ភ្នំពេញ៖ នៅព្រឹកថ្ងៃទី៣០ ខែកញ្ញា ឆ្នាំ២០១៥ នេះ លោក កែវ ធា នាយការិយាល័យប្រឆាំងការជួញដូរមនុស្សនិងការពារអនីតិជនបានប្រាប់ឱ្យដឹងថាពាក់ព័ន្ធករណីបង្ក្រាបហាងកោសជប់ បង្កប់បម្រើសេវាផ្លូវភេទ ឃាត់ខ្លួនបុរសចំណាស់ម្នាក់ ដូច្នេះកម្លាំងសមត្ថកិច្ចកំពុងកសាងសំណុំរឿងបញ្ជូនខ្លួនទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់ ។

ប្រតិបត្តិការនេះធ្វើឡើងកាលពីវេលាម៉ោង០៥និង០០នាទីល្ងាច នាថ្ងៃទី២៩ ខែកញ្ញា ឆ្នាំ២០១៥ ដែលមានទីតាំងស្ថិតនៅផ្ទះលេខ៨៤D ផ្លូវ៤៣០ សង្កាត់ទំនប់ទឹក ខណ្ឌចំការមន រាជធានីភ្នំពេញ។

សមត្ថកិច្ចបានអោយដឹងថា បុរសដែលជាម្ចាស់ទីតាំងខាងលើ មានឈ្មោះ ជា វិបុល ភេទប្រុស អាយុ៤៦ឆ្នាំ មុខរបរ បើកហាងកោសជប់ ម៉ាស្សា និងស្នាក់នៅផ្ទះផ្ទះកើតហេតុខាងលើ ។ ចំណែក នារីរងគ្រោះ ទាំង៧នាក់ ទី១ ឈ្មោះ សុខ នៅ ភេទស្រី អាយុ៣០ឆ្នាំ ទី២ ឈ្មោះ ម៉ៃ ស្រីម៉ៅ ភេទស្រី អាយុ២៨ឆ្នាំ ទី៣ ឈ្មោះ នួន ស្រីខួច ភេទស្រី អាយុ២៣ឆ្នាំ ទី៤ ឈ្មោះ ឆាយ គីមស៊ី ភេទស្រី អាយុ២១ឆ្នាំ ទី៥ ឈ្មោះ ឈន ស្រីមីុ ភេទស្រី អាយុ២២ឆ្នាំ ទី៦ ឈ្មោះ ហោ ស្រីល័ក្ខ ភេទស្រី អាយុ២២ឆ្នាំ និងទី៧ ឈ្មោះ មាស ពិសី ភេទស្រី អាយុ៣១ឆ្នាំ ។

សូមបញ្ជាក់ផងដែរ នារីរងគ្រោះទាំង៧នាក់ ត្រូវបានកម្លាំងសមត្ថកិច្ចការិយាល័យជួញដូរមនុស្សនិងការពារអនីតិជន ប្រគល់ជូនអង្គការសង្គមកិច្ច ដើម្បីធ្វើការអប់រំបន្ត ។

បើតាមប្រពភព័ត៌មានពីសមត្ថកិច្ចបានអោយដឹងផងដែរថា ដោយមានការរាយការណ៍ពីប្រជាពលរដ្ឋថា ទីតាំងហាងកោសជប់ ម៉ាស្សា ដែលមានយីហោ “ហេងរហូត” ខាងលើនេះមានបង្កប់ បម្រើសេវាផ្លូវភេទផងនោះ ទើបកម្លាំងសមត្ថកិច្ច បានដាក់កម្លាំងចុះប្រតិបត្តិការ បង្រ្កាបនិងឃាត់ខ្លួន នារី រងគ្រោះចំនួន៧នាក់ និងម្ចាស់ទីតាំងម្នាក់ដែលបើកទីតាំងម៉ាស្សា បង្កប់សេវាផ្លូវភេទនេះ ៕

ដោយ៖ សរ រស្មី