំពោះគោលនយោបាយដីសម្បទានសង្គមកិច្ច ផ្ទះសម្បែង ជូនដល់អតីតកងកម្លាំងប្រដាប់អាវុធ ដោយឈរលើស្មារតីដឹងគុណចំពោះគុណូបក្ការៈដ៏ថ្លៃថ្លារបស់បងប្អូនដែលបានធ្វើពលិកម្មដើម្បីប្រទេសជាតិ និងប្រជាជន។
នាឱកាសនោះ បន្ទាប់ពីមតិផ្តាំផ្ញើអំពីទិសដៅភារកិច្ចរបស់សមាគម និងការប្រគល់លិខិតតែងតាំងដល់ថ្នាក់ដឹកនាំអណត្តិថ្មីរួចមក លោកនាយឧត្តមសេនីយ៍ គន់ គីម បានឧបត្ថម្ភបន្ថែមទាំងសមាជិកចូលរួមចំនួន១០០នាក់ ដោយក្នុងម្នាក់ៗទទួលបានអង្ករ២០គីឡូក្រាម មុង១ ក្រមា១ ត្រីខ១យួ មី១កេស និងថវិកាចំនួន៥ម៉ឺនរៀល ៕